Afio mai i le Tauaofiaga Itumalo 1990 “Gagana Mamā”

¹ O le a aeaeina i tauaofiaga itumalo 1990/1991 le matua “Gagana Mamā,” ma ua valaaulia oe ia auai. Mo le Lala i Samoa i Sisifo, e tasi le tauaofiaga o le a usuia i Apia mai ia Tesema 29, 1990 e oo ia Ianuari 1, 1991. O le a tauaaoina le polokalama atoa i le faa-Samoa ma le faa-Peretania ma le tele o ona vaega o le a faia i le faa-Toga. O le a iai foi ni vaega i le faa-Tuvalu.

² Ua taʻua i le afioga faavaloaga a Ieova i le Sefanaia 3:9 “Auā o ona po ia ou te liliu atu ai i nuu o le gagana [mamā, NW], ina ia latou valaau uma lava i le suafa o Ieova, ma auauna ia te ia ma le loto gatasi.” O le tauaofiaga i lenei tausaga e lē gata o le a mataulia ai po o le ā le “gagana mamā” ae o le a fesoasoani foi ia i tatou e sapaitalia le pogai e matuā tāua ai ona aʻoaʻoina ma tautala lelei ai ma e faapefea i lo tatou tomai i lona faaaogāina ona faamalosia le autasi o le ʻau uso i le lalolagi aoao.

³ IA VAVE TAUNUU: Ua valaaulia i tatou e le faalapotopotoga a Ieova e taumamafa i lana laoai faaleagaga. O se faailoga la o le faaaloalo ma le sapaitalia le taunuu ane i le taimi tonu. O lona uiga moni, e ao ona tatou vave taunuu i aso taitasi ma alalataʻi a o leʻi amataina le polokalama. Ua manaomia ai i lea ona lava se taimi mo le vaaia o mea e manaomia ona uaʻi atu i ai, e pei o le pakaina o a tatou taavale ma le sailia o nofoa talafeagai mo o tatou aiga.—1 Kori. 14:40.

⁴ Na maofa sui usufono i tauaofiaga i Polani i le tausaga ua mavae i le tuutoina faaleatua, le alofa, ma le autasi o o latou uso. Sa faamaonia le talisapaia loloto mo sauniuniga faaleagaga o le a aumaia i le tauaofiaga. I taeao taitasi, e usu po ai lava uso i le nofoaga o le tauaofiaga, ua nofoi ma sauni mo le pese amata ma le tatalo. Sa latou nonofo ai pea mo le pese faaiʻu ma le tatalo, ma na latou faatuatuai ina ua maeʻa le polokalama ina ia mafuta faatasi ai ma o latou uso.

⁵ Sa o se faaaʻoaʻoga le maopoopo lelei o uso. Na latou ō mai e faalogologo ma ia aʻoaʻoina. E ui ina totō timuga i le malae taalo taalaelae i Poznan ma Chorzów sa leʻi liua ai lo latou uai ane i le polokalama. O tagata talavou na auai, e aofia ai fanau laiti, sa lelei ona aʻoaʻia, fifilemu, ma uaʻi atu i le polokalama. Sa nonofo faatasi aiga. O i latou o ni faaaʻoaʻoga lelei i lo latou folasia o le faaaloalo loloto mo le laoai a Ieova. E mafai faapefea ona tatou maua aogā mai la latou faaaʻoaʻoga?

⁶ O le faataʻitaʻi i le faaaʻoaʻoga lelei a isi e faale-Tusi Paia. (2 Tesa. 3:7) A o atonu e eseese o tatou aiaiga totino, tatou te mananao foi ia tele ni mea e maua mai i la tatou tauaofiaga. Ina ia alofia le popole ma le lē mautonu ona o le tuai atu i le nofoaga o le fonotaga, ua iloa e nisi aiga le aogā o le faatulaga o se taimi talafeagai e malōlō ai. I le tausisi aʻiaʻi i se faasologa, o le a latou maua ai se moe lelei i le po ma sauni ai e vave usu i le aso e sosoo ai. O le a alofia i lenei le taunuu atu a o faagasolo le polokalama, lea e fai ma faalavelave ma faasoesa ia i latou ua maeʻa ona nofoi. O lo tatou utamamao i lenei faatatau o se ata lafoia lea o lo tatou āva ma le faaaloalo mo Ieova ma lo tatou alofa ma le manatu mo tatou uso.

