Faaaogā le Tusi Reasoning i Toe Asiga
1 Sa taʻua faapea e le aposetolo o Paulo: “Na ou totōina, na faasūsūina e Apolo.” (1 Kori. 3:6) Ua saunia i nei upu se auivi faigofie mo uluai laasaga e lua i le faia o soʻo. Ua masani ona faasino atu i le galuega o le faia o toe asiga o se galuega e “faasūsūina” ai. O se sootaga lea e manaomia i le va o le uluai fesootaiga ma le avea o se tagata ma soʻo papatisoina. O le galuega o le faia o toe asiga, e mafai ai ona tatou ‘faasalalau atu le poto’ e tausia ai le fatu o le naunau sa faaalia seia oo ina mauaa ma amata ai se suesuega faale-Tusi Paia.—Faata. 15:7.
2 Atonu e faatalalē nisi e toe asiasi atu i mea na faaalia ai le naunau ona o le lē mautinoa o se tala e fai atu. Ua faamaonia le aogā tele o la tatou tusi Reasoning From the Scriptures i le faia o lenei faasūsūina. E masani lava, a o leʻi ioe mai lē ona le fale i se faasologa faifai pea o se suesuega faale-Tusi Paia, e tatau ona faasolosolo ona asiasi puupuu i ai. Ua saunia e le tusi Reasoning ni auivi o mataupu faale-Tusi Paia, e mafai ona talanoa i ai ma lē ona le fale. Ia sauniuni lelei mo le toe asiga, i le faaaogāina o se faufautuaga e tasi pe sili atu foi o loo mulimuli mai:
3 Afai sa e tuua se kopi o “Le Olomatamata” o Aperila 15, 1992, i le mataupu e uiga i tatalo e pei ona maua i le “Ia Pipii Mau ia Ieova,” a e toe foi atu la, e mafai ona e lagā ai le fesili:
◼ “O le ā e lē mafai ai ona talileleia tatalo a se tagata ia Ieova?” A uma ona tuu le avanoa i lē ona le fale e tali mai ai, ona avane lea o lau tusi Reasoning ma suʻe i le itulau e 293. Talatalanoa ma ia i nisi o mau o loo i lalo o lena ulutala, ma faalaeiau ia te ia e faitau saʻo mai le tusi. Afai e te matauina le naunau faamaoni, ona e filifili loa lea e ofo i ai le tusiga.
4 I se isi toe asiga, a uma ona fesili atu i lē ona le fale po o le ā sona malamalama e uiga i le Malo o le Atua, e pei ona faasino mai i le Tatalo a le Alii, ia suʻe i itulau e 226-232. A lava le taimi, ia talatalanoa i mau o loo i lalo o le “Po o le Malo o le Atua o se Pulega Moni?” ma le “Po o le ā o le a Faataunuuina e le Malo o le Atua?” Faamalamalama le manatu sese o loo taatele faapea o le Malo o loo i le loto o se tasi. O le Malo o se pulega moni lava! Na i lo le talanoaina atoa o le mataupu i le taimi e tasi, ia lagā ni fesili e talanoa mulimuli i ai.
5 I se isi itu, atonu e talia e lē ona le fale se kopi o le Awake! o Aperila 22, 1992, e uiga i le “Olaga—O le ā Lona Fuafuaga?”
E mafai ona e fesili atu:
◼ “Po o iai ea se faamaoniga faapea sa fuafuaina le tino o le tagata ina ia ola e faavavau i le lalolagi?” pe “E te manatu ea o loo iloa e ē ua maliliu mea o loo faia e ē o loo ola?” O nei fesili, atonu o le a faagaee ai sina naunau o lē ona le fale ona o loo aafia totino ai o ia. Ia faia ni faatatauga e toe foi atu ma ni tali, e pei ona maua patino i itulau e 247 ma le 100 o le tusi Reasoning.
6 Afai sa faatatau le uluai talanoaga i le lumanai o le lalolagi, e mafai ona e fesili atu:
◼ “Po o le a faatagaina ea e le Atua tagata ina ia faaleagaina le lalolagi i nisi o auala?” Ona suʻe lea i itulau e 44-45 o le tusi Reasoning ma talanoa ai i le tali faale-Tusi Paia. Pe atonu e fesili mai lē ona le fale: “Afai e toe faatutūina mai le faitau miliona o ē ua maliliu, o fea la o le a latou nonofo uma ai?” E mafai ona maua le tali i le itulau e 340 o le tusi Reasoning.
7 Ia taumafai e aua le soona saputua i lē ona le fale upu moni uma i le taimi e tasi. Tuu nisi fesili e tali i toe asiga i le lumanai. I le avea ma aumea faigaluega a le Atua, tatou te mananao ai e tauaveina ma le tomai le totōina ma le faasūsūina e ala i le faaaogāina ma le uigā o le tusi Reasoning. E mafai ona tatou mautinoa o le a faatupuina e le Atua.