Fesili Mai le Au Faitau

◼ Pe ua alagātatau mo se Kerisiano ona tutuli manu pe fagota?

O uiga faaalia eseese i le tutuli manu e masani ona aafia ai faalogona loloto. O lea e sili ona lelei mo Kerisiano ona tauivi ina ia malamalama ma faatatau manatu o Ieova le Atua i le mataupu e pei ona maua ai i le Tusi Paia.

Na avatu e le Atua i le tagata le pule i luga o manu ‘o le vao’ ma manu ‘lalata.’ I le amataga, sa leʻi iai se faatagaga a Lē na Foafoaina Mea i le tagata, pe atonu sa leʻi iai foi so o se manaoga faaletino, ina ia fasi manu mo meaʻai. (Kenese 1:24, 29, 30) E na o le taimi lava ina ua faatoʻā mavae le Lolo na avatu ai e le Atua i le fanau a tagata le aiā e ʻai ai i aano o manu na sa lelei ona faamamāina e se “le ola—o lona toto” lea. (Kenese 9:3, 4) O lena mea e mafai ona avea o le aano mai i manu lalata po o manu tataa o le vao.

Na faia lafu manu a tagata Isaraelu, e pei o mamoe ma povi, na sa ono mafai ona fasia mo meaʻai pe afai latou te mananao i ni aano o manu. Sa latou tutuli foi ma fagogota ina ia maua ai meaʻai. (Teuteronome 12:20-24; 14:4-20) Sa ōgatasi lenei ma le fetalaiga faafaatusa a le Atua e faapea o le a ‘ia auina atu tagata faifaiva e toatele e faifaiva mo ona tagata ma le toatele o tagata tulimanu e tutuli mo i latou.’ (Ieremia 16:16) Mulimuli ane, na faaaofia e Iesu tagata faifaiva i ona aposetolo ma taʻitaʻiina le faia moni o faiga faiva.—Mataio 4:18-22; 17:27; Luka 5:2-6; Ioane 21:4-7.

Ina ua ole atu le tamā matua o Isaako mo se ipu meaʻai manogi, sa naunautaʻi lona atalii o Iakopo e fasi ni tamai ʻoti se lua ina ia fai ai se meaʻai mo ia. Ae peitai, sa tutuli Esau mo se manu o le vao ina ia maua ai se aano o le aila mo lona tamā. Ia mātau faapea e ui lava sa mafai ona maua aano o manu mai manu lalata, ae sa ole atu Isaako mo se aano o se manu o le vao mai se tuliga. Mātau foi, faapea sa fasia e nei atalii e toalua ni manu na o le a avea ma meaʻai, e lē mo i laʻua, ae mo se isi.—Kenese 27:1-19.

Sa mafai ona fasia manu mo ni mafuaaga e ese mai na i lo o a latou aano. O o latou paʻu sa mafai ona faia ai ni lavalava. (2 Tupu 1:8; Mareko 1:6; Eperu 11:37) Sa faia mai ai foi lavalava e puipuia ai ma ipu, mai paʻu o manu, e oo lava i manu sa lē mamā mo meaʻai ma faapea sa leʻi ʻaina e tagata Isaraelu.—Esoto 39:33, 34; Numera 24:7; Faamasino 4:19; Salamo 56:8.

O le mea ua manaomia e le Atua faapea e tatau ona sasaaina i le eleele toto o manu ua fasia, e ao ona faamanatu atu ai i tagata tulimanu, o le ola o le manu e mai ia te ia ma o lea e tatau ona taulimaina i se auala faaaloalo, ae lē i se auala soona faatamaʻia ma le lē alofa. (Levitiko 17:13) E foliga mai sa fasia e Nimarota manu ma ai lava sa gugutu ai e uiga i lona tomai e tutuli, le tele po o le aofai o ana tuliga, po o ni faailoga na atonu sa maua mai na mea. Sa avea o ia o “le tulimanu malosi e tetee atu ia Ieova.”—Kenese 10:9, NW.