⁷ O SE TAUAOFIAGA E FA ASO: O le umi o le Tauaofiaga Itumalo “Gagana Mamā” e fa aso. O le a amata i le Aso Toonai i le 1:30 i le aoauli, ma o le a faamuta e tusa o le 5:10 i le afiafi o le Aso Toonai, Aso Sa, ma le Aso Gafua, ma le 4:20 i le afiafi o le Aso Lua. I le Aso Sa e oo i le Aso Lua o le a amata le polokalama i le 9:30 i le taeao. O le a faatumulia aso taitasi i faamatalaga aogā ua fesootai ma le tautalagia o le gagana mamā. O le a iai lauga, faataʻitaʻiga, mea tutupu, lauga faasolo, ma tala faale-Tusi Paia e lua.

⁸ Fai ma au filifiliga ia aua neʻi misia se vaega e tasi. Atonu e manaomia ai i lenei ni taulaga totino ma ni fetuutuunaiga i lau faasologa. Ua iloa e nisi le tatau ona faia o ni faatatauga faapitoa ma o latou pule. E toatele foi ua fulitua i avanoa lelei tau tupe ina ia auai i vaega uma. Peitai, seʻi manatu i mea na faataulagaina e le toatele o o tatou uso ma mea sa tatau ona latou uia ina ia auai i tauaofiaga i Polani i le tausaga ua mavae. E lē sili ai ea ona uunaia oe ia auai i vaega uma o la outou tauaofiaga? E mautinoa o le a faamanuia e Ieova i latou o ē o loo avea lenei mea ma mataupu o tatalo faatauanau ma tuu faamuamua taumafaiga mai le loto ia auai.—Epe. 10:24, 25.

⁹ Manatu i le olioli sa faaleoina e se aiga mai le Iunaite Setete ina ua maeʻa ona auai i le tauaofiaga itumalo i le tausaga ua tuanai. Na latou taʻua faapea: “Sa o se polokalama matagofie o faatonuga, lea sa matou talisapaia uma. O se tasi o vala tu matilatila sa faapea ona pāʻia ai o matou loto o le auala na outou tatalaina ai lomiga fou. Sa uunaia aʻu ma loʻu toalua e ‘fofola moni atu’ ma avatu mea e sili mamao na i lo o mea na ia i maʻua i so o se isi lava fonotaga i le gasologa o le tele o tausaga talu ona ma auai. Sa lē na o i maʻua. Na iai lava se mea e uiga i le faatatauga fou sa uunaia ai i maʻua e faia e sili atu na lo le mea e masani ai. O le mea moni, e leai se tasi o i tatou e faapea ua lava ma totoe mea ua ia avatua ia Ieova mo le anoanoai o mea ua ia faia mo i tatou ma o loo faaauau pea ona faia.”

¹⁰ FAALOGOLOGO MA LE LĒ GASĒ: Ua fetalai Ieova i le Salamo 50:7 “Ina faalogologo mai ia loʻu nuu e, seʻi ou fai atu.” O lea, a o faagasolo le polokalama o le tauaofiaga, aua neʻi o tatou tosina i vaaiga ma leo e lē fesootai ma mataupu o loo taulimaina mai i le pulelaa. E ao ona uunaia i tatou e lo tatou faanaunauga ia tautala lelei i le gagana mamā e gauai atu atoatoa i le valaaulia a Ieova i le Isaia 55:2 “Seʻi matuā faalogologo mai ia ia te au.”

¹¹ O mataupu uma o le a tauaaoina i lenei tauaofiaga e mo lo tatou lelei faaleagaga ma o le a galue e faamalosia la tatou filifiliga e tumau mausalī i la tatou auaunaga ia Ieova ma ia autasi ma o tatou uso. O le a aumaia e le tauaofiaga i tatou ia tusapau ma manaoga o le taimi nei ma fesoasoani foi ia i tatou e ō faatasi pea ma le faalapotopotoga a Ieova. O le lē uaʻi atu o le a iʻu ina tuua ai tatou i tuā. E tatau ona mitia pea i tatou i le polokalama ina ia utufia mai ai aogā atoatoa ma mulimuli ane o tatou faatinoina mea ua tatou aʻoaʻoina.—Iako. 1:25.

