Pe o Aʻoaʻoina e le Tusi Paia le Talitonuga i Iuga Tuupoina?

TAUFAALEAGA! TAUFAASESE! Pe a manatu se tagata taualoa o se nuu faapea ua faaleagaina lona igoa po o lona talaaga lelei e ni faamatalaga sese, e na te lagona le tatau ona faia o se faasaʻoga o ia mataupu. Atonu e oo ina ia uia laasaga faaletulafono faasaga ia i latou ua tuuaʻia mo le taufaaleaga.

O lea, o le aʻoaʻoga i iuga tuupoina, o le taufaasese moni faasaga i le Atua e Ona le Malosi Uma Lava. Ua faapea mai le aʻoaʻoga lea i iuga tuupoina, o le Atua ua māfua ai puapuaga uma ma faalavelave faafuasei ia o loo pagatia ai tagata. Pe afai e te talitonu i iuga tuupoina, e te ono mafaufauina faapea o le Pule Silisili Ese Aoao ua ia sauniunia se lisi o mea tutupu lea e ono mafai ona faitauina pei o ia o loo mulimuli mai: ‘O le asō, o le a lavea ai Ioane i le faalavelave faafuasei tau taavale, o le a aliaʻe mai uiga o le malalia ia Fatou, O le a faaleagaina le fale o Mamadou i se afā’! Pe o le a uunaia ea oe e auauna atu i sea ituaiga o Atua?

ʻAe afai e lē o māfua mai i le Atua mala ua oo ia i tatou, o ai la e tuuaʻia?’ ua fesili mai ai i latou e talitonu i iuga tuupoina. O Ousmane, le tama talavou pei ona taʻua i le mataupu faatoʻā mavae atu, sa tau mānatu o ia e faatatau i lenei mea. Ae na te lei taumateina pe tau mafaufau i le mea moni. Sa ia iloaina faapea ua faamamāina e le Atua o ia lava mai lenei tuuaʻiga e ala i aʻoaʻoga o loo i totonu o Lana Afioga faagaeeina, le Tusi Paia. (2 Timoteo 3:16) O lea, seʻi o tatou manatunatu i le mea o fai mai ai le Tusi Paia i lenei mataupu.

O Ai e Tuuaʻia?

O lologa, afā, mafuie—o na mala tetele e masani ona taʻua o galuega a le Atua. Peitai e lē o taʻua i le Tusi Paia faapea o le Atua ua māfua ai ia mala. Seʻi manatunatu i se mala sa tupu i senituri ua mavae i Sasaʻe Tutotonu. Ua taʻu mai ia i tatou e le Tusi Paia le lipoti a lē na sao mai i lenei mala e faapea: “Ua paū ifo le afi a le Atua [O se faaupuga faa-Eperu ua masani ona faauigaina i le uila emo] mai le lagi, ua susunu ai mamoe ma auauna, ua faaumatia ai i latou.”—Iopu 1:16.

E ui ina foliga mai atonu na manatu lenei tamaloa ua tumu i le fefe o le Atua na māfua mai ai le uila emo, ae ua faaalia e le Tusi Paia e lē tatau ona tuuaʻia o Ia. Ia faitau oe ia i ai i le Iopu 1:7-12, ona e iloa ai lea e faapea na māfua mai le uila emo, e lē o le Atua ae o lona Fili—o Satani le Tiapolo! E lē faapea o mala uma e māfua mai ia Satani. Ae manino lava, e leai se mafuaaga e ao ai ona tuuaʻia le Atua mo mala.

O le mea moni, e tuuaʻia lava tagata mo mea sese ua tutupu. O le lē taulau i aʻoga, i galuega, po o fesootaiga ma tagata lautele e ono māfua mai ona o le itiiti o taumafaiga ma le aʻoaʻoina lelei, po o le itiiti o le manatu mamafa mo isi. E faapea foi, i maʻi, faalavelave faafuasei, ma le oti atonu o ni iuga o le faatamala. O le mea moni, o le fusiina o le fusipau a o aveina le taavale e matuā faaitiitia ai le ono oti o se tasi i se faalavelave tautaavale. O le a leai la se eseesega i le faia o le fusipau pe afai o loo faatonutonuina mea e “iuga ua tuupoina.” O le tausia lelei o le soifua maloloina ma le tumamā e matuā faaitiitia ai le oti a o lei matutua. E oo lava i nisi o mala ua masani ona taʻua o “galuega a le Atua” o le mea moni lava o galuega a tagata—o iuga faanoanoa ia o le lē tausia lelei e tagata o le lalolagi.—Faatusatusa i le Faaaliga e 11:18.

