Faaaʻoaʻo i le Faamaulalo o Ieova

1. Aiseā e mataʻina ai le faamaulalo o Ieova?

PE A e mafaufau i taʻitaʻi po o pule o malo, pe e te manatu iā i latou o ni ē e lotomaulalo? Atonu e leai. Peitaʻi, pe a e mafaufau iā Ieova, e ui o ia o lē e ona le malosi uma lava, ae e faamaulalo o ia. (Sala. 113:​5-8) O so o se mea e faia e Ieova, e atagia mai ai lona faamaulalo. E oo lava i sina uiga faasausili, e lē taitai ona ia faaalia. O le a talanoaina i lenei suʻesuʻega auala e fā e feutagaʻi ai Ieova ma i tatou, ma pe e faapefea i na auala ona faamatilatila mai ai lona faamaulalo. O le a talanoaina foʻi le auala na faaaʻoaʻo ai Iesu i le faamaulalo o lona Tamā. O le iloiloina o nei vaega e fesoasoani e tatou te vavalalata atu ai iā Ieova, ma atili ai ona tatou faaalia le lotomaulalo.

E FAIGOFIE ONA FAALATALATA IĀ IEOVA

2. O le ā ua tatou iloa mai e faatatau iā Ieova i le Salamo 62:8? (Tagaʻi foʻi i le ata.)

² O tagata faamaualuluga, e lē faigofie ona talanoa i ai isi. E ʻalofia e tagata ona o le auala lē agalelei e feutagaʻi ai ma i latou, ma e manatu foʻi e sili atu i latou nai lo o isi. Peitaʻi, e matuā ese mai lava Ieova. Talu ai o Ia o se Atua e faamaulalo, e na te valaaulia tagata e faalatalata atu iā te ia ma sasaa atu o latou popolega ma faalogona moni. (Faitau le Salamo 62:8.) E pei lava ona naunau se tamā alofa e iloa popolega o lana fanau ma o latou faalogona moni, e matuā naunau foʻi Ieova e faafofoga mai i a tatou tatalo. O le mea moni, e tele tatalo o loo taʻua i le Tusi Paia ma e faamaonia ai le faigofie ona talanoa atu o tagata iā Ieova. (Iosua 10:​12-14; 1 Samu. 1:​10-18) Peitaʻi, e iai taimi e tatou te lagona ai le lē aogā ona o ni mea sesē na tatou faia, ma faigatā ai ona tatalo atu iā Ieova. Faamata e mafai pea ona tatou faalatalata atu iā te ia?

3. E faapefea ona tatou iloa e naunau Ieova ina ia tatou faalatalata atu pea iā te ia e ala i le tatalo, e tusa pe e tatou te manatu e lē tatau iā i tatou lona alofa?

³ E tusa pe e tatou te manatu e lē tatau iā i tatou le alofa o Ieova, ae e mafai lava ona tatou faalatalata atu iā te ia e ala i le tatalo. E tatou te iloa le moni o lenā manatu, i le talafaatusa a Iesu i le atalii faamaumauʻoa lea na ia faatusaina ai Ieova i le tamā alofa. Ina ua salamō le atalii, na oo iā te ia faalogona ua leai sona aogā ma manatu ailoga e toe talia o ia e lona tamā. Peitaʻi, na taʻua e Iesu o le taimi lava na iloa atu ai o ia e lona tamā, na “tamoʻe atu ma fusi o ia, ma sogi lemū atu iā te ia.” (Luka 15:​17-20) E pei Ieova o lenā tamā alofa. O le taimi lava e faafofoga mai ai Ieova i tatalo a ē ua lotonutimomoia ona o faalogona nofosala po ua lofitūina i popolega, e faamaulalo o ia e uaʻi atoatoa mai iā i latou. (Aue. 3:​19, 20) O lona tigā alofa, e uunaʻia ai o ia e saunia faamāfanafanaga ma faamautinoa mai iā i latou lona alofa mutimutivale. (Isa. 57:15) O le ā le auala e pei ai Ieova o le tamā i le talafaatusa, e peiseaʻī e “tamoʻe mai” e saunia le fesoasoani mo i tatou? E faaaogā e Ieova toeaina, o tatou aiga talitonu, po o uso ma tuafāfine e fesoasoani iā i tatou. (Iako. 5:​14, 15) E naunau Ieova e faia faapea, ona e finagalo ia tatou faalatalata atu iā te ia.