¹² Pe iai se mea e mafai ona tatou faia ina ia atili ai ona uaʻi totoʻa atu i le polokalama ma manatua faamatalaga ua taulimaina? Ioe, e iai. E toatele sui usufono ua atiina aʻe se masani aogā o le faia o faamaumauga a o faagasolo le polokalama. E tatau ona aofia ai mea talafeagai mo le faia o faamaumauga i Tusi Paia ma tusi pese o ni meafaigaluega faatulagaina pe a auai i se tauaofiaga. Afai e te manatu faatauvaa i le faia o faamaumauga, aiseā e lē tofo ai i lea a o faagasolo le Tauaofiaga “Gagana Mamā.” Atonu o le a e iloaina o se auala lelei lena e taulaʻi ai pea ona e uaʻi atu i mea o loo tautalagia ma puipuia ai oe mai le faatagaina o lou mafaufau e tafatafao solo.

¹³ E lē manaomia ona salafa ma uumi faamaumauga. E masani ā ona lava se fuaiupu pe lua mo se manatu autū. Ua iloa e toeaina le aogā o le iai o faamaumauga ua faatulaga lelei mo le faafoeina o se autaluga uigā o le polokalama o le tauaofiaga i le Sauniga o le Auaunaga. Atonu foi, latou te mananao e taaofaʻia le tele o manatu sa aaoina i le tauaofiaga i la latou galuega tau aʻoaʻo atu ma le faaleoleo mamoe.

¹⁴ PESE MA TATALO: Tatou te faapaiaina Ieova i le usuina o ona viiga. O se vaega lea o la tatou tapuaiga. E faapea foi ona finagalo malie Ieova pe a faalatalata atu ona tagata ia te ia i le tatalo faatauanau. (Faata. 15:8e) O le a gafatia e le tauaofiaga itumalo se avanoa tutasi mo i tatou e autasi ai ma le faitau selau o o tatou uso ma tuafafine i le viiviia o Ieova i pese atoa ma tatalo. Peitai, ua faaalia e nisi le leai o se faaaloalo mo ia vaega tāua o la tatou tapuaiga. E faapefea? E ala i le taunuu faalētatau i le tauaofiaga a o faia po o le maeʻa foi o le pese amata ma le tatalo. Pe i le taufaaiʻuiʻuga o le polokalama, e tuua ai e nisi o latou nofoa i le taimi o le pese ae leʻi faia le tatalo. Aiseā? Atonu e iai ni mafuaaga tatau mo le faia o lenei ae seaseā. Peitai, pe o se faaalia o le faaaloalo tatau ma le sapaitalia o le laoai a Ieova pe a fai e faaleamanaia e nisi le faaeaga ia pepese ma auai i le tatalo tau ā ina vave oo ai i a latou taavale pe ō e aai?—Mata. 6:33.

¹⁵ E tatau ona tatou faaeteete i le tuliloaina o ni lelei totino, ina ia tatou lē faatagaina ai le uiga fia matamuamua o le lalolagi po o mailei faalēmataʻu e pei o le matapeapea ma le manatu faapito e faalavelavea ai lo tatou agaʻi i luma faaleagaga. Tau ina tatou folasiaina lea lava agaga o le talisapaia mo mea paia e pei ona sa faia e o tatou uso i tauaofiaga i Polani i le tausaga ua teʻa, ma talosia ia tatou savavali soosoo tauʻau ma i latou i le faaalia o le faaaloalo tatau mo na vala maualuluga o la tatou tapuaiga, ua taʻua, o tatalo ma le usuina o viiga ia Ieova.—Sala. 69:30.

¹⁶ A TATOU AMIO FAA-KERISIANO: O a tatou amio faa-Kerisiano ma foliga faaalia i tauaofiaga ua tatou aeaeina ai se talaaga lelei o ni Molimau a Ieova. Ua mafua lenei ona tatou te ināinā i la tatou tapuaiga ia Ieova ma tatou te lē manatu i le auai i se tauaofiaga e na o se tafaoga faavafealoai. Pe a tatou aofaga potopoto i na faatasiga faapitoa, e ao ona tatou tausisi i le mamalu faa-Kerisiano ma se lagona faaleagaga o le mafaufau, i le pulea o i tatou lava o ni faifeau i taimi uma.—1 Kori. 10:31-33.

