Amataina Suesuega Faale-Tusi Paia ia Tesema
1 Na poloaiina e Iesu ona soʻo ina ia avea ma faiaoga o le tala lelei. (Mata. 28:19, 20) O la tatou auala autū mo le aʻoaʻoina o isi, o le faia lea o suesuega faale-Tusi Paia. Po o e auai ea i lenei galuega? Afai e leai, e mafai faapefea la ona e amataina se suesuega, ina ia mafai ai ona e olioli i se sao ua faateleina i le aʻoaʻoina o isi?
2 Atonu sa tatou tuuina i lē ona le fale se sāvali ma folafola atu tatou te toe foi atu e talanoaina mataupu o loo iai.
Pe a toe asia lē ona le fale o lē sa tatou tuua ai le sāvali “Po o le a Faasaoina ea Lenei Lalolagi?” atonu tatou te faapea atu:
◼ “A o oʻu i inei i ni nai aso ua tuanai, sa ta talatalanoa ai i le luluti ua iai o tatou taimi, ma ua moni ai le faamatalaina e Iesu o tulaga ua tutupu i o tatou aso. Ou te fia faaaluina ni nai minute ta te manatunatu puupuu ai i nisi o faamatalaga mai le sāvali lea sa ou tuua ia te oe. Seʻi mātau foi le faamatalaga i lalo o le tamai ulutala lea ‘Le Faailoga.’” Suʻe i le itulau e 3 o le sāvali, ma talanoa i uluai palakalafa e lua pe tolu i lalo o lena tamai ulutala, ma faitau mau o loo sii mai pe a lava le taimi. Ia faamatilatila le auala ua faataunuuina ai i aso nei le valoaga a Iesu. Ia fuafua e toe foi atu ma talanoa i isi palakalafa i lalo o le tamai ulutala lava lenei. Ia faalaeiau i lē ona le fale e faitau le mataupu a o e leʻi toe asiasi atu i ai.
3 Pe e te fai atu foi se faamatalaga e pei o lenei:
◼ “I le ta talanoaga talu ai, na ou tuu ai ia te oe le sāvali ua faaulutalaina Po o le a Faasaoina ea Lenei Lalolagi? I lena taimi, sa ta talanoa ai i le matafaioi a Iesu Keriso i upufai a le lalolagi. Sa ta faitau i ana fetalaiga o loo tusia i le Tusi Paia i le Ioane 17:3. [Faitau.] Talu ai e manaomia tele lo tatou iloa o le Atua ma Iesu pe afai tatou te fia ola e faavavau, ua tatau ai la ona tatou faia le mea tatou te mafaia e maua ai lena poto. A o iai Iesu i le lalolagi, sa ia faaatagiaina le tele o uiga ofoofogia o le Atua. Pe ua lē talafeagai ea la ona talitonu faapea, o le tele o lo tatou iloaina o Iesu ma lana faiva, o le tele foi lena o lo tatou iloaina o lona Tamā? [Faatali mo se tali.] Seʻi mātau le faamatalaga a le tusi lenei, The Greatest Man Who Ever Lived.” Faitau palakalafa muamua ma le lua i le itulau e sefulu o le mataupu e 116. Ia faamamafa e faapea, o loo iai i lenei tusi faamatalaga uma o loo i tala Evagelia e fa e uiga ia Iesu, ma ua faatulaga mai foi nei mataupu i se faasologa e tusa o taimi na tutupu ai. Faasino atu ulutala patino o ni mataupu, ni ata, ma le faafanua o loo i le amataga o le tusi. Afai ua naunau moni lava le tagata, ona ofo loa lea o le lomiga.
4 Pe a uma ona faafeiloai atu i le tagata e ona le fale o lē sa taliaina le tusi “Greatest Man,” tatou te ono faapea atu:
◼ “E pei ona ou taʻua i laʻu asiasiga talu ai, o le tusi lea o le Greatest Man ua fuafuaina mo ni suesuega faale-Tusi Paia. Ou te fia faataitai puupuu atu le auala e sili ona aogā ai lona faaaogāina.” Suʻe le tusi i le mataupu 1, “Messages From Heaven” (“Feau Mai le Lagi”). Tatai manatu o lē ona le fale i fesili o loo iai. Faitau le fesili muamua, ona talanoa lea i palakalafa amata. Ia faafesootai atu i ai ma le ata o i le itulau e lua. Fai isi fesili o loo totoe, ma faamatilatila o latou tali pe a lava le taimi. A o leʻi faaiuina lau asiasiga, ia fuafua e te toe foi atu ma faaauau le talanoaga.
5 O le tausisia pea o se uiga mautinoa, i le sauniuni lelei, ma le faaaogāina tatau o avanoa uma, o le a lelei ai ona faaauupegaina i tatou e amataina se suesuega faale-Tusi Paia ia Tesema.