4. Aiseā na faigofie ai i tagata ona faalatalata pe talanoa atu iā Iesu?

⁴ E faaaʻoaʻo Iesu i lona Tamā. E lotomaulalo pe e faamaulalo Iesu e pei o lona Tamā. O le māfuaaga lea na faigofie ai i tagata ona faalatalata atu iā te ia, ma saʻoloto e fai atu so o se fesili iā te ia. (Mare. 4:​10, 11) Pe a tāpā foʻi e Iesu ni o latou manatu e faatatau i se mataupu, sa faigofie ona faailoa atu o latou faalogona moni. (Mata. 16:​13-16) Talu ai na latou iloa e agalelei, alofa mutimutivale ma onosaʻi Iesu, e latou te leʻi fāʻatu la ina neʻi lē fiafia Iesu pe a latou faia ni mea sesē. (Mata. 17:​24-27) O le faaaʻoaʻo atoatoa o Iesu i lona Tamā, na atili ai ona malamalama ona soo i mea e faatatau iā Ieova. (Ioa. 14:9) Na latou iloa ai e lē pei Ieova o taʻitaʻi lotu i lenā vaitaimi, o ē e faamaualuluga, sauā ma e lē alolofa. Nai lo o lea, o ia o se Atua e faamaulalo ma e faigofie ona faalatalata i ai.

5. E faapefea i le lotomaulalo ona fesoasoani e faigofie ona talanoa mai ai isi iā i tatou?

⁵ E faapefea ona tatou faaaʻoaʻo iā Ieova? O le atiaʻe o le lotomaulalo, e faigofie ai ona talanoa mai tagata iā i tatou. E tatou te faaalia ai foʻi uiga e pei o le agalelei, onosaʻi, ma le lotofaamagalo, ma iʻu ai ina fia faauō mai isi iā i tatou. Ae pe a tatou lē lotomaulalo, o le a tatou aafia i le lotoleaga, manatu e sili atu i tatou i isi, ma lē lotofaamagalo. O na uiga e ʻalofia ai i tatou e tagata. (Kolo. 3:​12-14) E ao i toeaina ona faamautinoa o loo saʻoloto le faapotopotoga e talanoa atu iā i latou. Ina ia faia faapea, e ao ona latou iai faatasi ma uso ma tuafāfine i le tele e mafai ai. E manaʻomia ai la ona latou auai i sauniga i le Maota mo Sauniga, nai lo o le faaaogā o le zoom e aunoa ma se māfuaaga talafeagai. Pe a mafai, ia galulue faatasi ma le faapotopotoga i le talaʻiga mai i lea fale i lea fale. O le faia faapea, o le a masani lelei ai le faapotopotoga i toeaina, ma faigofie ai ona latou sulufaʻi atu i toeaina mo se fesoasoani.

E MAGAFAGAFA MA FETUUTUUNAʻI IEOVA

6-7. O ā ni faataʻitaʻiga e iloa ai na lolo atu Ieova i talosaga a ana auauna?

⁶ O tagata faamaualuluga, e lē fetuutuunaʻi i a latou feutagaʻiga ma isi. Ae e lē faapena Ieova! Talu ai o ia o le Silisili Ese i le aoao o mea, e sili atu la lona silafia nai lo o i tatou. Peitaʻi, o lona faamaulalo, e fetuutuunaʻi ma lolo atu ai i manatu o isi. Ia mātau le auala na feutagaʻi ai Ieova ma Miriama. Na faitio Miriama ma Arona iā Mose, ma e tusa lenā ua lē faaaloalo Miriama iā Ieova, auā na fai Mose ma sui o Ieova. O lea, na matuā toʻasā Ieova iā Miriama ma taia ai o ia i le lepela. Na ʻaiʻoi atu Arona iā Mose e fesoasoani i lo la tuafafine, ma na alaga atu Mose iā Ieova e faamālōlō iā te ia. O le ā le tali mai a Ieova? E leʻi maumaututū o Ia i lana faaiʻuga, ae na faamaulalo ma lolo atu i le talosaga a Mose e ala i le faamālōlōina o Miriama.—Nu. 12:​1-15.

⁷ Na faaalia foʻi e Ieova le faamaulalo ina ua feutagaʻi ma le tupu o Esekia. Na faaaogā e Ieova le perofeta o Isaia ina ia faailoa atu iā Esekia o le a oti o ia. Peitaʻi, na tagi masūsū Esekia ma ʻaiʻoi atu iā Ieova ina ia faamālōlō o ia. Na faafofoga mai Ieova i le talosaga a Esekia, ma faaopoopo isi tausaga e 15 o lona ola. (2 Tu. 20:​1, 5, 6) E manino mai, o le faamaulalo o Ieova e na te faaalia ai le tigā alofa ma lotomalie e lolo atu i manatu o isi.