¹⁷ Ae peitai, o se faasoesa le vaaia o nisi e auai i tauaofiaga o loo faaauau pea o latou uiga faalemigao, i laei, tautala, ma amio. O le ā e mafai ona faia pe afai e foliga mai o loo iai na faiga i lau faapotopotoga po o se tauaofiaga? E ao ia i latou o ē e iai agavaa faaleagaga ona ofoina atu se fautuaga alofa faatasi ma se manatu e toe fefulisai ai. (Kala. 6:1; Efe. 4:11, 12) O le tautala i le gagana mamā e ao ona uunaia ai i tatou e siitia lo tatou talaaga lelei ma tapulaa maualuluga tau amio.

¹⁸ Na tuua e se tagata asiasi ane i se tasi o tauaofiaga le faamatalaga o loo mulimuli mai i se pusa o meaalofa: “Sa ou olioli tele i la outou polokalama. O le a ou suesueina nei le Tusi Paia ma se tasi o uso. Faatoʻā ou alu ā lenei i se tasi o a outou fonotaga. Sa ou fuafua e tau o le Aso Toonai ou te sau ai, ona o le Aso Sa o loʻu aso lotu. Ae ona o loʻu ofo tele na ou sau ai i le asō ma aumai loʻu aiga atoa faatasi ma aʻu. Ae sa ou faanoanoa ona o le talanoa leo tetele o ē matutua a o saunoa mai le failauga.”

¹⁹ Ua matauina foi faapea i nisi o tauaofiaga e nonofo ai nisi tamaiti i vaega pito i luga po o nofoaga e faatonutonu ai le maota fono, feaveai solo faamaumauga, taumusumusu, ma e masani ona lē uaʻi atu i le polokalama. Ua faaalia i nei ituaiga o amioga lo latou manaomia pea o le faatonutonuga faamātua ma e ao ona nonofo faatasi ma le aiga. O mātua taunapa o le a uaʻi atu i ia mataupu ma saunia taʻiala e manaomia e a latou fanau. (Efe. 6:4) E ao ona talisapaia e uso, tuafafine, ma ē laiti faapea a amata loa le polokalama, o le taimi lea e faalogologo ai, ae lē o le talatalanoa.—Teu. 31:12.

²⁰ O se isi vaega e ao ona faaalia ai le utamamao ma le migao e fesootai ma le nofoaga tatou te faamautu i ai. Ua tatou maua ni potu lelei i fale talimalo i ni tau iloga ona paʻū. E ao la ona tatou faaalia le sapaitalia ma manatu mamafa i ē pulea fale talimalo, ia migao ae aua le soona tagisā. (Kala. 6:10) Ua aumaia ni fautuaga lelei e faatatau i amioga talafeagai i fale talimalo. E toatele sa tali atu i ai ma le fiafia ma taumafai faamaoni e felagolagomai atoatoa ma ē pulea fale talimalo.

²¹ Sa faamamafaina i se mataupu o le lomiga o Iuni 22, 1986 o le Awake! i itulau e 24-27 faapea “o mea e te faia totino a o auai i se tauaofiaga, e atagia lea i se vaega atoa. O le a faamasinoina e tagata se vaega e ala i lau amio.” O lea, a e asiasi i se aai o se sui usufono i se tauaofiaga a Molimau a Ieova, faaaogā le filifiliga lelei ma le faautauta ma ia sauni e “faia mea uma ona o le tala lelei.”—1 Kori. 9:19-23,NW.

²² E ui ina avatua e le toatele anoanoai o uso le faamamaluina i le suafa o le Atua, ae ao ona matou taʻutino atu faapea o nisi aiga e auai i tauaofiaga ua fai ma mafuaaga o faitioga. Mo se faaaʻoaʻoga, ua maeʻa ona totogia se potu ma se fua faatatau e lē silia i le toafa pe toalima tagata, e aofia ai tamaiti, ae ua aumaia i ai e nisi ni tagata e oo atu i le toasefulu, ma o se lē faamaoni lena. Ina ia latou ofi ai, ua latou tasiʻi ese faamalū mai moega ma tuu i luga o le fola ina ia mafai ona momoe ai nisi a o isi ua momoe i luga o le pusa sipuligi o le moega. Ona talosagaina lea o nisi ieafu mai ē pule. E faaopoopo i ai, ua faaaogā foi taga e momoe ai mo tamaiti.

