E Lei Iai Lava se Taimi na Sili ai Ona Tatou Lelei Faaleagaga e Pei o le Taimi Nei!

¹ O le toatele o tagata o loo moomoo mo le aso o le a mafai ai ona latou faapea ane, “E lei iai lava se taimi na sili ai ona tatou lelei e pei o le taimi nei!” I o latou mafaufau, o le a oo mai lena aso pe afai e matuā tele ni a latou mea faitino e maua, ma oo ai ia i latou se olaga ‘toafilemu, e na ona aai, inu, ma faafiafia ia i latou.’ (Luka 12:19) I se faaeseesega, i le taimi nei, o loo mafai ona tatou faapea atu i se uiga faaleagaga, e leai lava se mea lelei tatou te lē o maua. (Sala. 34:10) Ua mafai faapefea lena mea?

² Ua faalauiloa mai i le Faataoto 10:22 e faapea: “O le faamanuia a Ieova, o lea e faatamaoaiga aʻi.” O i tatou o ē ua tofo i lena finagalo malie tauatua, e mafai moni ona tatou faapea atu, o le Atua “o loo foai tele mai ia te i tatou mea uma lava e faafiafia ai.” (1 Timo. 6:17) I lenei, ua avea ai i tatou ma tagata sili ona mauoa i le lalolagi!

³ Iloaina o Faamanuiaga ua Tatou Maua: E toaitiiti i tatou e tele ni mea faitino o maua. Peitai, ua faamanuiaina i tatou ona tatou te lē o soona popole i mea o tatou manaomia i lea aso ma lea aso. Ua silafia e Ieova mea o tatou manaomia, ma ua ia folafola mai e na te foaiina mai ia mea. (Mata. 6:31-33) O lana faamautinoaga ua tatou maua ai le filemu o le mafaufau e matuā lē mafai ona faatauina.

⁴ Ae peitai, e matuā sili atu ona tele o tatou faamanuiaga faaleagaga. O o tatou ola e faalagolago i meaʻai faaleagaga mai ia Ieova. (Mata. 4:4) O i latou e vaavaai atu i puna faalelalolagi mo meaʻai faaleagaga, e matelaina i latou, a o i tatou, o loo tatou aai ma feinu ma malilie. (Isa. 65:13) O loo aumaia e le ‘auauna faamaoni’ ia i tatou le matuā tele o sauniuniga e mafai ona tatou maua ai le poto e taʻitaʻia ai i le ola e faavavau.—Mata. 24:45; Ioa. 17:3.

⁵ Ua saunia e lo tatou auuso pele i le lalolagi aoao se aufaatasiga faaleuso māfana o uso ma tuafāfine alolofa o loo nonofo i so o se vaega o le lalolagi. (Ioa. 13:35) O a tatou faapotopotoga, o se mapusaga mo le filemu, o iina e mafai ona tatou maua ai faamafanafanaga ma le faafouina. O loo mataalia pea toeaina i le leoleoina o i tatou, i le fesoasoani ia i tatou e faafetaiaia le tele o faafitauli eseese. (Epe. 13:17) O le māfana o la tatou faiā ma o tatou uso e iu ai i ni faalaeiauga, ma faamalosia ai i tatou ina ia finafinau.—Roma 1:11, 12.

⁶ O se faamanuiaga foi la tatou galuega. O le tele o galuega totogi e fiu ai ma e lē faamalieina ai le loto. O le talaʻiina atu o le tala lelei e maua ai e isi le olioli ma faafiafiaina ai i tatou. (Galu. 20:35) E mafai moni ona tatou vaaia le lelei i a tatou galuega fitā uma.—Fai. 2:24.

⁷ E sili atu i mea uma, ua tatou maua se faamoemoe ofoofogia mo le lumanai. (Roma 12:12) O loo tatou tulimataia se lalolagi fou lelei atoatoa o le amiotonu, o iina o le a tatou nonofo faatasi ai ma ē pele ia i tatou i le fiafia ma le filemu e faavavau! O lenei faamoemoe o se oloa tāua e sili ona tautele nai lo se isi lava mea ua ofo mai e lenei lalolagi.—1 Timo. 6:19.

⁸ E Mafai Faapefea Ona Faaalia lo Tatou Talisapaia? E matuā lē mafai ona tatou totogia Ieova mo mea ua ia faia mo i tatou. E na ona mafai lava ona faaali atu o lo tatou talisapaia e ala i le (1) faafetai ia te ia i aso uma ona o lona alofa tunoa (Efe. 5:20), (2) faaalia lo tatou alofa e ala i le usiusitai (1 Ioa. 5:3), (3) faapaiaina lona suafa e ala i le talaʻia o le tala lelei (Sala. 83:18), ma (4) lagolagoina le faapotopotoga Kerisiano e ala i la tatou lagolagosua ma le loto atoa.—1 Timo. 3:15.

⁹ Ua ia i tatou mafuaaga uma e avea ai o tagata e aupito sili ona fiafia i le lalolagi. (Sala. 144:15e) Tau ina ia faaatagia atu e o tatou uiga, a tatou amio, ma la tatou auaunaga, le olioli ua tatou lagonaina i lo tatou parataiso faaleagaga. E lei iai lava se taimi na sili ai ona tatou lelei e pei o le taimi nei!