Taulimaina o le Tala Lelei—I le Molimau atu i Magaala
1 Ua faapea mai le Faataoto 1:20 (N.W.): “O loo alaga le poto i magaala; ua leo tele i malae.” Ua faapitoa ona moni o ia upu i aso nei a o talaʻi ma le maelega e auauna a Ieova le tala lelei o le Malo i so o se mea latou te maua i ai tagata. E pei o Iesu ma perofeta i tua atu o Kerisiano, o lo tatou alofa moni mo tagata ua uunaia ai i tatou e faaoo atu le upu moni i tagata uma, i so o se vaipanoa.—Iere. 11:6; Mare. 6:56; Luka 13:22, 26.
2 E ui o le aiga o se tagata e masani ona avea ma nofoaga e sili ona lelei e talanoa atu ai ia te ia e uiga i le upu moni, e lē toatele ni tagata e iai i aiga pe a tatou asiasi atu i lea fale ma lea fale. A iai foi tagata i aiga, e masani a o le tagata lava lena sa tatou talanoa muamua i ai e tali mai i le faitotoa, ae lē feiloai ma isi sui o le aiga. O lea, e ao ai ona iai se taimi patino o le molimau atu i magaala, i la tatou faiva. Atonu o le a e iloa o le molimau atu i magaala, e pei ona faamatalaina ai e se tasi paeonia, “o se oganuu tausaafia, faafouina, i lou vaipanoa.”
SE UIGA MAFANA MAUMAUAI
3 Aseā e te lē taumafai ai e molimau atu i magaala i le vaipanoa lava e tasi i se faavae faifai pea? Na taʻua e se tasi o tuafafine o lē na faia lenei mea faapea ua oo ina ia masani ma le toatele o faatauoloa ma isi tagata o ē masani ona uʻia “lona” magaala. Ua atiina ai se faiā lelei, lea ua tatalaina ai le ala mo le tele o talanoaga faale-Tusi Paia fuatele mai. Na faapea mai se paeonia lagolago o lē sa olioli atoatoa i le molimau atu i magaala e taumafai o ia e faalatalata atu i ē matamata i faamalama, tagata o loo nonofo ia latou taavale, tagata o loo faatali pasi, ma e oo foi ia i latou o ē na fai mai i taimi ua mavae e leai. E manaomia le lototele ma le filifili lelei ina ia tatou faamalosi ai ma faatauanau, ae aua lē soona faia.
4 O le ki ina ia uigā le molimau atu i magaala o le faafeiloaia mafana, tausaafia, ma naunau faamaoni. Faaali le laufofoga fiafia. Faatosina mai mata o le tagata pe a e mafai ai, ae afai e leai, faaauau loa ma faia se faafeiloaiga faaleuo. Matau le siosiomaga, ma faaaogāina i latou. Sa matauina e se tasi tuafafine ia fafine o loo iai ato fualaau aina ma faapea ane ai, “Ou te vaai atu e pei sa tou faatau meaʻai. E mautinoa le taugata o mea i aso nei. Ae ā ni nai meaʻai faalaeiau mo le mafaufau ma le loto? Sa ou olioli i lenei mataupu. . . .” Na ia faapea atu i se tasi e fai le fanau, “Ou te iloa ua iai lau fanau mananaia e toalua. E te silafia ua faapea mai le Tusi Paia o le fanau o se faamanuiaga mai le Atua? Lea, seʻi ou faailoa atu ia te oe. . . .” I le faalatalata atu i se tagata o loo mafaufau loloto, na ia taʻua ai, “Ou te vaai atu e pei o loo e mafaufau loloto e uiga i se mea. Ua faatumulia le lalolagi i faafitauli aso nei, pe te lē ioe ea iai? Faamata e te manatu o le a oo mai ea se taimi . . . ?”
5 Afai e faanatinati ona savali atu se tagata i le magaala, atonu e tau a o lou tuuina atu iai o se savali ma fai atu i ai, “Avatu sina tala lelei lea mo oe e faitau pe a iai sou taimi.” Afai e foliga mai e lē o nanati tele le ō a tagata, ofo i ai mekasini, ma faamatala i ai le faatatauga o foai. E lelei ona avatu o lomiga i lima o tagata i so o se taimi e mafai ai.
6 E toatele tagata talaʻi o ē sa meia muamua e uiga i le molimau atu i magaala ua manatu nei i ai o sa latou mea fiafia i le talaʻiga. O le mea moni, e tatau ona faatinoina le faaeteete pe a galueaina nofoaga matautia pe i taimi e lē saogalemu ai. E oo foi i taulaga laiti, e masani lava ona iai nofoaga pisi, taulaiga o femalagaiga i le lautele, po o mea e tutū ai taavale a le lautele lea e mafai ona faaoo atu ai i tagata le tala lelei. Puʻe le avanoa, ma faatasi ai ma le atamai faataga lou leo e alagaina le tala lelei i magaala ma malae faitele, ina ia manuia ai ē faalogologo ma ia faapaiaina ai Ieova.—Faata. 1:20.