²³ E iai faletalimalo e lē o toe mananao e faaaogā o latou potu e Molimau a Ieova ona ua solia e nisi aiaiga e faasaina ai le saunia o mea taumafa. O se isi faitioga e faapea ua o esē uso mai faletalimalo, ae tuua ai o latou potu i se tulaga e lē fia vaai i ai. E ao ona faaalia le tumamā ma le utamamao e lē tau o o tatou laei ma amio ae atoa foi ma le auala tatou te tausia ai mea totino a isi. E iai ea se mafuaaga e ao ai ona lē tuua se potu i se tulaga maopoopo ma mamā? O amioga lē taualoa e mafai ona faaleagaina ai lo tatou igoa lelei. I le tauaofiaga itumalo o loo fotuai mai, seʻi o tatou tauivi uma ia e pulea i tatou lava ina ia “viia ai i mea uma lava le aʻoaʻoga a lo tatou Faaola, le Atua.”—Tito 2:10, NW.

²⁴ MO MĀTUA: E lotolotoi ai foi fanau laiti ma le au talavou ia i latou ua valaaulia i le Tauaofiaga Itumalo “Gagana Mamā.” E tatau foi ia i latou ona tautatala lelei i le gagana mamā. Maeu le matagofie o le tagaʻi atu i talavou o ē ua aʻoaʻoina o loo uaʻi totoʻa atu i sauniga uma faa-Kerisiano ma o ē ua matuā naunau i le polokalama o le tauaofiaga! (Sala. 148:12, 13) Peitai o le tele lava e faalagolago i le faaaʻoaʻoga ma le vaavaaiga a mātua. O le toatele o talavou sa matuā lelei ona toleniina e faia faamaumauga. Afai o oe o se matua e te leʻi aʻoaʻoina lava lau fanau pe faapefea ona faia faamaumauga, aiseā e lē faaaogā ai le taimi o loo totoe a o lumanai le tauaofiaga e faia ai faapea? E oo foi i tamaiti laiti e mafai ona faalaeiau e tusi i lalo mau siʻi ma upu autū e fesootai i ai latou te faalogo o faaleo mai e failauga. Ua fuafuaina e nisi mātua e autalu manatu autū mai le polokalama o le aso pe a taliu atu i o latou nofoaga o loo faamautu ai po o le malaga foi i le fale.

²⁵ O le mea moni, e toatele mātua latou te talisapaia faapea o le vaivaiga faalenatura o tamaiti o le fia taaalo. E lē lava lo latou poto masani i le olaga, ma e leʻi taumatuaina i latou. O lea, e tatau ona aʻoaʻoina i latou po o afea e uaʻi totoʻa ai ma faapefea ona latou amioaʻi i sauniga. Ua manaomia ai i lenei le vaavaaiga lelei a o latou mātua. O nisi mātua e fai si faatalalē i lenei itu. I nisi taimi, e ui ina atonu e faaalia e mātua le faaaloalo tatau ia Ieova a o faia se tatalo, ae o loo taaalo a latou fanau ma faasoesa i isi. E ao lava i mātua ona iloa mea o loo faia e a latou fanau e oo foi i le taimi o tatalo. O ā foi a latou mea o fai pe a tuua o latou nofoa i le taimi o le polokalama? Pe o tuufau fanau a o faia po o le maeʻa foi o le polokalama o le tauaofiaga?—Faata. 29:15.

²⁶ I nisi tulaga e tuufau ai fanau i vaitaele o fale talimalo a o la e iai mātua i le potu, pe ō e fai ʻaiga, po o le aafia i nisi gaoioiga. E lē tatau lenei mea. Sa matuā le aʻoaʻia ma lē taupulea gaoioiga a nisi tamaiti ma oo ai ina le āva i o latou uso ma tuafafine matutua o ē na taumafai e faatonutonu i latou i se auala agalelei. O na amioga lē taupulea e lē tatau i Kerisiano e masani ona avea ma iʻuga o le tuusaoloto ma le leai o se aʻoaʻiga i le aiga. E mautinoa e ao ona faasaʻoina. E ao i mātua Kerisiano uma ona avatua se vaavaaiga totoʻa i a latou fanau i taimi uma a o latou tausia aʻe i “latou i aʻoaʻiga ma apoapoaiga a Ieova.”—Efe. 6:4, NW.