8. E faapefea ona iloa le fetuutuunaʻi ma le magafagafa o Iesu? (Mareko 3:​1-6)

⁸ E faaaʻoaʻo Iesu i lona Tamā. A o iai Iesu i le lalolagi, na ia faaalia le fetuutuunaʻi ma le magafagafa, e ala i le fesoasoani i isi ma faia galuega lelei mo i latou, nai lo o le maumauaʻi i le tausia o le Tulafono. O se faataʻitaʻiga, na ia faamālōlōina tagata i le Sapati e ui lava i teteega mai i taʻitaʻi lotu sauā. (Faitau le Mareko 3:​1-6.) I aso nei, o loo faaauau ona faaalia e Iesu le magafagafa, i le auala e taʻitaʻia ai le faapotopotoga. O se faataʻitaʻiga, pe a faia e se tasi se agasala matuiā, e onosaʻi o ia ma tuu le avanoa i le tagata e faia ai suiga manaʻomia.—Faaa. 2:​2-5.

9. E faapefea ona tatou faaalia le magafagafa i le auala e tatou te mafaufau ma gaoioi ai? (Tagaʻi foʻi i ata.)

⁹ E faapefea ona tatou faaaʻoaʻo iā Ieova? E ao ona tatou taumafai malosi e faaaʻoaʻo i le magafagafa o Ieova, i le auala e tatou te mafaufau ma gaoioi ai. (Iako. 3:17) O se faataʻitaʻiga, o mātua e magafagafa, e la te lē faatalitalia le la fanau e faia ni mea e latou te lē mafaia. I le Kenese 33:​12-14, o loo faamatala ai le faaaʻoaʻoga lelei a Iakopo o le faia faapea. O le magafagafa foʻi o mātua, e la te lē faatusatusa ai le la fanau, po o mea e mafai ona faia e le isi tamaitiiti mai i le isi tamaitiiti. E ao foʻi i toeaina o le faapotopotoga ona faaalia le magafagafa. O se tasi o auala e faia ai faapea, o le lotomalie lea e lolo atu i se faaiʻuga ua malilie i ai le toʻatele o isi toeaina, pe afai e lē o solia ai se mataupu silisili. (1 Timo. 3:​2, 3) E ao iā i tatou uma ona taumafai e malamalama i manatu o isi, pe a eseese o tatou manatu i se mataupu. (Roma 14:1) O lona uiga la, e ao i sui taʻitoʻatasi o le faapotopotoga ona faia taumafaiga malolosi, ina “ia iloa e tagata uma lo [latou] magafagafa.”—Fili. 4:5.

E ONOSAʻI IEOVA

10. O ā nisi o faaaʻoaʻoga o le faaalia e Ieova o le onosaʻi?

¹⁰ O tagata e faamaualuluga, e lē iloa onosaʻi pe vave foʻi ona lē fiafia pe a umi ona faatali i se mea. E matuā tuufaafeagai lava ma Ieova, o lē e tumu i le onosaʻi! O se faataʻitaʻiga, i aso o Noa, na fetalai ai Ieova o le a Ia faatali mo le 120 tausaga ona faaoo mai lea o le faaumatiaga o tagata amioleaga. O lona uiga, na telē le taimi na maua e Noa e tausia aʻe ai lana fanau, ma latou fauina faatasi ai le vaa. (Kene. 6:3) I se taimi mulimuli ane, na faaalia ai foʻi e Ieova le onosaʻi e ala i le faalogologo atu i fesili a Aperaamo i le faaumatiaga o Sotoma ma Komoro. Pe ana faapea o sē e faamaualuga na feutagaʻi ma Aperaamo, semanū e faapea atu: ʻO ai oe e te fesiligia ai aʻu?’ Peitaʻi, o le faamaulalo o Ieova na ia onosaʻi ai iā Aperaamo.—Kene. 18:​20-33.

