Aʻoaʻoga i Aʻoga ma Ou Sini Faaleagaga

¹ O le mauaina o se aʻoaʻoga faavae lelei a o e laitiiti, e mafai ona saunia ai ni tomai faaleaʻoaʻoga e te manaomia ina ia e iloa lelei faitau ma tusitusi ma e maua ai se malamalamaga lautele i olaga o tagata ma le laueleele, talafaasolopito, faamatematika, ma le faasaienisi. A o faagasolo, e mafai ona e aʻoaʻoina ai le auala e mafaufau lelei ai, iloiloina mea moni, foia faafitauli, ma atiina ae manatu e maua ai le anoanoai o iuga lelei. O na ituaiga o aʻoaʻoga o le a tele sona aogā mo oe i le faagasologa o lou olaga. E mafai faapefea ona fesootai lau aʻoaʻoga ma ou sini faaleagaga i le olaga ma fesoasoani ia te oe e maua ai ‘⁠le poto aogā ma le tomai faalemafaufau’?—Faata. 3:21, 22.

² Ia Faaaogā i le Auaunaga a le Atua: A o e iai i le aʻoga, ia uaʻi atu i le vasega ma ia fai lelei au galuega na e ave e fai i le fale. Afai e te maua le tomai i le faitau lelei ma suesue, ona mafai lea ona sili atu ona faigofie lou suesueina o le Afioga a le Atua ma tumau ai ona e malosi faaleagaga. (Galu. 17:11) O le mauaina o le poto faavae o le a fesoasoani ina ia mafai ai ona e fesootai atu i tagata e eseese o latou talaaga, eseese mea e fiafia i ai, ma eseese talitonuga a o e feiloai atu ia i latou i le faiva. O le aʻoaʻoga o e mauaina i le aʻoga, o le a aogā a o faatinoina ou tiute tauave faa-Kerisiano i le faalapotopotoga a le Atua.—Faatusatusa i le 2 Timoteo 2:21; 4:11.

³ Aʻoaʻo Ina ia E Tausia Oe Lava: Afai e te filigā, ona mafai foi lea ona e aʻoaʻoina tomai e manaomia e maua ai se galuega e tausia ai oe pe a uma le faauuga. (Faatusatusa i le 1 Timoteo 5:8.) Filifili lelei au mataupu. Na i lo le taulai atu i se matātā e faatapulaa avanoa faigaluega, manatunatu e aʻoaʻo se galuega po o se tomai o le a mafai ai ona e maua se galuega talafeagai i so o se mea. (Faata. 22:29) O na aʻoaʻoga o le a mafai ai ona e tausia oe lava pe afai e te filifili e auauna i nofoaga e manaomia tele ai le fesoasoani.—Faatusatusa i le Galuega 18:1-4.

⁴ O le mauaina o se faavae lelei tauaʻoaʻoga a o aʻoga, e mafai ona fesoasoani ia te oe i le faalauteleina o lau faiva. Galue malosi ia maua ni tomai e manaomia ina ia e tausia ai oe a o e agaigai i luma i le auaunaga a Ieova. I lea tulaga, o le a fesoasoani ai lau aʻoga ia te oe e ausia ou sini faaleagaga.