Tala o Mea na Tutupu Mai i le Tusi Tausaga 2011

PAPUA NIU KINI

Itulau 153, palakalafa 1

Na folafola atu e le pulega faaitumalo i lotu uma na faaleagaina a latou meatotino ina ua pa se mauga mū, o le a faamatuu atu i ai ni fanua i le taulaga o Kokopo, e tusa ma le 15 maila [24 km] mai i Rabaul. Peitaʻi, na maua e lotu uma ni fanua, seʻi vaganā ai Molimau. Ma ina ua mavae le fitu tausaga talu ona pa lenei mauga mū, ae taunuu ane loa se uso mai i Aferika e galue i le matagaluega e fuafuaina taulaga. Na mātauina e le uso le lē saʻo o le auala na faasoa ai nei fanua, o lea na ia iloa se fanua talafeagai i Kokopo ma fesoasoani loa i uso Molimau, i le saunia o la latou talosaga lea na talia. Na taunuu ane se ʻaufaufale tauofo ma fesoasoani e fausia le Maota mo Sauniga ma le fale o misionare. O le mea moni, o le lē saʻo o le auala na tufaina atu ai nei fanua na iʻu ai i se faamanuiaga mo o tatou uso. O le ā le uiga o lenā mea? O fanua na muaʻi foaʻi atu i lotu, e tutū i autafa o mauga. Ae o le fanua na tuuina atu i uso, e tū i le ogatotonu o le taulaga ma e sili ona lelei.

ESTONIA

Itulau 179, palakalafa 1-2

AO POGISA I LE TAFATAFĀILAGI

I le taulotoaʻiga o vaitausaga o le 1930, o ni taimi fesouaʻiina ma faigatā, talu ai omiga mai i le ʻau Nasi i Siamani ma le lotu Katoliko. Iā Ianuari 1935, na aveesea faamalosi ai le tamaʻi tusi, Righteous Ruler.

I le tausaga lava lea, na tapunia ai e le Minisita o le Lotoifale le Sosaiete o le Olomatamata i Estonia, ma aveesea faamalosi uma ai tusi, ma taofia uma o latou fanua ma meatotino. E ui e tele tusi sa nānā lilo, ae e tusa e 76,000 ni tusi na aveesea faamalosi. E leʻi taofia e lenei mea na tupu le galuega. Na teteʻi ma olioli uso, talu ai e lua ni polosiua na aveesea faamalosi, ae sa faasalalauina i nusipepa lauiloa a le atunuu mataupu o loo tusia ai, ma e tusa ma le 100,000 le aofaʻi o nusipepa e lomia i lomiga taʻitasi. E ui e tele lomiga ma tusi ua leiloloa, ae ua sili atu le faalauiloaina o le suafa o Ieova i lenei mea na tupu, nai lo o taumafaiga a uso e tufatufaina atu nei polosiua.

Itulau 203, palakalafa e 2 e oo i le itulau 204, palakalafa e 7

Ō ATU I OGANUU FOU—AE TOTOGI E LE MALO!

I ni tausaga muamua atu, na faapea mai William Dey, afai e pulea e Rusia atunuu o le Baltic, o le a tele ni oganuu e talaʻi ai. Maʻeu le moni o na upu! Na fesoasoani le malo o Rusia i Molimau a Ieova e faalautele atu ai la latou galuega talaʻi i Siberia ma isi nofoaga mamao, i le auina atu faapagota o i latou i na atunuu. E ui ina sa faataga e Ieova ana molimau ina ia tofotofoina, ae na maua ai e le toʻatele e leʻi faalogo muamua i le suafa o le Atua, le avanoa e aʻoaʻo ai le upu moni.

O se faaaʻoaʻoga, o Lembit Trell na puʻea faapagota ona o ni gaoioiga na faia e faasaga i le malo. E ese le auala na ia faalogo ai i le upu moni i le 1948—i se sela i le falepuipui i Tartu. O se alii ofisa o le vaegaʻau a Rusia na taofia faatasi ma Lembit, na faamatala atu iā te ia e uiga i Molimau na latou feiloaʻi i se isi sela o le falepuipui. Na faamatala puupuu atu e le alii ofisa iā Lembit e uiga i aʻoaʻoga a Molimau. Sa ia faamatala atu ua na o le Malo o le Atua le vaifofō, ma e lē o toe umi ona pulea lea e le Atua le lalolagi atoa. O i inā na faatupuina ai le fiafia o Lembit.

Na mulimuli ane auina atu Lembit i le falepuipui i le itu mamao i mātū o Siberia, e latalata i le Vasa Atika. O i inā sa ia faalogo ai i se vaega o Molimau o talanoa e uiga i le Tusi Paia. Ina ua latalata atu o ia, na ia iloa ai, o loo latou talanoa e uiga i mea lava ia na faalogo ai mai i le alii ofisa, ma sa ia auai atu loa i la latou talanoaga.

Ua fesili atu uso iā Lembit, “Aiseā ua e falepuipui ai?”

Na tali mai o ia, “Sa ou tau mo le mea tonu.”

Na toe fesili atu se tasi Molimau, “Pe na faamanuiaina au taumafaiga?”

E manino lava le tali, ae na tali atu Lembit, “E leai e leʻi manuia.”

Ona faapea atu lea o se uso iā Lembit, “Vaai! e sesē le itu lenā e te tau ai.” “Pe e te manaʻo e tau i le itu taua saʻo?” Ona amata lea ona latou faamatala atu iā te ia mea o loo fai mai ai le Tusi Paia e uiga i le taua faaleagaga. O le tele o mea na faalogo ai Lembit, o le tele foʻi lenā o lona iloa ua ia maua le upu moni, ma o le tele foʻi lenā o lona iloa e tatau ona auai i le itu taua a Ieova i le taua faaleagaga.

Ina ua magalo Lembit, na toe foʻi atu o ia i Estonia ma amata ona auai i le taua faaleagaga. O lea, ua auauna nei o ia o se paeonia sauatoa. E faapena foʻi le auala na maua ai e lana avā o Maimu le upu moni; na amata ona fiafia o ia ina ua faalogo a o iai i le falepuipui, i se tagata e lē o se Molimau.

Sa faigatā le galuega talaʻi mo uso e lē tele so latou iloa o le gagana Rusia. E ui e lē tele so latou iloa, ae na faigofie ona amata se talanoaga e ala i le talanoaina o māfuaaga na ave faapagota ai i latou i Siberia. O le auala lenei na fesoasoani i uso e talaʻi lē fuafuaina ai. E lē gata i lea, ua maua ai se avanoa e molimau atu ai i pagota Estonia i la latou lava gagana. Na faapea mai se tasi na sao mai i nei nofoaga, e tusa ma le 15 i le 20 tagata Estonia na mauaina le upu moni i na nofoaga, e faapena foʻi i le toʻatele o tagata Rusia ma Lithuanians.