Fesoasoani i Tagata ua Lē o Talaʻi Pea
1 Na fetalai Iesu: “Ai se faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” (Mata. 7:24) O le iloaina o le uiga o le fetalaiga a Iesu ma uunaʻia saʻo ai, o le a faapogaia ai se tasi e fuaina mai galuega lelei, e aofia ai le talaʻiina o le tala lelei. O lenā usiusitai ona o uunaʻiga saʻo, ua saunia ai se faavae e pei o se papa lea o le a lē mavae pe a oo mai taimi o mafatiaga ma mea faigatā.
2 O se pogai lelei lea e tatou te fia fesoasoani ai o le tasi i le isi, ina ia auai i le galuega talaʻi i le mea e tatou te mafaia, pe a tusa ai ma o tatou tulaga. O nisi o ē o loo iai ma i tatou, ua avea ma tagata ua lē o talaʻi pea ma ua avea lea o se popolega tele. O le ā e ono māfua ai ona taofia se tasi ua oo lava ina uma le masina ae e leʻi faia lava se sao i le galuega talaʻi e aupito sili ona tāua ma le faia o soo?
3 O nisi atonu o loo mamaʻi tigāina, a o isi ua latou faataatia ese le galuega talaʻi seʻia lata i le faaiʻuga o le masina, ae ua puʻea faamanu i ofaga i mea e tutupu ma ua taofia ai i latou mai le ō atu i le auaunaga. A o isi, atonu ua lē o talisapaia le faiva e pei o se oloa tāua o le auaunaga lea e tatau ona faamuamua. (2 Kori. 4:7) I nisi taimi, o omiga mai se paaga lē talitonu po o isi tauaiga, ua avea o se vala e faalotovaivaia ai. A ua aafia isi ona o le lē faaauauina ona fai ma masaniga lelei le faia o suʻesuʻega totino ma auai e lē aunoa i sauniga, o lea, ua lē o toe oo ai iā i latou se lagona o le faanatinati e faatatau i le lata tele mai o le iʻuga o le lalolagi a Satani. (2 Pete. 3:11, 12) E iai se mea ua āfaina ai o latou loto. O le mea lea ua lē o toe uunaʻia ai i latou e tautala atu mai le tele o mea o i o latou loto. (Mata. 12:34) Po o le ā lava le māfuaaga, ae tatou te mananaʻo e fesoasoani atu iā i latou.
4 Le Mea e Mafai Ona Fai e Toeaina: E ao i toeaina ona tauivi ia iloa tulaga ma manaʻoga o tagata uma i le faapotopotoga ina ia mafai ai ona tuuina atu se fesoasoani alofa. I a latou fonotaga, e ao i toeaina ona mātauina nisi o ē atonu ua lē o talaʻi pea, ma faia loa se fuafuaga po o ai e mafai ona fesoasoani atu iā i latou na ma le auala e faia ai lenei mea. E mafai foʻi ona latou faailoa atu lenei faafitauli pe a talanoaina ia manaʻoga o le faapotopotoga i le Sauniga o le Auaunaga. O le failautusi e tatau ona ia mātauina so o se tasi e iai se masina na lē talaʻi ai pe a faia faamaumauga i pepa faamaumau a Tagata Talaʻi o le Faapotopotoga.
5 Le Mea e Faia e Ovasia o Suʻesuʻega Tautusi: I masina taʻitasi, e ao ai i le failautusi ona avatu i Ovasia o Suʻesuʻega Tautusi a le Faapotopotoga taʻitasi se lisi o i latou e leʻi tuuina mai ni lipoti o le auaunaga i le fanua, ina ia mafai ai ona avatu vave se fesoasoani. (Tagaʻi i La Tatou Faiva o le Malo faa-Peretania o Me 1984, itulau e 7.) E tatau i le ovasia o le suʻesuʻega ona talanoa atu ma le agalelei i ē ua lē o talaʻi pea ina ia faamautinoa ai po o le ā se mea atonu o loo taofia ai i latou ma po o le ā foʻi se mea e mafai ona ia faia e fesoasoani ai. (Faata. 27:23) O le a talisapaia e le toʻatele o i latou ua lē o talaʻi pea le fesoasoani. Pe a uma ona iloa e faatatau i tulaga o tagata, e ao la i le ovasia ona faia ni fuafuaga maʻoti ina ia la galulue faatasi ai ma lea tagata pe tofia foʻi se isi tagata taʻumatuaina po o se paeonia e faia faapea. Atonu e avea foʻi ma fesoasoani le avatu o ni fautuaga aogā i tagata ua lē o talaʻi pea, ina ia saunia ai se faasologa e talafeagai ma o latou lava tulaga. Pe mafai ona latou fuafua e faia e lē aunoa se sao i le auaunaga i le fanua i Aso Sa muamua o masina taʻitasi po o Aso Toonaʻi lona lua ma lona fā o le masina? Pe afai o le faafitauli o le auala e femalagaaʻi ai pe e latou te manaʻomia foʻi se fesoasoani i tamaiti laiti, e mafai e le ovasia o le suʻesuʻega ona faia se fuafuaga ma isi tagata talaʻi o ē e lotomalilie e fesoasoani.
6 Pe a asiasi atu la le ovasia o le auaunaga i vaega o suʻesuʻega tautusi, e mafai ona ia faia se fuafuaga e la te asiasi atu ma le ovasia o le suʻesuʻega tautusi i tagata ua lē o talaʻi pea. I lea, o le a mafai ai e ni uso taʻumatuaina se toʻalua ona faia se sao i le avatuina o se fautuaga ma fesoasoani ai i na tagata, e ati aʻe se faavae e pei o se papa o le usiusitai atu i le poloaʻiga a Keriso e talaʻi ma faia soo. Atonu e mafai ai i lea mea ona uunaʻia i latou e faamuamua i la latou faasologa le galuega talaʻi. (Roma 10:10) Seʻi o tatou faamalolosi i lenei auala e faailoa atu ai lo tatou alofa iā i latou e tatou te “aiga [i] le faatuatua.”—Kala. 6:10.