²⁷ SAPAITALIA LOU FELAGOLAGOMAI ATOATOA: Ua faia ni fuafuaga mamao ma ni galuega ina ia iloa ai ua lava ma totoe nofoa, lomiga, mea taumafa, ma isi sauniuniga o loo iai mo tagata uma e auai i le tauaofiaga. Ina ia mautinoa le uigā o ia faatatauga, matou te talosagaina ai lo outou felagolagomai vavalalata ma faasilasilaga uma o le tauaofiaga.—1 Kori. 13:5; Fili. 2:4.

²⁸ E ui e tatau ona lava ma totoe avanoa mo tagata uma i fale matamata i le Apia Park, ua talosagaina lau lagolagosua atoatoa ma le mataupu o le taofia o nofoa. Faamolemole ia teu i manatu NA O SUI LAVA O LOU AIGA MA NISI O Ē TOU TE MALAGA FAATASI MAI I LAU TAAVALE E MAFAI ONA TAOFIA I AI NOFOA. Faamolemole aua le faaleoleoa nofoa mo isi. I nisi taimi, e faaleoleo ai nofoa faaopoopo mo se tasi e lē o mautinoa. O se lē alofa lenei ma le tau faasese i le au tautua ma isi o loo tau vaavaai mo ni nofoa avanoa. I le ōgatasi ma le fautuaga a le Tusi Paia, e ao ona tatou tauivi e faaalia le alofa faaleuso ma felagolagomai atoatoa ma le faatatauga ua iai mo le taofia o nofoa.—2 Pete. 1:5-8.

²⁹ E fautuaina faapea ia faaaogā le faautaga lelei i mea totino e aumaia i le nofoaga o le tauaofiaga. I taimi ua mavae, sa aumai ai e nisi pusa faamalūlū lapopoa po o isi mea tetele e lē mafai ona ofi i lalo o o latou nofoa. Na tuua nei mea i va e savavali ai po o luga o nofoa. O le iʻuga ua leai ai ni nofoa mo isi, ma i nisi taimi ua solia ai aiaiga tau tineimu ma le saogalemu. E manaomia ona tatou faaalia le magafagafa i na mataupu.

³⁰ E faataga le faaaogāina o mea puʻe ata (video) ma laau puʻe leo i le nofoaga o le tauaofiaga. Ae peitai, o i latou e faaaogāina ia mea faigaluega e tatau ona faaeteete ia alofia le faalavelave po o le faasoesa i isi. E lē tatau ona faatutū na mea faigaluega i va e savavali ai po o faitotoa e ulufafo ai. E lē tatau foi ona faapipii atu na mea faigaluega i le faiga tau eletise o le pulelaa po o isi palaka eletise. O le a lē faatagaina ni molī sulu. O i latou o loo mafua ai nei vevesi pe faaleamanaia so o se taʻiala ua i luga e ao ona faasaʻoina loa le mataupu pe a tāea i la latou faautaga. O le a mataalia le au tautua ma isi o loo faafoeina e faasaʻo so o se solia o nei taʻiala, ma e tatau ona latou maua le felagolagomai atoatoa mai ia i latou o loo faaaogāina na mea faigaluega.

³¹ SAUNIAINA O LOMIGA MA MEA TAUMAFA: O le tausaga nei, ina ia ōgatasi ma le faatatauga fou mo le tufatufaina o lomiga i le faapotopotoga, o le a tufatufaina ai lomiga uma i le tauaofiaga e aunoa ma se totogi. O le a fetuutuunai foi e le Sosaiete ma faafaigofie faatatauga mo le saunia o mea taumafa i le faaavanoaina lea o mea taumafa ia i latou e auai i le tauaofiaga e aunoa ma se totogi, i le auala e tasi e pei o lomiga. Maeu le manaia o nei sauniuniga, e faamāmā ai le galuega ma sili atu ai ona vave mo le lelei o tagata uma! E lē taumatea o lena aaomafola i le vaega a le faalapotopotoga a le Atua o le a uunaia ai i tatou ma le loto faafetai e faaleoina atu lo tatou talisapaia i ni auala faatino.—Faata. 11:25.

