Faamalologa i la le Faatuatua—Ai se ā e Naunau ai i ai?

Ua taalili le falesa i leo fetaliai o kitara, pu, tagipalau, sumepalo ma mea tagitagi. O loo sisiva ma pepese tamāloloa, fafine ma tamaiti i le matuā fiafia tele. Ua lelei foi le faalogona mo le amataina o faamalolaga.

O loo ofu le tagata faamalolo i la le faatuatua i ni ofu papae talaloa, e amata lava i le tuu o ona lima i luga o le ulu o le tamāloa pipili, o lē e totolo i ona vae ma ona lima. Ona sosoo ai lea ma le tamāloa tauaso, e lē mafai ona vaai atu i ona mata ma e ufitia uma i lana mata tioata pogisa. “O se vavega!” na alalaga ai ē na matamata i ai a o amata ona savavali tagata pipili ma pupula tauaso. . .

O VAAIGA faapenei e taatele naua i le tele o lotu e faia faamalologa i la le faatuatua i Aferika. O le mea moni, e matuā toatele lava tagata e mulimuli atu i ē faia faamalologa i la le faatuatua i Aferika ma isi atunuu ona ua latou fai mai e mafai ona latou foia so o se faafitauli e ala i le tatalo ma le faatuatua i le Atua. O lea ua ō atu ai nisi i tagata faamalolo la le faatuatua ma o latou faafitauli tau tupe. Ma talu ai ua avea le lē fanau ma mea e tauemua ai e tagata i le sosaiete o tagata i Aferika, o lea ua ō atu ai nisi i tagata faamalolo i la le faatuatua ma le faamoemoe e maua ai se fofo o le pa.

A e peitai, o faafitauli tau i le soifua maloloina, ua sili ona uai atu i ai tagata faamalolo i la le faatuatua na i lo o se isi lava mea. E ui ua faatumuina maketi o le lalolagi i vailaau faafomaʻi ma ua faia foi taumafaiga e viiviia ai tulaga faafomaʻi ina ia maua ai sa mapusaga mo ē ua mamaʻi, a e ua matuā mamao lava tagata mai le mauaina o se tali i le faafitauli o le maʻi. O nisi ua faataotolia i maʻi, ua latou faaaluina le tele o tupe e saili ai mo ni faamalologa, a e na o le fetaiai lava ma le lē taulau. O lea, e lē tioa ona liliu atu le toatele i tagata faamalolo i la le faatuatua ona ua leai se isi faamoemoe!

Ua lagona e nisi faapea ua manuia le faamalologa i la le faatuatua ia i latou ma ua lē mafai ai ona iloa se feteenaiga i le va o lea ma le faa-Kerisiano. Ioe, talu ai ua masani lava ona faapea mai ē o faia faamalologa o loo latou faia galuega i le suafa o Iesu, o lea ua lē o se mea lē masani ai mo ē o loo mulimuli atu ia i latou le avea uma o ni sui o a latou lava lotu lauiloa ma le lotu e faamaloloina ai i la le faatuatua. A e pe mafai ma le tatau e se tagata tapuai moni i le Atua ona faaavanoa o ia e faamaloloina e se tagata faamalolo i la le faatuatua? (Ioane 4:23) Ma pe e mafai e so o se faamalologa e faia e sea tagata ona avea o se faamalologa moni mai le Atua?