Pusa Fesili
◼ O ai e tatau ona faatumuina kuponi ma talosaga i le Initaneti?
I a tatou lomiga, e masani ona iai kuponi e tatau ona faatumuina ma auina atu i le ofisa o le lālā e talosaga ai lomiga, po o se tasi o Molimau a Ieova e asiasi atu. E lē gata i lea, e mafai ona faaaogā lo tatou tuatusi i le Initaneti o le www.watchtower.org, e talosaga ai e tagata ni suʻesuʻega faale-Tusi Paia. Ua fesoasoani nei sauniuniga i le toʻatele o tagata e aʻoaʻo ai le upu moni. Ae peitaʻi, ua iʻu ai i ni faafitauli ina ua faaaogā sesē e tagata talaʻi nei meafaigaluega, e maua ai e o latou tauaiga ni lomiga pe asiasi atu ai foʻi se isi iā i latou, e aunoa ma le muaʻi faailoa atu i ai.
Ua faitio mai nisi na auina atu i ai e le ofisa o le lālā ni lomiga e aunoa ma lo latou iloa e faapea, ua faalavelave tele atu la tatou faalapotopotoga, ma ua iai o latou igoa i se lisi e auina atu ai e lē aunoa ni meli. O tagata talaʻi ua maua se faatonuga e asiasi atu i se tasi e na te leʻi talosagaina se asiasiga, e lagona le lē fiafia pe a faaali mai e le tagata o loo asiasi atu i ai ni uiga lē talafeagai. O le mea lea, o talosaga e faia i le Initaneti pe ala mai i kuponi, e tatau ona aumai saʻo e tagata fiafia, ae lē o tagata talaʻi o loo mananaʻo ina ia asiasi pe lafo atu ni lomiga i ni uō ma tauaiga. E lē faaaogāina nei talosaga pe a iloa o loo faia e tagata talaʻi mo o latou tauaiga, po o se isi foʻi.
E faapefea la ona tatou fesoasoani faaleagaga i o tatou tauaiga ma uō? Afai e te manaʻo ina ia maua e ou tauaiga ma au uō ni lomiga, aiseā e lē lafo saʻo ai e oe o se meaalofa? Afai e faaalia le fiafia ma manaʻo e asiasi atu se Molimau, ae e te lē iloa ona faafesootaʻi se toeaina i le faapotopotoga, e tatau ona faaaogā le pepa Please Follow Up (S-43) ma tuuina atu i le failautusi o la outou faapotopotoga, o ia e iloiloina ma auina atu i le ofisa o le lālā. Ae peitaʻi, afai o le tagata fiafia o loo i le falepuipui, nofoaga e tausia ai tagata o loo faileagaina, po o le falemaʻi, aua e te faafesootaʻia le ofisa o le lālā mo ia. Ae e mafai ona e faalaeiau o ia e faafesootaʻi uso o loo asiasi atu i lenei nofoaga, pe tusi atu sana tusi i le ofisa o le lālā.