Le Faaaogāina o Maikorofoni

E FAAALU e o tatou uso ma tuafāfine Kerisiano le tele o taimi ma taumafaiga ina ia auai i sauniga faa-Kerisiano. Afai e manaʻomia ona aogā iā i latou mea e pei ona taʻua, e ao la ona mafai ona manino lelei i la latou faalogo.

I aso o Isaraelu anamua, sa leai ni mea faaleotele leo e alu i le uila. Ina ua talanoa atu Mose i le nuu o Isaraelu i le Fanua Laugatasi o Moapi a o latou leʻi ulu atu i le Nuu o le Folafolaga, sa mafai faapefea e le faitau miliona o i latou sa iai i lana aofia, ona lagonaina mea na ia fai atu ai? E foliga mai sa faaaogā e Mose se faiga e faaaogā ai tagata, lea sa toe taʻua atu ai ana upu e tane sa tutū solo i tulaga talafeagai i le togālauapi. (Teu. 1:1; 31:1) E leʻi leva lava talu ona amata e tagata Isaraelu ona faatoʻilaloina le laueleele i le itu i sisifo o le Ioritana, sa faapotopoto ai foʻi e Iosua le nuu i luma o le mauga o Keresema ma le mauga o Evalu, atonu sa iai ma sa Levī i le vanu lea sa latou va ai. O inā na faalogo ai tagata uma ma tali atu i faamanuiaga ma mala tauatua na taʻu atu iā i latou. (Iosua 8:33-35) E foliga mai i le taimi lea, sa faaaogā ai foʻi tagata e faaooina atu faamatalaga, peitaʻi e lē taumatea sa fesoasoani foʻi le lelei o le siʻomaga lava latou i le faaooina atu o le leo.

Pe tusa o le 1,500 tausaga mulimuli ane ina “ua potopoto mai . . . le motu o tagata e toatele” e faalogo iā Iesu i le sami o Kalilaia, na maliu atu o ia i le vaa, ua alo ese atu ma le matafaga, ona nofo lea i lalo e talanoa atu i le motu o tagata. (Mare. 4:1, 2) Aiseā na talanoa atu ai Iesu mai i le vaa? E aliali mai ona e ese le manino o se leo e momoli atu i luga o se vai o loo malū lelei.

E oo mai lava i le amataga o le 20 senituri, o le tele o taimi sa faalagolago le lagona e le toʻatele o le aofia o mea o loo taʻua i le malosi ma le manino o le leo o le failauga. Peitaʻi, e amata i le 1920 ma faasolo mai ai, na mafai loa e auauna a Ieova ona faaaogā mea faaleotele leo e alu i le uila e faaleotele ai leo i a latou tauaofiaga.

Mea Faaleotele Leo. O mea faigaluega nei e mafai ona faaleotele ai le leo o se failauga i le tele o taimi, peitaʻi e tumau pea le tulaga lelei ma le malosi o lona leo. E lē manaʻomia i le failauga ona matuā faapasae atu lona leo. E lē tigāina ai foʻi le ʻaufaalogologo e tau faalogo mai i mea o loo fai atu ai. Na i lo lenā, e mafai ona latou taulaʻi atu i le feʻau.

E tele mea ua fai e faamautinoa ai ua iai ni mea lelei faaleotele leo, i tauaofiaga ma fonotaga a Molimau a Ieova. E faaopoopo atu i lenā, o loo faaaogā i le tele o Maota o le Malo ia mea faaleotele leo e faaleleia ai leo o i latou e faia lauga, e taʻimua i sauniga, pe faitau mai i le pulelaa. O nisi faapotopotoga e iai foʻi maikorofoni e faaaogā e le aofia pe a fai a latou tali i taimi o sauniga. Afai e iai mea na i lau faapotopotoga, ia faamasani e faaaogā faalelei.

O Nisi o Taʻiala Autū. Ina ia lelei ona faaaogā le mea faalelei leo, ia manatua manatu nei: (1) E ao lava ona fā i le ono inisi e va ai lou fofoga ma le maikorofoni. Afai o le a latalata tele mai le maikorofoni, e ono lē manino mai au upu. Afai o le a mamao tele ese, o le a lē manino mai lou leo. (2) E ao ona i ou luma le maikorofoni, ae lē i autafa. Afai e liliu lou ulu i le taumatau po o le agavale, e te faatoʻā tautala pe a fesagaʻi lelei lou fofoga ma le maikorofoni. (3) Na o sina sii teisi lava o lou leo ma faamalosi teisi aʻe na i lo le mea e masani ai pe a talanoa. Ae e lē manaʻomia ona e ʻeʻē. O le a faigofie lava ona faaoo atu e le mea faaleotele leo lou leo i isi o lau aofia o loo mamao ese atu . (4) Afai e manaʻomia ona kilia lou faaʻī po ua e matuā lagona lava foʻi le fia tale pe mafatua, ia mautinoa ua liliu ese lou ulu mai le maikorofoni.

Pe a Taulimaina se Lauga. Pe a e tū i le pulelaa, e masani lava e iai le uso e fetuunaʻia le tulaga o le maikorofoni. Ia e tū i lau tū e te masani ai ma faasaga lelei atu i le aofia a o faia e le uso le gaoioiga lenā. Tuu au faamaumauga i luga o le pulelaa, ma ia faamautinoa e lē o pupunia e le maikorofoni lau vaai atu i au faamaumauga.