E mafai ona tupu aʻe i le loto o se Kerisiano sea lagona faaoso fiafia ona o ni tuliga po o le fasia o manu, pe ona o le fagotaina o iʻa. E toatele tagata tulimanu po o faifaiva o ē ua matuā iloiloina lona loto ma iloa ai faapea sa aafia o ia i le ‘olioli i le fasia o manu.’ E ō faatasi lena lagona faaoso fiafia ma le lē manatu i le soona faatamaʻia ma le lē alofa le ola o le manu. O lea a o lē sese le tutuli po o le fagota (pe a fasi mateina pe puea foi mo le faaogāina e se tasi i meaʻai po o se isi lava fuafuaga talafeagai), o le a lē o se mea tatau le faia faapea pe afai e iai i se Kerisiano le agaga e tali tutusa ma le agaga o Nimarota. Ae e iai mataʻutia e ese ai mai i le maua o le naunau faaoso fiafia ona o le tuliga, le fasi mateina, po o le faailoga.

Na talanoaina i Le Olomatamata faa-Samoa o Aperila 1, 1984, le pogai e lē tauaveina ai pe teuina e Kerisiano moni fana mo le faaaogāina faasaga i tagata pe mo le puipuia mai o i latou. (Itulau 21-24) O le mafaufau loloto i lena fautuaga na taʻitaʻiina atu ai nisi Molimau i le toe mafaufau pe ao ona iai sa latou fana e oo i fana e tutuli ai. E toatele o ē na filifili e aveese atoatoa a latou fana pe alofia foi le faaalia mai o a latou fana pe faafaigofie ona faaaogāina foi. O lea o nei Kerisiano o le a lē avatua le manatu faapea e mitamita i latou i auupega po o le faalagolago i ai. Ae lē gata i lea, ua oo lava ina leai se fana e tutuli ai, po o le lē iai mo le faafaigofie ona faaaogāina, e mafai ona alofia ai se mala mataʻutia. Ona lē mafai lea ona oo atu auupega mataʻutia i lima o tamaiti o ē atonu e faafuasei ona lavevea ai pe fasiotia ai se tasi, o le a lē iai foi ni fana pe afai e matuā faafefe ai se tasi pe mafatia naʻuā foi le loto.—Faatusatusa Faataoto 22:3.

Atonu e mananao nisi Kerisiano i le manogi o le aano o nisi o manu e tutuli po o ni iʻa, ma o le auala faigofie ma talafeagai e maua ai na meaʻai o le tutuli po o le fagotaina. E olioli nisi i le ea ma le faamalositino lea e fesootai atu ma le faia o tuliga i le togāvao, po o le iloa foi faapea o itula toafilemu o le faiva e mapu ma malōlō ai. E lē o tautala tetee le Tusi Paia i lenei mea, o lea e lē o iai se manaoga e faamasino ai isi pe olioli i na mea pe leai. Ma o le faaaʻoaʻoga a Isaako ma ona atalii ua faaalia ai faapea e leai se manaoga ina ia faia se finauga po o ai o le a ʻai i manu tutuli po o iʻa.—Mataio 7:1-5; Roma 14:4.

E foliga mai sa matuā pipii atu le aposetolo o Peteru i faiga faiva. A o taatitia latalata ane ni iʻa, sa fesoasoani atu ai Iesu toe faatuina ia te ia e iloilo i ona lava faalogona e uiga i iʻa po o le galuega o le fai faiva. Na fesili Iesu: “Simona e, le atalii o Iona, pe sili mai lou alofa ia te au, i o latou nei [na i lo nei mea, NW]?”—Ioane 21:1-3, 9-15, tagai i Le Olomatamata faa-Peretania, Novema 1, 1988, itulau 31.

E faapena foi, e tatau i se Kerisiano o lē e filifili ma le lotofuatiaifo lelei e tutuli pe fagota, ona faasolo lelei ana mea e faamuamua. Mo se faaaʻoaʻoga, afai e amataina le vaitau e tutuli ai po o fagotaga i le taimi ua faatulaga e fai ai sauniga a le faapotopotoga, o le ā o le a ia faia? Pe o le a faaalia ea i ana talanoaga lona loto faamaualuga i lona tomai i tuliga po o faiga faiva? Maeu le lelei pe afai e mafai e se Kerisiano taʻumatuaina o lē e filifili e tutuli pe fagota i lea taimi ma lea taimi, ona faapea atu ma le maumaututū: “Ioe, le Alii e, ua e silafia, ou te alofa ia te oe [e sili atu na i lo loʻu alofa mo nei mea].”—Ioane 21:16.