Pe Mafai Ea ona E Paeonia Lagolago?

¹ Sa faalaeiauina e Iesu ona soʻo ina ia tuuina atu i latou lava ma le saoloto i le faiva, ma na ia faamautinoaina i latou faapea o le mulimuli i lenei auala o le a aumaia ai ia i latou le fiafiaga ma le tele o faamanuiaga faaleagaga. (Mata. 10:8e; Galu. 20:35) Ia Aperila ua tuanai atu, e tusa ma le 70 tagata taitoatasi i le oganuu atoa a le lala na muai tofo i le olioli o galuega faateleina o ni paeonia lagolago. Pe mafai ea ona e auai i nei faamanuiaga i lenei tausaga e ala i le avea o se paeonia lagolago a lē o Mati po o Aperila pe atonu foi o masina uma e lua?—Sala. 34:8.

² Iloiloina o Ou Aiaiga: A o e iloiloina mea tutupu ua sii mai lalo, fesili ifo ia te oe lava: ‘Pe o oʻu vaaia ea aʻu lava i so o se tasi o nei faaaʻoaʻoga? E mafai faapefea ona ou faia ni fetuutuunaiga manaomia e faapea ona tatalaina ai le ala mo aʻu e paeonia lagolago ai?’

³ Na mafai e se tasi o tuafafine ona paeonia lagolago e ui ina e iai lana fanau e toalima ma e faigaluega faasoloatoa. Sa faapefea ona tauia o ia? Na avatu e lana tane atoa ma le fanau se lagolagosua e sili ona lelei, ma o le iʻuga o le faaaʻoaʻoga lelei a le tuafafine, na uunaia ai le tane e avea ma tagata talaʻi e leʻi papatisoina i le masina na sosoo ai.

⁴ I se tasi o faapotopotoga, sa avea ai toeaina uma ma auauna o le faiva o ni paeonia lagolago i se masina e tasi. O le toatele o i latou sa iai ni galuega totogi, peitai sa matuā faatumuina i latou i galuega faaleagaga i faaiʻuga o vaiaso. O le taʻitaʻiga lelei sa latou saunia i le talaʻiga ma le faamaopoopoina o le auaunaga i le fanua sa manuia ai le faapotopotoga atoa. Mai le 77 o tagata talaʻi, e 73 sa auai i nisi o vaega o le auaunaga paeonia i lena masina.

⁵ Na faaaogā e se teine aʻoga e 15 ona tausaga lana lua vaiaso o le malōlōga e auai i le paeonia lagolago ma ua ia faapea mai: “Ua mafai moni lava ona ou vaaia le eseesega, ae maise lava se faaleleiga i talanoaga. Sa mafai ona ou faia atili le tele o talanoaga ma tagata i fale.”

⁶ Ua masani ona maua e i latou o ē ua malōlō mai galuega totogi, ni avanoa e sili ona lelei e tuliloaina ai manaoga o le Malo. Na tusi mai se tuafafine ua 84 tausaga o lona soifua, ina ua mavae le maliu o lana tane: “Ua matutua uma lava laʻu fanau ma ua faaipoipo ma fai aiga. Latou te leʻi tuulafoaia aʻu, peitai e lē mafai e a latou asiasiga mai ona foia ai faalogona o le leiloa ma le tuua toatasi. Ona fautuaina lea o aʻu e se tasi o toeaina i la matou faapotopotoga ou te taumafai e paeonia lagolago. Sa ou faatautū peitai mulimuli ane sa ou filifili e tofo i ai. Maeu le olioli! Sa ou lagona faapea na faatagaina aʻu e Ieova e oo i lenei matua ina ia mafai ai ona ou tofo i le paeonia lagolago. Ua faaauau pea ona avea aʻu o se paeonia lagolago i masina uma talu mai lena taimi.”

⁷ Na fetuutuunai e se uso o lē na te faatauina atu fale ma fanua, lana faasologa mo le faailoaina atu o fale ina ia mafai ai ona faaavanoa le taimi mo le auaunaga paeonia. Sa faapena foi ona fetuutuunai e isi a latou galuega totogi ina ia maua ai le avanoa mo sea galuega faateleina.

⁸ Faia Nei Au Fuafuaga: Aiseā e lē faia ai nei fuafuaga mautinoa e paeonia lagolago ia Mati ma Aperila? Ina ia taulau, e manaomia le fuafua ma le faaeteete. E faamaonia lenei itu mai mea na tutupu ia i latou o ē sa mafai ona paeonia lagolago e ui ina sa iai a latou avega tauave faaleaiga, o galuega totogi faasoloatoa, ma isi matafaioi faale-Tusi Paia. Ia talanoa ma isi o ē sa taulau ona paeonia ina ia maua ai aogā mai mea na tutupu ia i latou. Ia faalatalata atu foi ia Ieova i le tatalo, ma ole atu mo lana fesoasoani.—Isaia 40:29-31; Iako. 1:5.

⁹ E lē tau fesiligia, e tele le olioli o i latou o ē ua fuafuaina a latou meafai ina ia auauna ai o ni paeonia lagolago. Afai e te leʻi auai lava i le auaunaga faataimi atoa, pe mafai ea ona e olioli i lenei faaeaga? Afai e te faia se taumafaiga e faalautele atu ai lou faaeaga o le fetufaai o le tala lelei ma isi, e mautinoa o le a sasaa mai e Ieova i ou luga se faamanuiaga faaʻoaina.—Mala. 3:10.