Sauniuni Au Taulimaga mo Fepuari
1 Ia Fepuari, o le a tatou faatomuaina ai le tusi Manuia Moni, ae mo ē tautatala i le faa-Peretania, ia ofo i ai so o se tusi e 192 itulau na lomia i le 1983 po o tua atu po o le tusi Worldwide Security. E mafai ona faaaogā so o se tasi o ia lomiga matagofie e taulimaina ai le tala lelei i auala matalasi. E lē taumatea o le a e iloa le aogā o le aʻoaʻoina ma le faaaogāina o se taulimaga e tasi po o taulimaga uma ua fautuaina o loo mulimuli mai.
2 O le Lalolagi—Le Aiga e Faavavau o le Tagata: Afai e te manao e amata ni talanoaga ma tagata o ē manatu mamafa i le lalolagi ma lona siosiomaga, ia faaaogā le matua “E Tumau e Faavavau le Lalolagi o se Aiga o le Fanau a Tagata.” Ua lava le faigofie o lenei mataupu e puʻeina ai manatu o tagata osi aiga, o ē fiafia i le natura o mea, ma ē manatu mamafa i le siosiomaga. O le mau e faaaogā o le Failauga 1:4. O loo faamatalaina le matua ma le mau i le tusi Worldwide Security, itulau e 98-99, palakalafa e 2 ma le 3. Tagai foi i le itulau e 98, palakalafa 1 ma le 2 i le tusi Manuia Moni.
3 A uma ona faailoa atu oe, e mafai ona e faapea atu:
◼ “Ua ou asiasi puupuu mai e talatalanoa i se mataupu o loo matuā faapopoleina ai le toatele o i tatou. O loo avea le lalolagi ma o tatou aiga, ma e lē taumatea o loo e popole foi i le auala ua faaleagaina ai. Ua lapatai mai pea saienitisi ma ē e manatu mamafa i le siosiomaga faapea afai e faaauau pea ona faaoonaina, e ono iʻu ina tuufuaina ai le lalolagi. Pe o e iloaina ea se vaifofo i le faafitauli? [Faatali seʻi tali mai lē ona le fale, pe afai e manao ai.] Ou te fiafia e faailoa puupuu atu ia te oe le mea ua fai mai ai le Tusi Paia e uiga i le lumanai o le lalolagi i le Failauga 1:4.” Faitau le mau, ma faaali i ai faamatalaga o loo i le palakalafa e 2 ma le 3 i itulau e 98-99 o le tusi Worldwide Security. Tagai foi i itulau e 100-102, palakalafa e 8-11 i le tusi Manuia Moni.
4 E Tatau ona Aveese le Amioleaga: Ina ia tosina atu i tagata o ē o loo popole e uiga i solitulafono, faiga sauā, ma taua, atonu e te manao e talatalanoa ma i latou i le matua “E Tatau ona Aveesea le Amioleaga Ina ia Mafai ai e i Latou o Ē Alolofa i le Atua ona Olioli i le Olaga ma le Filemu.” Ua saunia lenei manatu i le Salamo 37:9-11, ma ua faamatalaina lea i le tusi Worldwide Security, itulau e 118-120, palakalafa e 13-15. Tagai foi i itulau e 39-40, palakalafa 9-13 i le tusi Manuia Moni.
5 A uma se faatomuaga masani, e mafai ona e faapea atu:
◼ “Pe e te manatu ea o le a oo mai se taimi tatou te lē toe fesagaʻi ai ma ni solitulafono ma faiga sauā? [Faatali mo se tali a lē ona le fale.] Ua faasino mai e le Tusi Paia le vaifofo e faavavau i inei i le Salamo 37:9-11.” Faitau le mau ma sue i itulau e 118-120 i le tusi Worldwide Security e faitau ni vaega ua filifilia o palakalafa e 13-15, pe otooto mai ni manatu i itulau e 43-44, palakalafa e 19-21 i le tusi Manuia Moni.
6 Le Faamoemoe o le Toetu: Talu ai i nisi taimi e lē iloa ai e tagata uma se tasi sa pele ona o le oti, e mafai la ona avea o se faamafanafanaga le amataina o talanoaga i le mataupu “Le Malo na te Toe Faafoisia le Ola i Ē Pele ua Maliliu i Lalo o Tulaga Parataiso.” E mafai ona e faaaogāina le Ioane 5:28, 29 po o le Luka 23:43 ma faailoa i ai faamatalaga i le mataupu ma le mau o loo maua i le tusi Worldwide Security, itulau e 166-167, palakalafa e 12 ma le 13. Tagai foi i itulau e 105-107, palakalafa e 20-23 i le tusi Manuia Moni.
7 E mafai ona amata lau talanoaga i le faatomuaga lona tolu i le itulau e 14 o le tusi “Reasoning” ona faapea atu lea:
◼ “Mai lea taimi i lea taimi, o le toatele o i tatou, e manatunatu ai pea i ē pele ua mavae atu i le oti. Ae pe e te manatu ea o le a tatou toe vaai ia i latou? [Tuu se avanoa i lē ona le fale e faaleo mai ai ia lava.] O le toatele o tagata matou te talanoa, e maofa ina ua aʻoaʻoina le mea ua folafola mai e le Afioga a le Atua ma o le a taunuu lava lenei faamoemoe i inei i le lalolagi. Matau le folafolaga a le Tusi Paia i le . . . ” Faaaogā le Ioane 5:28, 29 po o le Luka 23:43, ma faafesootai i faamatalaga o loo i palakalafa e 12 ma le 13 i itulau e 166-167 o le tusi Worldwide Security po o ata o loo i itulau e 164-165. Tagai foi i itulau e 105-107, palakalafa e 20-23 i le tusi Manuia Moni.
8 Ia sauniuni ma faaaogā se taulimaga e tasi po o na taulimaga uma i lenei masina. E lē tatau ona faigata le mauaina o ni manatu talafeagai ma ni ata i so o se lomiga e te faaaogāina. Afai e itiiti le naunau e faaalia, ia ofo i ai se sāvali e feagai ma le mataupu la te fesootai.