MEA O TUTUPU I LE LALOLAGI

Lalolagi

“I tausaga taʻitasi, e toetoe 3 miliona pepe e feoti i masina muamua e faananau mai ai, ma e māfua mai i ni tulaga e mafai lava ona ʻalofia. E silia ma le tasi vaetolu o nei pepe na feoti i le aso muamua na fananau mai ai.”​—Save the Children International.

Peretania

E tusa ai ma se faamatalaga a le Matagaluega o le Soifua Mālōlōina a Egelani, i le tausaga e 2011, na faatupulaʻia ai le aofaʻi o ē maliliu i nuu e 15 o Lonetona, ona o le mānavaina o le ʻea ua faapolusioneina. O le mea moni, ua uunaʻia le faaaogā o le tiso ona e faapea e sili ona lelei nai lo isi suāuu, ma e itiiti le kaponi e maua mai ai. Peitaʻi, o le 91 pasene o le ʻea ua faapolusioneina i lenā vaipanoa e māfua mai i taavale e alu i le tiso.

Rusia

E tusa ai o se suʻesuʻega na faatautaia i le 2013 e le Public Opinion Foundation a Rusia, e pe a ma le 52 pasene tagata Kerisiano o le lotu Orthodox na faapea mai, latou te leʻi faitau lava i sina vaega o le Tusi Paia, ma e 28 pasene na faapea mai e seāseā tatalo.

Aferika

Na lipotia mai e le Faletupe a le Lalolagi, o le tele o fefinauaʻiga po o ai le pule o fanua, ua lē tele ai ni faatoʻaga ma ua faateteleina ai le mativa. O le ʻafa o fanua e leʻi galueaʻiina o le lalolagi e tusa ma le 500 miliona eka, o loo i Aferika. Peitaʻi i Aferika, e na o le kuata o fua o faatoʻaga o loo mafai ona latou atinaʻe, pe a faatusatusa atu i mea e tatau ona latou maua.

Iunaite Setete

O le tele o aʻoga ma iunivesite ua lē toe faaaogā ai tusi aʻoga, ae ua faaaogā masini faaonapōnei e taʻua o tablets ia ua iai uma faamatalaga o loo i tusi aʻoga a tamaiti, ma isi polokalame mo a latou aʻoaʻoga. Peitaʻi, o loo fesiligia pe faamata e taugofie moni lava lenei faiga.