Ia Mautinoa e Toe Asiasi Atu
1 I le avea o ni faifeau o le tala lelei, ua poloaia ai i tatou e faia soʻo. (Mata. 28:19, 20) O le faia o toe asiga o se vaega matuā tāua lea o la tatou galuega o le faia o soʻo. Tatou te talisapaia faapea o loo aafia ai ola, o lea tatou te mananao ai e faia taumafaiga uma ina ia atiina aʻe ai le naunau na muai faaalia.
2 E ao ona tatou manatu i tagata taitoatasi na tatou tuua ai lomiga o ni ē e tatau i ai se toe asiga. E ui i lea, o le tuua o lomiga, e lē tatau ona avea ma faavae autū mo le faia o se toe asiga. E toatele o loo naunau e talanoaina le feau a le Tusi Paia ae latou te teena lomiga. O lea, afai e matauina le naunau, e ao ona tatou faia mea uma e toe asiasi atu ai ma taumafai e atiina aʻe lea naunau.
3 Tuliloaina o Lomiga na Tuua: Talu ai e matuā tele mamao atu lomiga e tuua na i lo le aofaiga o toe asiga, o loo iai la se faamoemoega tele mo le faaleleia. Sa tuua e se paeonia se tusi, peitai na ia matauina sina naunau itiiti o lē ona le fale. I se tasi afiafi ina ua maeʻa ona faia uma isi ana toe asiga, na manatu ai le uso e asiasi atu i lenei tagata. Na amataina ai se suesuega faale-Tusi Paia.
4 Na tuua e se tasi uso ni mekasini se lua i se tamaloa, ae na galo o ia i le uso, i le manatu faapea sa lē naunau moni o ia. I nai aso mulimuli ane, na tusia ai e le tamaloa se tusi i le faapotopotoga i lena vaipanoa e talosaga atu ai mo le papatisoga. Sa fesiligia se tuafafine misionare po o le ā sona manatu i le mea sa sili ona matilatila na mafai ai ona ia fesoasoani i tagata e 74 ina ia avea ma tagata talaʻi. Na ia faapea mai: “Sa matou faia le tele o galuega mekasini, ma sa faaauau pea ona ou faia toe asiga i tagata o ē na taliaina mekasini seia oo ina ou mafaia ona amataina ni suesuega faale-Tusi Paia ma i latou.”
5 I nisi taimi atonu e na o se sāvali lava e mafai ona tatou tuua i lē ona le fale i le uluai asiasiga. E masani lava, ona mafai ona faaaogā ma le uigā sāvali i toe asiga e faataʻitaʻi ai se suesuega faale-Tusi Paia. Na tuua e se ovasia matagaluega, o lē na galulue ma se isi tagata talaʻi, se sāvali i se fafine. Sa matuā puupuu lava le asiasiga, peitai, na ia faalaeiauina le tuafafine e toe foi atu i ai. Na faia e le tuafafine le toe asiga ma na amata ai loa se suesuega faale-Tusi Paia.
6 Pe a Faaalia le Naunau: A lē tuua e lē ona le fale ni lomiga i le uluai asiasiga, o le a lē uiga ai pea faapea e lē naunau mai o ia. I le faia o se toe asiga i se ulugalii talavou, na iloa ai e se tagata talaʻi faapea ua uma ona ia i laua nisi o a tatou lomiga ma sa suesue muamua. Sa vave ona la ioe e toe faaauau le la suesuega. Na lagona e se paeonia faapitoa le naunau sa natia o se fafine o lē sa masani ona musu e talia mekasini. Sa faataatia ese e le paeonia mekasini, ma sa malie le fafine e talanoa i nai palakalafa i se tasi o tamai tusi. Ina ua mavae ni nai asiasiga, sa ia faia se suesuega faale-Tusi Paia e faalua i le vaiaso.
7 E ao i tagata taitoatasi ua tuuina atu ia lava ia Ieova ona lagona le avega tauave e auai i le galuega o le faia o soʻo. A o tatou asiasi atu e lē aunoa ia i latou uma o ē faaalia le naunau, o le a tatou seleseleina ai fua e faapea ona aumai ai faamanuiaga faaʻoaina e lē gata ia i tatou lava, ‘ae ia i latou o ē faalogo mai ia i tatou.’—1 Timo. 4:16.