Fesili Mai le ʻAufaitau

O le ā le vaaiga a Kerisiano i fanafanaga manu ma fagotaga?

E lē o faasāina e le Tusi Paia le fanafana manu ma le fagota. (Teuteronome 14:4, 5, 9, 20; Mataio 17:27; Ioane 21:6) Ae manaʻomia i Kerisiano o loo fanafana ma fagogota, ona manatunatu i ni taʻiala faale-Tusi Paia.

Na faataga e le Atua ia Noa ma lona aiga e tapē ma aai i manu, ae manaʻomia ona faaalu le toto a o leʻi ʻaina. (Kenese 9:3, 4) O lenā faatonuga na faaalia mai ai e tāua i le Atua le ola o manu, auā o ia o le puna. O lea la, e lē tapēina faataaloga e Kerisiano manu e faafiafia ai i latou, ma manatu i le ola o se mea e lē tāua.—Faataoto 12:10.

E ao ona tatou iloiloina se isi uiga e aafia ai la tatou vaaiga. Sa faamalieina aposetolo o ē na avea ma faifaiva i le tele o iʻa na maua. Ae latou te leʻi gugutu ma faalialia le poto e fagota po o le fanafana, po o le auai i tauvaga i ia mea ina ia taʻu atu ai i isi lo latou masani po o le tomai, ma le fiafia foʻi e tuli ma tapē manu.—Salamo 11:5; Kalatia 5:26.

O lea la, fesili ifo iā te oe lava: ‘Po o oʻu faatāua le silafaga a Ieova i le ola? Po o tele ina ou talanoa ma mafaufau i fanafanaga ma fagotaga? Po o faaalia i loʻu olaga le fiafia e tuli ma tapē manu, po o faaalia mai ai o aʻu o se auauna a le Atua? Po o ou faauō atu iā i latou e lē talitonu ona o fanafanaga manu ma fagotaga? Po o fai ma mea ou te lē ano ai i loʻu aiga?’—Luka 6:45.

I nisi atunuu, e iai vaitau e faataga ai ona fanafana ma fagogota isi ina ia maua ai meaʻai. Ae atonu ua manatu nisi e leai se afāina o le faamuamua o na mea, na i lo mea faaleagaga. Ae peitaʻi, pe afai e tatou te faamuamua mea e fiafia ai le Atua, o le a iloa ai o loo tatou faalagolago ma talitonu iā te ia. (Mataio 6:33) E lē gata i lea, e usitaʻia foʻi e Kerisiano tulafono uma a “Kaisara” e faatatau i fanafanaga ma fagotaga, e tusa lava po o faamalosia pe lē o faamalosia foʻi e le malo na tulafono.—Mataio 22:21; Roma 13:1.

Atonu e manaʻomia ona toe fetuunaʻi manatu o nisi e tusa ma taʻiala a Ieova ina ia talafeagai ma lana silafaga e faatatau i fanafanaga ma fagotaga. (Efeso 4:22-24) Ae e manaʻomia foʻi ona tatou manatu mamafa i faaiʻuga faamaoni a isi tagata. Na fautua mai le aposetolo o Paulo e faatatau i lenā manatu e faapea: “Aua neʻi tatou toe fefaamasinoaʻi a e lelei ina ia manatu i lenei lava mea, aua neʻi tuu ane e se tasi se mea e tausuai ai, po o se mea e tautevateva ai lona uso.” (Roma 14:13) O le faaalia o le alofa lē manatu faapito ma le manatu mamafa, o le a maua ai le filemu i le faapotopotoga ma faafiafiaina ai Lē na faia i tatou, ma o ia o le Puna o le ola.—1 Korinito 8:13.a

[Faaopoopoga i lalo]