³² Ma le mautinoa, e sapaitalia e tagata o Ieova le mafai ona faapotopoto faatasi i ni maota matagofie i tausaga taitasi ina ia maua ai aogā mai le polokalama felanulanuai faaleagaga ua sauniunia. Tatou te sapaitalia foi auaunaga e tele ma avanoa ua saunia i na faatasitasiga. Ma le matuā faaeteete lava faatasi ma se aofaiga tele o tupe ua faaalau e le Sosaiete, ua faia ai faatatauga ia lava ma totoe nofoa, faapipiina o mea faatelē leo taugata, se taualumaga sologa lelei e saunia ai mea taumafa, ma le taulimaina o isi mau faatatauga ma auaunaga ina ia olioli ai ma faafouina faaleagaga i le auai i le tauaofiaga.

³³ O ia tupe faaalu ua ufitia i lau foai tauofo e lagolagosua ai i le galuega a le Sosaiete i le lalolagi aoao. Ina ia faigofie mo oe, o le a faatutu solo pusa mo meaalofa ua manino ona faailoga i le maota o le tauaofiaga. E matuā talisapaia uma meaalofa, ma e fia faafetai mamao atu ai le Sosaiete mo lo outou limafoai ma le lagolagosua faatasi i faanaunauga o le Malo i lenei auala. Matou te mautinoa o le a uunaia tagata uma ia lagona lo latou avega tauave taitoatasi e faatatau i suiga ua tautalagia i inei ma o le a felagolagomai atoatoa e tofu sao ai i le mamao e faatagaina e o latou aiaiga.—Luka 6:38.

³⁴ AFIO MAI I LE TAUAOFIAGA ITUMALO “GAGANA MAMĀ”: I le auai i le Tauaofiaga Itumalo “Gagana Mamā” ma uaʻi totoʻa atu i le polokalama, o le a atili ai ona e talisapaia le pogai ua tuu mai ai e Ieova ia i tatou le gagana mamā ma aiseā e tatau ai pea ona tatou puipui faasaga i so o se aafiaga manatu faapito e mafai ona faauilavea ane i lo tatou autasi ma o tatou uso. Faia nei au fuafuaga ina ia auai mo le pese amata ma ia auai i vaega uma seia oo i le tatalo faaiʻu i le afiafi o le Aso Lua.

[Pusa i le itulau 6]

Faamanatu o le Tauaofiaga Itumalo

API: Mo i latou o ē manaomia ona faatulaga e le faalapotopotoga o le tauaofiaga ni nofoaga i Apia, ua matou taʻua manatu o loo mulimuli mai. Afai e leʻi logoina mai e la outou faapotopotoga le ofisa o faatatauga tau femalagaiga o le tauaofiaga ma mea manomia o nofoaga, e pei ona talosagaina i la latou tusi o Aokuso 2, 1990, matou te talosaga atu ia faia loa lava lenei mea e le failautusi. So o se tasi e manaomia se nofoaga i le faletalimalo e ao ona ese se lisi o o latou suafa ma ia lafo mai loa e le failautusi. Ua fai si utiuti o nofoaga o loo avanoa i le Faletalimalo o Tusitala i le US$55.00 i le potu, mo le po. Ua faatagaina e lē silia i le 4 tagata (e 3 tagata matutua ma le tamaitiiti e 1 e i lalo ifo o le 12 tausaga le matua) mo le potu e tasi. E ao ona aumai le US$55.00 e taofi ai potu taitasi. Afai e tumu atoatoa ona taofia lenei faletalimalo, atonu e fai si taugatā teisi o nofoaga i isi faletalimalo. O le a taumafai le faalapotopotoga o le tauaofiaga ia maua se tau e sili ona lelei mo oe. Afai e te iloa e tatau ona solofua lou nofoaga na taofi, e tatau ona e tusi pe telefoni mai foi i le ofisa o le tauaofiaga, e faia faapea i le vave e mafai ai a o mamao ina ia faaavanoa ai le potu mo se isi tagata.

