Ia Fesoasoani i Lau Paga
1. E faapefea ona tatou faataʻitaʻi i le aposetolo o Paulo pe a galulue faatasi ma se isi tagata talaʻi?
1 Na manatu le aposetolo o Paulo i taimi o loo ia faaaluina ma uso talitonu, o ni avanoa e “fefaalaeiauaʻi ai i le faatuatua.” (Roma 1:12) Pe a lua galulue faatasi ma se isi tagata talaʻi i le talaʻiga, pe e te faaaogā tatau lenā taimi e faalaeiau ma fesoasoani ai iā te ia? Nai lo o le leai o se tala e fai atu i lau paga, aiseā e te lē taʻu atu ai iā te ia auala na fesoasoani iā te oe e avea ai o se tagata talaʻi e uigā le aʻoaʻo atu?
2. E faapefea ona tatou faamalosia le lagona mautinoa o i latou e tatou te galulue faatasi i le talaʻiga, ma aiseā e tāua ai?
2 Ia Atiaʻe le Lagona Mautinoa: O nisi o tagata talaʻi e atagia mai i le auala e latou te tautatala ai, po o o latou foliga vaaia lo latou lē mautinoa. Peitaʻi, o le avatu o se faamālō e mafai ona faamalosia ai i latou. O ā nisi auala e mafai ona tatou atiaʻe ai le lagona mautinoa? E masani ona faamatala e se tasi o ovasia femalagaaʻi i lana paga ona popolega, faapea le auala e fesoasoani ai ana tatalo e aveesea ai nei lagona. Na faamatala mai e se uso le auala na fesoasoani iā te ia e faaalia ai le lagona mautinoa: ʻE amata i sina ʻataʻata. E ono manatu i lenei gaoioiga e faatauvaa, ae e iai taimi e manaʻomia ai ona ou tatalo mo le fesoasoani ina ia mafai ai ona faia faapea.’ O le ā na fesoasoani iā te oe ina ia atiaʻe ai le lagona mautinoa i le talaʻiga? Faamatala atu lenā auala i lau paga i le galuega talaʻi.
3. O ā ni manatu e mafai ona e faailoa atu i lau paga, lea atonu e fesoasoani iā te ia ina ia uigā ai lana faiva?
3 Faamatala Atu Metotia: Pe na e faaaogāina se faatomuaga faigofie, atonu o se mea na tupu i la outou vaipanoa na mafai ona amataina ai se talanoaga? Pe na e faaaogāina se taulimaga na e faaupuina i au lava upu, ma maua ai ni iʻuga lelei? Faamatala atu na manatu i lau paga. (Faata. 27:17) A o agaʻi atu e faia se toe asiga, ia faamatala atu i lau paga le mea o loo e taumafai e ausia, faapea le auala e faia ai. Pe a māeʻa se suʻesuʻega faale-Tusi Paia, e mafai ona e faamatalaina atu le māfuaaga na e filifili ai e faaaogā se manatu patino, o se mau, po o se auala foʻi e aʻoaʻo atu ai ina ia iloa le manaʻoga o le tagata suʻesuʻe.
4. Aiseā e tāua ai ona tatou fesoasoani i o tatou uso talitonu?
4 Sa faatāua e Kerisiano i le uluaʻi senituri le fefaalaeiauaʻi ma le faamalosia e le tasi o le isi, nai lo o le tau ina fesoasoani iā i latou e lē talitonu. (Galu. 11:23; 15:32) E lē gata na aʻoaʻoina e le aposetolo o Paulo le talavou o Timoteo, ae na ia faalaeiauina foʻi o ia e faailoa atu i isi mea na ia aʻoaʻoina. (2 Timo. 2:2) Aua neʻi galo iā i tatou ona faia mea lelei i isi o tatou uso Kerisiano, a o auai i le galuega talaʻi. O le faia faapea, e lē gata e faateleina ai lo latou olioli ma uigā ai la latou faiva, ae o le a faafiafiaina ai foʻi lo tatou Tamā i le lagi.—Epe. 13:15, 16.