Ia Loto Atoa!
1 E anoanoai mafuaaga ua ia i tatou e ao ai ona tatou loto faafetai ia Ieova. E aofia ai mea na ia faia i aso ua mavae, mea o loo ia faia i le taimi nei, ma mea o le a ia faia mo i tatou i le lumanai. O le ā e ao i lo tatou loto faafetai ona uunaia ai i tatou e faia? Ua tali mai se salamo a Tavita e faapea: “Ou te faafetai ia Ieova i aso uma lava; e le aunoa ōna viiga i loʻu gutu.”—Sala. 34:1.
2 Ua faaalia manino i le Tusi Paia e faapea, ua poloaiina i tatou e talaʻi. O se galuega lenei tatou te faia ma le “loto [“atoa,” NW] e peiseai ua faia i le Alii [Ieova].” (Kolo. 3:23) O le ā le tele o le a tatou faia i le faiva pe afai moni lava tatou te loto atoa? Pe a tatou mafaufau i le alofa o Ieova mo i tatou, e mautinoa lava le uunaia o i tatou e o tatou loto e faia se sao atoatoa i le taʻuina atu i isi e uiga ia te ia ma ana fuafuaga tautele! Ua uunaia ai i tatou e faia le mea tatou te mafaia.
3 E talafeagai lelei ona faatalitalia e faapea, o se tagata e loto atoa, e manao e taulai atu pea lona mafaufau i le auaunaga paia. Na faalauiloa mai e le faisalamo, o lē e mautinoa sa iai se lagona faapena, i le faapea mai: “E taʻi foi faafitu i aso ona ou vivii atu ia te oe.” (Sala. 119:164) O i latou e iai lagona e pei o le faisalamo, ua saili e faaaogā lelei avanoa e vivii ai ia Ieova. Pe a talafeagai ma o latou tulaga, latou te auauna ai ma le maelega i le tele latou te mafaia.
4 E Tele Avanoa ua Tatou Maua e Vivii Atu ai ia Ieova: Tatou te lē tau faatali seiloga tatou te ō atu i le galuega mai lea fale i lea fale e talaʻi ai le tala lelei. E manaomia uma e tagata tatou te faigaluega faatasi, aʻooga faatasi, o tauaiga, ma ē masani, ona faalogo i le feau o le Malo. Pe a faimalaga, e mafai ona tatou amataina ni talanoaga e ono iu i le avatua ai o se molimau i tagata i faletalimalo, tagata faigaluega i faleʻaiga, o ē faigaluega i pamu penisini, po o ave taavale laʻu pasese. A o iai i le aiga, e mafai ona tatou molimau atu i tuaoi po o tagata e asiasi mai. Afai o faataotolia i tatou i le falemaʻi, o loo iai teine tausimaʻi, fomaʻi, ma isi tagata mamaʻi o ē e mafai ona tatou talaʻi lē fuafuaina i ai.
5 E Maua Iuga i le Talaʻi Lē Fuafuaina: E toalua ni Molimau sa sāvalivali i le paka i se tasi aso ma amataina ai se talanoaga ma se tamaloa talavou o lē sa sāvalivali foi o ia ma lona atalii. Mulimuli ane, na talia ai e ia ma lana avā le upu moni. Na faaalia mulimuli ane e le tamaloa talavou e faapea, i se taimi e lei mamao tele atu lava ae muai feiloai loa o ia i Molimau e toalua, sa ia tatalo atu ai i le Atua, ma talosaga atu i ai, ‘Afai o e soifua moni, faamolemole seʻi faailoa mai oe ia te au.’ Ua manatu o ia, o le feiloaiga lea na faia i le paka, o le tali mai lea a Ieova i lana tatalo.
6 O i latou o ē faanaunau ma le loto atoa e fesoasoani atu i isi, latou te maua le olioli tele i le itu faaleagaga. Ua latou iloa o auaunaga faapena “ma le loto atoa,” e faafiafiaina ai le finagalo o Ieova.—1 No. 28:9.