O le Talisapaia—A e Ai se ā ua Toe Faafoʻi ai?

IA Novema o le tausaga ua mavae, i se tauaofiaga a epikopō Italia na faia i Bologna, Italia, na amata ai e le Lotu Katoliko se osofaiga faasaga i Molimau a Ieova. I lalo o le matua “O Keriso loo Tatou Atua ma lo Tatou Faamoemoe: O Kerisiano i le fesagai ai ma Molimau a Ieova,” sa tuuaʻia ai e le patele o Giovanni Marinelli faapea o Molimau “ua fai ma mea faigata i lotu ma sosaiete. “Talu ai lo latou tupu vave aʻe mai Katoliko i Italia, sa ia tuuaʻia ai Molimau a Ieova faapea ua pei ‘o se faamaʻi latou te taia ai faapitoa lava tagata o loo sili ona nofo faatalanoa.’

Sa faatonuina lotu ma aulotu uma i Italia ina ia faia se gaoioiga mausali faasaga i Molimau. Faapefea? E ala i lea faatutuina o ni vaega i aai uma “ia latou tosina” i gaoioiga a Molimau ina ia mafai ai ona “tatala mata o la tatou au faamaoni.”

Na faapefea la ona feagai ai na taualumaga faasaga i Molimau a Ieova? I se tusi na faalalalauina i le mekasini Piario Parish, sa tusia ai e se tasi patele: “Ia taʻu saʻo atu la lena mea. O loo ia te outou uma lava le saʻolotoga e mafaufau ese ai ma, atonu, e oo lava ina outou faateʻaeseina ai aʻu . . . O i latou ou te iloa e matuā sili ona mafaufau, tautala filemu . . . [ma] sili ona faatosina loto. O afea tatou te malamalama ai e manaomia e le upu moni se taulimaina e talia gofie? Ma o i latou o faalauiloina atu le upu moni e lē manaomia ona faalotolotolua, pe manaogi leaga, tu eleelea ma lē teuteu lelei?

“E le gata foʻi i lea, e ō atu Molimau a Ieova i lou fale ma asiasi atu ia te oe. I le fale, ua e i ai i lou lava siomaga ma o oe la e tausolomua . . . E mafai ona e tago atu i lau Tusi Paia . . . ma aumai mai le fata tusi ma e mafai ona e siakiina pe saʻo le mau ua taʻua, ma ia maua le manatu tonu o lena mau, ma isi lava mea.

“Ma seʻi tau ina ou faapea atu foʻi o le mea tonu lava e aafia ai aʻu ona o le mea moni o Molimau a Ieova e i ai le lagona totino o le ‘valaauina’ o i latou . . . i le faiva o le upu. O se aiaiga lena ua leva ona tatou faagaloina, ma o le mafuaaga foʻi lena ua lē mafaitaulia leaga ua oo i la tatou galuega faaevagelia. ‘E faapefea ona latou faalogo pe a le faailoa atu e se tasi?’ Ia te aʻu lava ia o Molimau a Ieova e foliga mai ua ‘atoatoa’: e lē na o le aiga, galuega, ma malologa, a e o lea foʻi le tulaga i suʻesuʻega totino o ō latou talitonuga ma le fesoasoani atu foʻi i isi ina ia malamalama i ai. Peitaʻi o le mea ou te ‘teʻi ai o sauniga o maliu a Molimau a Ieova. Pe a ou faatusatusaina la tatou sauniga o maliu faa-Kerisiano, o le mea pau lava le tagata e leai se leo o lē ua maliu, e leai foʻi se tasi e i ai se Tusi Paia i ona lima e mulimuli ai i le faitauina faatasi . . . Maʻeu le malamalama! Maeʻu ni tatalo! Maʻeu se faatuatua! O ai na te iloa pe mafai ona ou tetee atu i le faaosoosoga ina ia faaopoopo i laʻu mavaega: ‘ou te manao ina ia faia se sauniga o loʻu oti e Molimau a Ieova.’ O ai na te iloa!

“E sili ona talafeagai a latou upu tomua. Atonu ai ona o aʻu foʻi e faamaliegatā, ma e lē ioegofie, o lea ua ou malamalama lelei ai ia latou faamatalaga faitio. Ua latou fai mai, ‘O le lalolagi o loo tatou ola ai ua tupu i le sauā ma amioga lē mamā.’ ‘E i ai sou lagona e taumafai e faamaonia so latou sese? Ou te lē faia . . . ‘O le Lotu Katoliko, talu ai e toatele e lolotu ai ma ua sili ona leva i lo lotu uma, ua i a te ia ai se avega tauave sili e tuuaʻia ai mo nei tulaga.’ Pe lagā sou leo e tetee ai? O aʻu e leai. O ni tagata lelei, amio mafaufau, . . . tuuina atu. E i Molimau a Ieova le loto toa e sau mai le mea tatau. Latou te faaiʻu i le faapea mai, ‘O lea, tuu lau lotu a e tatou ō.’

“Ua ou iloa o le tuua o le tapuaiga na ou iloa ao oʻu susu i loʻu tinā ma talia se tasi lotu, o se mea e mafoʻefoʻe ai. Peitaʻi afai o mea tatau lena e fai ai se ā e lē faia ai lena laasaga? Seʻi mafaufau i ai, o le suia o le tapuaiga e lē o se mea e faalumaina ai se tasi . . . O le faalumaina pe a tuua le tapuaiga a e maua ai na o le gaogao, po o le motusia o le taula a e tafetafea ai e aunoa ma se taunuuga. A e faapefea pe a ou manatu e paʻepaʻe mā laʻu tagāmea ona ou te leʻi vaai i lau tagāmea? E foliga mai o le mea tatau mo aʻu o le sailia lea o moli tāmea, e mafai ona faapapaʻe ai ia sili atu i le paʻeʻpaʻe! O le sini o misionare, e tasi, ma e tasi pē lava: suia lotu a tagata . . . Ai se ā o la lē suia ai laʻu lotu pe afai ua taʻu mai e loʻu loto fuatiaifo e tatau ona faia faapea? Pe a faamautinoa mai e le tagata talaʻi ia te aʻu ia faia faapea? Pe a fai o se mea tatau e ona faia? Afai e sili ona tonu le tapuaiga a Molimau a Ieova . . . , o lona uiga . . . o le a matou ō ma Molimau a Ieova . . . Ou te fia iloa pe saʻo Molimau a Ieova.”

I le faaiʻuga o lana tusi, sa faamalamalama mai e le patele o le faaaogāina e Molimau o le suafa Ieova i lo o Iāuē pe a faaleoina le suafa tauatua, e “le o se mafuaaga lea mo aʻu e aveesea ai ou faalogona fiafia i Molimau a Ieova.” Ai se ā? “I mea uma lava,” ua ia faaopoopo mai, “o i latou o Molimau a le Atua ma o mea lena e faitaulia.!”

Faaopoopoga: O le tusi a le patele sa vave ona vevesi ai vasega maualuluga o le pulega Katoliko. I se lomiga mulimuli ane o le mekasini faalelotu, na ia toe faafoʻi ai ana faamatalaga e uiga i Molimau a Ieova.