Ia lē Mapu ona Faaauauina la Tatou Faiva
1 Ua saosaoa ona suia le tulaga o lenei lalolagi a o loloto ona tatou agaʻi atu i le taimi o le iʻuga. (1 Kori. 7:31) O le oo mai o mea tutupu e gatete ai le lalolagi, o se faataunuuga o valoaga o le Tusi Paia. A o tatou matauina le mea o loo tupu i le lalolagi ua siomia ai i tatou ma totonu o le faalapotopotoga faatiokarate, e mafai ona tatou talisapaia le faanatinati ua i ai ina ia tatou talaʻia “le tala lelei” o le Malo.—Mare. 13:10.
2 O le faatonuga e faia soʻo, e sau mai lo tatou Taʻitaʻi ma le Faaaʻoaʻo, o Iesu Keriso. I le faia faapea, na ia faamautinoa ai le taulau o lena galuega i lana folafolaga, “ou te ia te outou i aso uma lava, e oo lava i le gataaga o le lalolagi.” (Mata. 28:19,20) Sa manatu mamafa soʻo o Iesu i ana fetalaiga, ma e tusa lava pe latou te fesagaʻi ma teteega malosi, sa “le mapu foi i latou i aso uma ona aʻoaʻo atu, ma talaʻi atu . . . le tala lelei ia Iesu Keriso.” (Galu. 5:42) Maeu se faaaʻoaʻoga lelei ua latou faataatia mo i tatou!
3 A o tatou faitauina le 1990 Yearbook, ua tatou vaaia ai le faamanuiaina e Ieova o la tatou faiva i le aumaia o faatelega matagofie i soʻo fou. E matuā mataina faatelega ua lipotia mai i nisi atunuu. O le faatelega aoao i le lalolagi atoa ua oso aʻe i se mamao e leʻi mafaufauina e so o se tasi o i tatou i ni nai tausaga ua mavae. (Isaia 60:22) Ae ā la tatou oganuu masani? Ma e faapefea la tatou faiva taitoatasi? Pe o tatou olioli i la tatou vaega i le faiva atoa ma le aotelega o le faiva a o tatou uso faigaluega i so o se mea? Pe o lē mapu ona tatou faaauauina a tatou taumafaiga taitoatasi i le faiva?
LA TATOU VAEGA TAITOATASI
4 E manino le mata o le vai, e lē fua tutusa oganuu uma. (Faatusatusa Mataio 13:23.) E moni foi faapea o nisi oganuu, e pei o Aialani ma Kupeka, faatoʻā fua mai ina ua mavae le tele o tausaga o galuega fitā i le vaega a faifeau maelega. E anoanoai tagata tetee i nisi o nofoaga, ae i isi e faaletaualoa ma feū taliga o tagata lautele i le feau o le Malo. O isi foi vaipanoa, ua toatele naʻuā tagata faigaluega i le fanua ua itiiti ai le oganuu e ufitia. Peitai po o le a lava le ituaiga oganuu ua tatou maua e galueaina, e lē tatau ona tutuʻia ai lo tatou faatuatua. Na tusia e le aposetolo o Paulo, “Aua neʻi tatou faapalapala i le [faia o le mea lelei, NW]; auā o ona po e tatau ai tatou te selesele mai ai, pe afai tatou te le faavaivai.” (Kala. 6:9) O ana upu apoapoaʻi e faatatau i Kerisiano uma lava. O le a mafai faapefea ona tatou faia o lea? O le ā o le a fesoasoani ia i tatou ia lē mapu ona faaauau la tatou faiva?
5 E mafai ona tatou tiotio pea ma faataulauina la tatou faiva pe afai tatou te talitonu ia Ieova ma faalagolago i lona malosi e faatumauina i tatou. Taofi pea i manatu o Ieova o lē na te faatupuina le fanua ia fuatele. (1 Kori. 3:6) I le tali mai ia tatou tatalo mo se fesoasoani, ua saunia e Ieova fautuaga, faatonuga faatino, ma le faulaʻi o sapalai o lomiga faale-Tusi Paia mo lo tatou faaaogāina totino ma mo le fesoasoani i isi ia sagaʻi mai e iloa o ia. Pe o tatou faaaogā atoatoa nei sauniuniga?
TAUSIA SE UIGA SAʻO
6 Afai e ia i tatou se uiga sese, e mafai ona avea lena ma lavelave matuiā i le ala o se faiva fuatele. Afai ua tatou fafauina se tala vale e faatatau i tagata i la tatou oganuu e faavae i lo latou lē faalogo i le taimi ua mavae, o le a atagia lena uiga i o tatou leo, fofoga faaalia, ma le leai o se sauniuniga tinoū mo le faiva i le fanua. Ua tatou maua le faatonuga e talaʻi ma aʻoaʻo, ma e leʻi logoina mai i tatou faapea ua maeʻa le galuega. E tatau i lo tatou faanaunauga e usiusitai ma gauai i le taʻitaʻiga tauatua ona uunaia i tatou ia lē mapu ona faaauau la tatou faiva.
7 O le a faataunuuina le fuafuaga a Ieova e faatatau i le lapataia o le amioleaga ma le aoaoina i totonu o soʻo a o leʻi oo mai le iʻuga. E mafai ona tatou auai nei i le olioli i le faiva ma tepa taulai atu i faamanuiaga e faavavau i le lotolotoi o tagata o le Atua pe afai tatou te faaalia lo tatou faatuatua ma le alofa i le lē mapu ona faaauauina la tatou faiva.