NOFOA FAATAAVALE O PEPE: E ui ina lē taatele le faaaogāina o na mea i atumotu o le Pasefika i Saute, i le tele o vaipanoa e lē mafai ona faaaogāina ai nofoa faataavale o pepe (pushchair) i nofoaga o fonotaga i le lautele. E faasaina e tulafono tau tineimu le pakaina o na mea i polotito, i taulaiga o feoaiga, po o le va o laina o nofoa. Ona o le ono faapogaia e aofiaga tetele o tulaga feomaʻi, e mautinoa le mataʻutia o nofoa faataavale o pepe e lē gata i le pepe ae faapea foi i so o se tasi atonu e lavelavea ai. O lea faamolemole aua le aumaia i le nofoaga o le tauaofiaga. Peitai, e faataga nofoa pepe o taavale (car seats), ona e mafai ona tuu i nofoa e sosoo ma mātua. O le a sapaitalia lou felagolagomai i lenei mataupu.

PAPATISOGA: E ao i sui papatiso ona taumafai e iai i o latou nofoa i le vaega ua faailogaina a o leʻi amata le polokalama i le taeao o le Aso Gafua. E tatau i tagata taitoatasi ua fuafuaina e papatiso ona aumaia se ofu taele onomea ma se solo. A maeʻa le lauga o le papatisoga ma le tatalo a le failauga, o le a avatu e le taʻitaʻifono o lea vaega faatonuga pupuu i sui papatiso ona taloina lea mo le pese. E amata i le fuaiupu mulimuli, ona faasino e tautua sui papatiso i le itu e faatofu ai a o faauma e isi o le aofia ona usu le pese. Talu ai o le papatisoga o se faailoga o le tuuina atu o se tasi e patino ma o se mataupu totino i le va o le tagata ma Ieova, ua leai se sauniuniga mo le mea ua taʻua o papatisoga fai-paga lea e toalua pe sili atu foi sui papatiso e faauōuō pe uulima a o papatiso.

AUAUNAGA TAUOFO: E manaomia fesoasoani tauofo mo le sologa lelei o taualumaga o le tauaofiaga itumalo. E tusa foi pe mafai ona e galue mo na o se vaega o le tauaofiaga, e matuā talisapaia lau auaunaga. Afai e mafai ona e lagolagosua, faamolemole logo i le Matagaluega o Auaunaga Tauofo pe a e taunuu i le tauaofiaga. E mafai foi e fanau i lalo ifo o le 16 tausaga le matutua ona saosaolaumea mo le manuia o le tauaofiaga, ae manaomia ona latou galulue faatasi ma se matua po o se isi tagata matua na te vaaia.

PINE FATAFATA: Faamolemole ia laei mai pine fatafata ua fuafuaina faapitoa mo le tauaofiaga ma pe a malaga atu pe tuua foi le nofoaga o le tauaofiaga. E masani lava ona mafai ai ona tatou avatua se molimau lelei a o femalagaai. I le mataulia o oe o se sui usu fono e ala i se pine fatafata ua tusia manino o le a faafaigofie ai gaioiga o le faatatauga ua faafaigofieina mo le saunia o mea taumafa. E ao ona maua pine fatafata e ala i lau faapotopotoga, auā o le a lē maua i tauaofiaga.

O UPU LAPATAI: Po o fea lava e te paka ai, e ao ona loka lau taavale i taimi uma ma aua lava neʻi tuua ai se mea e iloa atu i totonu. Loka au mea totino i tua o lau taavale, pe a tatau ai. Ma ia leoleo foi i tagata gaoi ma ē seʻia mea mai taga, latou te tosina ane i faatasiga tumutumu faapenei. E aofia i lenei le lē tuua o ni mea tāua i luga o nofoa i tauaofiaga e aunoa ma le vaaia lelei. Faamolemole ia faaeteete.

Ua lipotia mai faapea i nisi faaletalimalo ua faigofie ona maua ai le avanoa mo ata i televise ua iai le amioleaga po o ata matagā foi. Ua faamatilatila e lenei mea le manaoga ia alofia le tuufau o tamaiti e matamata i le televise i nei fale e nonofo ai.