Pe Mafai e Lou Alo Ona Filifili Faatagata Matua?
1. O le ā le tulaga o talavou Molimau e faatatau i le faaaogāina o le toto? Aumai se faaaʻoaʻoga.
1 O se filifiliga faatagata matua i le ā? I le tuigātoto. E pei ona faaalia i le mataupu “Savavali e Pei ona Aʻoaʻo mai e Ieova” i le lomiga o Le Olomatamata o Oketopa 15, 1991, e ao i tamaiti Molimau a Ieova ona faamanino ma faamautū lo latou faanaunauga e usitaia tulafono a le Atua e faatatau i le toto, o se mea e tāua iā i latou e pei foʻi ona tāua i o latou mātua. Pe manaʻomia foʻi lenā tulaga e lau tama lea e leʻi oo i le matua e fai ai ana lava filifiliga?
2. O le ā se faatulagaga faaletulafono sa faia e se tasi o faamasinoga i se teineitiiti na teena le faaaogāina o le tuigātoto, ma o le ā e aʻoaʻoina e mātua Kerisiano ma fanau iti mai lenei mea?
2 O le ā o Loo Taʻua i le Tulafono? I le Iunaite Setete, o le faamasinoga maualuga na faalēaogāina le aiā a se talavou e teena ai le tuigātoto, o le Faamasinoga Sili lea i Illinois. I le toe iloiloina o se faamasinoga o se tuafafine e 17 ona tausaga, na faatonu ai e le faamasinoga: “Afai e manino ma faamaonia faapea ua lava le matua o le teineitiiti e malamalama ai i āuga o ana gaoioiga [ma] faia ni filifiliga e pei o se tagata matua, ona talafeagai lea iā te ia le tulafono e talia ai pe teena togafitiga faafomaʻi.” O lona uiga, o le iloiloina po ua lava le matua o se tamaitiiti e faia ai ana lava filifiliga, e faatalanoa e fomaʻi ma tagata maualuluga o le soifua mālōlōina ia le tagata maʻi ina ia faalogo atu o faailoa mai lona lava teena o le tuigātoto. E manaʻomia ona malamalama le talavou i le ogaoga o lona tulaga maʻi o loo iai, ma āuga o lana filifiliga mo togafitiga ma ia manino ma mautū ona faamatala lona talitonuga faaletapuaʻiga e faatatau i le silasila a le Atua i le toto.
3. O ā fesili e ao ona mafaufau mamafa i ai mātua, ma aiseā?
3 O le ā le Tala o le a Fai Atu e Lou Alo? Po o mafai e ou alo ona faamatala lo latou tulaga e faatatau i lenei mataupu? Po o latou talitonu ma o latou loto atoa faapea, o le Atua e ana le faatonuga ia ‘faamamao ma le toto’? (Galu. 15:29; 21:25) Pe e mafai ona latou faamatala lo latou talitonuga mai le Tusi Paia? Pe e mafai ona latou tausisia ma le loto tele la latou filifiliga mautū e faatatau i le toto, pe a talitonu fomaʻi ua latou iai i se tulaga lamatia, e tusa lava pe lē o iai o latou mātua? Ona o le ‘tausaga ma le mea e tupu ai e oo iā te i tatou uma,’ e faapefea la ona e sauniunia ou alo mo se luʻi e tulaʻi faafuaseʻi i lo latou faamaoni?—Fai. 9:11; Efe. 6:4.
4, 5. (a) O le ā le tiute tauave a mātua, ma e faapefea ona latou faataunuuina? (e) O ā sauniuniga ua maua e fesoasoani ai i mātua?
4 Mātua e, o le ā o le a E Fai? Ua iā te oe le tiute tauave o le aʻoaʻo o lau fanau e faatatau i le silasila a le Atua i le toto. (2 Timo. 3:14, 15) O loo manino le faamatalaga i le tusi Reasoning, itulau e 70-74. Suʻesuʻe faalelei i ai ma lou aiga. I le faaaogāina o le vala o loo faapea mai “If Someone Says—” (A Faapea Mai se Tasi) i le itulau 74-76, ia faataʻitaʻi ma lau fanau ina ia fesoasoani ai e maua le poto masani e faamatala ai mea ua latou talitonu i ai ma le māfuaaga ua faia ai faapea. (1 Pete. 3:15) O isi fesoasoani e aʻoaʻoina ai i tatou i le mataupu e faatatau i le toto e aofia ai ma le polosiua Pe Mafai Faapefea e le Toto Ona Faasaoina Lou Ola? ma Le Olomatamata o Iuni 15, 2004, itulau 14-24. E lē gata i lea, o polokalame i vitiō Transfusion-Alternative Health Care—Meeting Patient Needs and Rights ma le No Blood—Medicine Meets the Challenge, ia o loo maua nei i le DVD e faaulutala faapea Transfusion Alternatives—Documentary Series, ua aumaia ai ni faamatalaga maufaatuatuaina e faatatau i le talafeagai ma le aogā o vailaau e lē o iai le toto faapea ma taotoga e lē faaaogā ai le toto. Pe na matamata ma talanoaina e lo outou aiga nei vitiō talu ai nei?
5 Fesoasoani i lau fanau e “suʻesuʻe pe se ā le finagalo o le Atua, o mea ua lelei, ma le mālie, ma le atoatoa” e tusa ai ma le toto. Ona latou faia lea o se filifiliga taʻumatuaina lea e iai le faamanuiaga a Ieova.—Roma 12:2.