O Tatalo mo le Filemu a o Iai Manatunatuga o Taua
IA Novema 1994, na talimālō ai Pope Ioane Paulo II i se aofaiga tele o tagata usufono na faapotopoto i le Vatikana. O tatalo mo le filemu o le lalolagi na faailogaina ai le faatasiga. Na taʻua e le pope i lana lauga amata, “Po o ā lava feteenaiga na iai i aso ua mavae e oo mai i lenei taimi, o la tatou galuega masani ma o se tiute le faailoa lelei o le sootaga o le lotu ma le filemu.”
Nai lo lea, ua lē o iai se talaaga lelei o lotu i le lalolagi i lenei tulaga. Na faailoa mai e le failautusi sili o le fono o William Vendley, e faapea, “ua matuā aafia lotu i feteenaiga i vaega eseese o le lalolagi.” Manatunatu i le toto masaa o ē lē sala i Rwanda, o se atunuu e malosi ai le Lotu Katoliko Roma.
Ia Me 1994, na taʻutino ai e Pope Ioane Paulo II e faapea o le mala i Rwanda, “o se mea moni ma o le faaumatiaga o se vaega o tagata, ma e faanoanoa ai ona e oo lava i Katoliko, ua faia ai sa latou vaega.” Po o mea o faia e le Katoliko o aafia ai le talitonu o tagata i le lotu? Ua faapea mai Andre Bouillot o se tasi o patele o le Katoliko i Peleseuma, “O le toto masaa o ē lē sala ua maluelue ai le faatuatua o le toatele o tagata.” Ma ua iai se mafuaaga lelei.
E tusa ai ma le lipoti a le Reuters na lomia i le Miami Herald, “o patele, fesoasoani, ma taupousa, o nisi ia o loo iai i pagota Hutu e 40,000 o loo faatalitali o latou faamasinoga ona o nei fasiotiga tagata.” Na lipotia mai e le New York Times: “Ua faapea mai le toatele o tagata Rwanda e lei vave taʻusalaina e o latou epikopō ma akiepikopō le faamasaaina o toto o ē lē sala pe matuā faamalosi atu e taofia ae ua vavalalata i latou ma le malo o Habyariamana (le peresitene) na fesoasoani i le toleniina o vaega e fasiotia tagata. A itiiti mai e toatasi le patele ua molia ma faapagotaina e le taʻitaʻi o le Malo fou o Tutsi i moliaga ona o le fesoasoani atu i fili o ē na faamasaaina toto o ē lē sala.” E lē o se mea e faateʻia ai, “o le Faigamalo fou,” ua faaopoopo mai ai le Times, “e faapea e lē manao e toe iai i le Lotu Katoliko le malosi lea na iai muamua, ma ua taofiofia e fitafita ma oo lava ina faamataʻuina e molia ma faapagotaina patele o ē tautatala atu ma le lē fefefe pe fia tutoatasi.”
O le ā le silasila a Ieova i tatalo mo le filemu e ofoina atu e ē lolotu ae faamasaa toto? Ua tali mai le Isaia 1:15: “A outou faaloaloa mai o outou lima, e ʻalo ese oʻu mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto.”
Ae i le taimi lava e tasi, o loo tumau pea auauna moni a Ieova “e le ni o le lalolagi” ma ana feteenaiga. A o faagasolo le faamasaaina o toto o ē lē sala i Rwanda, na saunia e Molimau a Ieova mai i nei ituaiga taitasi ni lafitaga i o latou aiga mo Molimau ua mafatia e ui ina lamatia ai o latou ola. O le “motu o tagata e toatele” o Molimau, ua aoaoina mai ituaiga uma, ua tatalo ma faaauilumaina le Malo o le Atua ua na o le pau lea o le faamoemoe mo le filemu moni ma le saogalemu.—Ioane 17:14; Faaaliga 7:9; Mataio 6:9, 10; 24:14.
[Ē Ana le Ata i le itulau 30]
Luc Delahaye/Sipa Press