11. E tusa ai o le 2 Peteru 3:​9, aiseā e faaalia ai pea e Ieova le onosaʻi i aso nei?

¹¹ O loo faaauau ona faaalia e Ieova le onosaʻi e oo mai i aso nei. O se faataʻitaʻiga, o loo faatalitali pea o ia ma le onosaʻi i lana taimi atofaina e faaoo mai ai le iʻuga. Aiseā? “E lē finagalo o ia e faaumatia se tasi, ae e finagalo ia oo uma lava i le salamō.” (Faitau le 2 Peteru 3:9.) Po o iʻuvale le onosaʻi o Ieova? E leai! O lona onosaʻi, ua mafai ai e le faitau miliona o tagata ua saunia o latou loto, ona maua se faiā lelei ma ia. E faamoemoe o le a toʻatele pea nisi e faia faapea. Peitaʻi, e iai le taimi o le a muta ai le onosaʻi o Ieova. E ui e alofa o ia i tagata, ae e na te lē tuufau ai i latou e faia pea mea e mananaʻo ai. Ua toeitiiti ona ia aveesea atoatoa lea o tagata amioleaga.—Sapa. 2:3.

12. O le ā le auala o loo faaaʻoaʻo ai Iesu i le onosaʻi o Ieova?

¹² E faaaʻoaʻo Iesu i lona Tamā. Ua faitau afe tausaga o faaaʻoaʻo Iesu i le onosaʻi o Ieova. O se faataʻitaʻiga, o loo silafia lelei e Iesu tala taufaaleaga o loo faia e Satani e faatatau iā Ieova ma ana auauna faamaoni. (Kene. 3:​4, 5; Iopu 1:11; Faaa. 12:10) O loo ia silafia foʻi le tele o mafatiaga o loo feagai ma tagata. E mautinoa la lona matuā naunau “ina ia faalēaogāina . . . galuega a le Tiapolo”! (1 Ioa. 3:8) Peitaʻi, o le lotomaulalo o Iesu, o loo ia faatalitali ai pea ma le onosaʻi i le taimi atofaina a Ieova, e faaoo mai ai le iʻuga o Satani ma ana galuega leaga uma.—Galu. 1:7.

13. Na faapefea ona faaalia e Iesu le onosaʻi i ona aposetolo, ma aiseā?

¹³ A o soifua foʻi Iesu i le lalolagi, sa onosaʻi o ia i ona aposetolo. O se faataʻitaʻiga, e ui na masani ona fefinauaʻi le ʻauaposetolo po o ai e sili, ae e leʻi fiu ai Iesu iā i latou. Aiseā? Na maufaatuatuaina i latou e Iesu, e mafai ona suia o latou uiga. (Luka 9:46; 22:​24-27) Pe e iai se vaivaiga e masani ona e lē taulau ai? Pe afai o lea, e mautinoa la lou talisapaia o le avea o Iesu ma o tatou Tupu, o sē e lotomaulalo ma onosaʻi.

14. O le ā e fesoasoani iā i tatou e faaalia atili ai le onosaʻi?

¹⁴ E faapefea ona tatou faaaʻoaʻo iā Ieova? Ina ia faaaʻoaʻo iā Ieova i le auala e mafaufau ma gaoioi ai, e ao ona tatou aʻoaʻoina ma iloa le “finagalo o Keriso.” (1 Kori. 2:16) O se tasi o auala sili e tatou te aʻoaʻoina ai le finagalo o Keriso, o le faitau lea i tala o lona soifuaga o loo i le Tusi Paia. Ia faaalu se taimi e manatunatu loloto ai i na tala, e faatatau i gaoioiga a Iesu ma le māfuaaga na ia gaoioi ai faapena. E manaʻomia foʻi ona tatou talosaga iā Ieova mo le fesoasoani, ina ia tatou faaalia le lotomaulalo ma le onosaʻi e pei o Iesu. O le tele lava e tatou te iloa lelei ai le finagalo o Keriso, pe mafaufau ma gaoioi e pei o ia, o le faigofie foʻi lenā ona tatou faaaʻoaʻo iā Ieova i le faaalia atili o le onosaʻi i isi, faapea i tatou lava.—Mata. 18:​26-30, 35.