Pe a amata ona e tautala, faalogo atu po o faapeʻī le sau o lou leo mai i sipika faaleotele leo. Pe o leotele naʻuā, po o iai ni upu ua pāvale naʻuā? Atonu e manaʻomia ona e toe sōsō teisi i tua pe a ma se inisi pe lua. Pe a e autilo i au faamaumauga, manatua faatoʻā e tautala lava pe faitau foʻi pe a faafeagai lelei lou fofoga ma le maikorofoni po o le sili laʻitiiti aʻe lava i luga, ae lē i lalo ifo.

Pe a Faitau Atu Mai le Pulelaa. E sili ona lelei le uu i luga o lau Tusi Paia po o se lomiga ina ia fesagaʻi lelei ai ou foliga ma le aofia. Talu ai atonu o le a faasaga tonu mai lava le maikorofoni i lou fofoga, atonu la e manaʻomia ona uu mea o le a e faitauina e faasasasasa i le isi itu. O lona uiga e faasasasasa foʻi lou ulu i le isi itu o le maikorofoni. A oo la ina e faitau, o le a alu atu saʻo lava lou leo i le maikorofoni.

O le tele o uso e faitau i le Suʻesuʻega o Le Olomatamata e tutū i luga ma tautala atu i se maikorofoni e fai se tulaga. O le faia faapea, e saʻoloto ai a latou mānava ma faigofie ai le fai atu o faaupuga. Ia teu i manatu o le faitauina o palakalafa o se vaega tāua o le sauniga. E faalagolago tele lava la le maua e le aofia o aogā, i lo latou lagonaina o mea o loo faitau atu.

Pe a Tali i Taimi e Fai ai le Sauniga. Afai e faaaogā e la outou faapotopotoga maikorofoni i le taimi e fai ai sao o le aofia, ia manatua o loo iai pea le manaʻoga ina ia manino le tautala ma ia lava le leo. Pe a fai sau tali, taumafai malosi e uu i lou lima lau lomiga o le suʻesuʻega po o lau Tusi Paia. O le faia faapea o le a manino ai lau vaai i le manatu o loo e tali ai a o e tautala atu i le maikorofoni.

I nisi faapotopotoga e tofia uso ina ia ave maikorofoni iā i latou e tofi atu e fai se tali. Afai o le tulaga lenā e iai lau faapotopotoga, a tofi atu la oe, tuu ai pea i luga lou aao ina ia iloa mai ai e le uso o loo feaveaʻia maikorofoni, le mea o loo e nofo ai ma vave ai ona oo mai iā te oe. Afai o le maikorofoni e uu lava i le lima, ia nofo sauni e aapa atu i ai. Aua le amataina lau tali seʻi sagatonu lelei muamua le maikorofoni. Pe a uma ona fai lau tali, ia toe faafoʻi vave atu le maikorofoni.

Pe a Auai i se Faataʻitaʻiga. O le faaaogāina o se maikorofoni i se faataʻitaʻiga e manaʻomia ai le muaʻi magafagafa faapitoa. Afai o loo tuu le maikorofoni i luga o se tulaga, o le a avanoa uma la ou lima mo le taulimaina o lau Tusi Paia ma au faamaumauga. E ono telē foʻi se avanoa mo gaoioiga pe a faaaogā se maikorofoni e uu i le lima, ae atonu e manaʻomia ona faatulaga lau paga na te uuina. O le faia faapea o le a avanoa ai ou aao e uu ai lau Tusi Paia. E manaʻomia ona lua faataʻitaʻia ma lau tagata e ona le fale le faiga lenei ina ia iloa e lau paga le auala e uu faalelei ai. Ia aua foʻi neʻi galo, pe a i luga o le pulelaa, e lē tatau ona ū mai lou tua i le aofia, aemaise lava pe a e tautala.

I faataʻitaʻiga e fai i le Sauniga o le Auaunaga, e ono toʻatele nisi e faia ai ni a latou vaega, ma atonu latou te feoaʻi solo i luga o le pulelaa. I tulaga faapena, e ono manaʻomia ai le sili atu i le tasi le maikorofoni. E ao ona muaʻi faatulaga nei mea po o le faaavanoa foʻi mo i latou e faaaogāina pe a latou o atu i le pulelaa. Ina ia faamautinoa ua saʻo le tulaga e iai le maikorofoni i le taimi saʻo e manaʻomia ai, e ao ona muaʻi fuafuaina lelei. O le faataʻitaʻi muamua o faataʻitaʻiga a o leʻi oo i le taimi e fai ai, e mafai ona maua ai le avanoa e faatonutonu ai i latou o le a auai e faatatau i le auala e uu lelei ai maikorofoni. Afai e lē mafai ona muaʻi fai le faataʻitaʻiga i luga o le pulelaa, atonu o se mea lelei la le avane o se mea e foliga i se maikorofoni e uu e i latou o auai i le faataʻitaʻiga ina ia faataʻitaʻi ai le auala saʻo e uu ai le maikorofoni. Pe a uma le faataʻitaʻiga, e ao i tagata sa auai i le faataʻitaʻiga ona tuu ma le faaeteete maikorofoni i le tulaga e tuu ai, ia faaeteete neʻi lavelavea i uaea o isi maikorofoni a o latou ō ese atu ma le pulelaa.

O lo tatou uaʻi atu i le faaaogāina o maikorofoni e fesootaʻi tuusaʻo lava ma se tasi o sini autū o a tatou sauniga, o le mauaina lea e tagata taʻitoʻatasi o aogā mai i lo tatou talanoaina o le Afioga a le Atua. (Epe. 10:24, 25) O le faamasani ina ia iloa lelei le faaaogāina o maikorofoni, o le a mafai ai ona fai so tatou lava sao i lenei sini tāua.