E FAAMAMALUINA E IEOVA Ē E FAATAUVAA

15. Ia aumai ni faataʻitaʻiga e iloa ai e silasila mai Ieova i tagata lotomaulalo ma e tautele i latou iā te ia. (1 Samuelu 2:8)

¹⁵ Faitau le 1 Samuelu 2:8. E ui o Ieova o Lē e Silisili Ese i le aoao o mea, ae o se matuā faaeaga le silasila mai o ia i tagata faatauvaa! Seʻi mafaufau i auala na ia faamamaluina ai nisi o tagata i aso ua mavae, o ē atonu na manatu faatauvaa i ai isi. O nisi o i latou e lē vave ona tau ai o tatou mafaufau, ae o loo taʻua i le Tusi Paia. O se faataʻitaʻiga, na faagaeeina e Ieova lana auauna o Mose ina ia faamauina le igoa o Tepora, o sē na soifua i le vaitaimi o augātamā. E pe ā ma le 125 tausaga o auauna ma le faamaoni lenei fafine i le aiga o Isaako ma Iakopo. E ui e lē tele ni faamatalaga e tatou te iloa e uiga iā Tepora, ae na faamautinoa e Ieova e faamauina i le Tusi Paia, le matuā tautele o lenei fafine faamaoni iā te ia ma le aiga o Iakopo. (Kene. 24:59; 35:​8, fpl.) I le tele o tausaga mulimuli ane, na filifilia ai e Ieova se tama leoleo mamoe e igoa iā Tavita, e avea ma tupu o Isaraelu. (2 Samu. 22:​1, 36) Ina ua fanau foʻi Iesu, na auina mai e Ieova ana agelu i ni leoleo mamoe faatauvaa, ma latou maua ai le faaeaga e faalogo muamua ai i le tala ua fanau mai le Mesia i Peteleema. (Luka 2:​8-11) Mulimuli ane, ina ua avatu e Iosefa ma Maria le pepe o Iesu i le malumalu, na faamamaluina e Ieova ana auauna ua loa le soifua o Simeona ma Ana, e ala i le avatu o le faaeaga iā i laʻua e vāai ai iā Iesu. (Luka 2:​25-30, 36-38) Ioe, e ui ina maualuga Ieova, ae e silasila mai o ia i tagata faatauvaa!

16. Na faapefea ona faaaʻoaʻo Iesu i lona Tamā i le auala e feutagaʻi ai ma isi?

¹⁶ E faaaʻoaʻo Iesu i lona Tamā. Na faaaʻoaʻo Iesu i lona Tamā, e ala i le faamamaluina o tagata lotomaulalo o ē na manatu faatauvaa i ai isi. E faapefea? Na ia faailoa atu upu moni e faatatau i le Malo o le Atua i ē ʻe leʻi aʻoaʻoina ma faatauvaa.’ (Galu. 4:13; Mata. 11:25) Na ia faamālōlōina ē mamaʻi, ma feutagaʻi ma i latou i se auala agalelei ma latou lagona ai le alofagia. (Luka 5:13) I le pō mulimuli a o leʻi maliu o ia, na ia faia ai se galuega faatauvaa, o le fufuluina o vae o ona aposetolo. (Ioa. 13:5) A o leʻi afio aʻe foʻi i le lagi, na ia faamamaluina ona soo uma e aofia ai ma i tatou i aso nei, e ala i le tuu i ai o le galuega e sili ona tāua, o le fesoasoani i isi ia maua le ola e faavavau.—Mata. 28:​19, 20.

17. E faapefea ona tatou faamamaluina pe faaalia le faaaloalo i isi? (Tagaʻi foʻi i le ata.)

¹⁷ E faapefea ona tatou faaaʻoaʻo iā Ieova? E tatou te faaaloalo pe faamamaluina isi, e ala i le faailoa atu o le tala lelei i so o se tasi, e tusa po o ā o latou talaaga, o lanu, po o tulaga tauaʻoaʻoga. E tatou te faamamaluina foʻi uso ma tuafāfine, e ala i le manatu e sili atu i latou nai lo o i tatou, e tusa po o ā ni tomai po o faaeaga o loo tatou maua. (Fili. 2:3) Pe a tatou lotomaulalo ma “tausolomua” e faaalia le faaaloalo i so o se auala, e mautinoa o le a faafiafiaina ai Ieova.—Roma 12:10; Sefa. 3:12.

18. Aiseā e tāua ai lo tatou faaaʻoaʻo i le faamaulalo o Ieova?

¹⁸ Pe a tatou faia le mea sili e faaaʻoaʻo ai i lo tatou Tamā i le lagi, o Lē e faamaulalo, o le a faigofie ai ona faalatalata mai isi iā i tatou, ma avea ai i tatou o ni ē e magafagafa ma onosaʻi. E lē gata i lea, o le a tatou faamamaluina ai pe faaaloalo ai i isi, e pei ona faia e Ieova. Tau ina ia tatou taumafai pea e faaaʻoaʻo i lo tatou Atua faamaulalo, ma avea ai i tatou o ni ē e pele i lana silafaga!—Isa. 43:4.