“Le Tausaga ma le Mea e Tupu Ai”

O le mea moni, e tele mea e faanoanoa ai ua tutupu e lē o matuā manino lona mafuaaga. Ae seʻi mātau le mea o fai mai ai le Tusi Paia i le Failauga 9:11: “Ua ou toe iloa foi i lalo o le la, ua le sini i le tausinioga e ua tele vavave, ua le malo i le taua e ua malosi, ua le i ai foi i e ua popoto le mea e ʻai, ua le i ai i e ua faautauta le oloa tele, ua le i ai foi i e ua atamamai le alofaina mai; a o le tausaga ma le mea e tupu ai e oo ia te i latou uma.” O lea la e leai se mafuaaga e talitonu ai faapea ua māfua mai i Lē na Foafoaina Mea faalavelave faafuasei, po o tagata ua aafia fua i faalavelave o se auala lea ua faasalaina ai i latou.

O Iesu Keriso lava ia sa tetee i mafaufauga faatatau i iuga ua uma ona tuupoina. I le faasino atu i se mala na matuā malamalama lelei i ai lana aufaalogologo, sa fesili Iesu faapea: “I le ma le toasefulu ma le toavalu sa paū i o latou luga le ʻolo i Seloa, ua latou oti ai; fa te outou ea, ua sili a latou agasala i tagata uma e na nonofo i Ierusalema? Ou te fai atu ia te outou, e leai.” (Luka 13:4, 5) Sa faasino manino atu e Iesu faapea o mala, e lē ona ua faalaa ane le Atua, ae o le “tausaga ma le mea e tupu ai.”

O Āuga e Faaleagaina ai o le Lē Lelei Atoatoa

E faapefea la, ia le oti ma maʻi ua lē iloa o latou mafuaaga? Ua aumaia e le Tusi Paia se faamatalaga tuusaʻo i le tulaga o le tagata e faapea: “Auā faapei ona oti uma ia Atamu.” (1 Korinito 15:22) Ua malaia tagata i le oti talu ala lē usiusitai na uia e lo tatou uluai tamā o Atamu. E pei lava ona lapatai mai le Atua, ua tuufaasolo atu ai e Atamu i lana fanau le oti. (Kenese 2:17; Roma 5:12) O lea la, o maʻi uma na amata mai lava i tuā i lē na tupuga uma mai ai o Atamu. O o tatou vaivaiga tuufaasolo e telē sana vaega i faanoanoaga ma lē taulau ua tatou oo i ai i le olaga.—Salamo 51:5.

Seʻi manatu i le faafitauli lea o le mativa. O le talitonu i iuga tuupoina ua masani lava ona uunaia ai i latou ua pagatia e malolo atu i olaga faigata. Ua latou talitonu faapea ‘o lo tatou taunuuga lenei.’ Ae ua faaalia e le Tusi Paia e faapea o le lē lelei atoatoa faaletagata e tatau ona tuuaʻia ae lē o iuga tuupoina. O nisi ua latou matitiva ona ua latou ‘selesele i mea na latou lulu’ ona o le paie po o le lē faaaogaina tatau o alamanuia. (Kalatia 6:7; Faataoto 6:10, 11) E lē mafaitaulia le faitau miliona o ē ola i olaga matitiva talu ai ua latou aafia fua ona o le matapeapea o tagata o iai le pule. (Faatusatusa i le Iakopo 2:6.) “E pule ai le tasi tagata i le tasi, e leaga ai o ia lava,” ua taʻua ai faapea e le Tusi Paia. (Failauga 8:9) E leai se faamaoniga o iai e na te faamatalaina le mafuaaga uma o le mativa e māfua mai i le Atua po o iuga tuupoina.

Talitonu i Iuga Tuupoina—Ona Aafiaga e Faaleagaina Ai

O loo iai pea se isi finauga faasaga i le talitonuga i iuga tuupoina, o le aafiaga o iuga ua uma ona filifilia e mafai ona oo atu ia i latou o talitonu i ai. Ua faapea mai Iesu Keriso: “E faapea foi laau lelei taitasi ma fua mai i fua lelei; a o le laau leaga e fua mai i fua leaga.” (Mataio 7: 17) Seʻi o tatou iloiloina se tasi o “fua” o le aʻoaʻoga i iuga ua uma ona tuupoina—le auala ua aafia ai uiga o tagata agaʻi i tiute tauave.

O se uiga lelei agaʻi i tiute tauave totino e tāua tele. O se tasi lea o mea o loo uunaia mātua e sauniunia mea mo o latou aiga, o tagata faigaluega ia faia a latou galuega ma le faamaoni, o i latou o loo gaosia mea ia faia i se tulaga e sili ona lelei. I le isi itu o lē e talitonu i iuga tuupoina atonu o le a ia lē amanaiaina lena tiute tauave. Manatunatu mo se faataitaiga faapea o le taavale a le tamaloa e iai se mea o faaletonu i le vaega e faagaoioia ai le taavale. Afai e iai sona uiga naunau mo tiute tauave, e na te toe faaleleia ia mea ona o le manatu mo lona ola ma ola o lana pasese. Peitai o sē e talitonu i iuga tuupoina, atonu e na te lē amanaia le matautia, ma manatu faapea o le a faatoʻā leaga lava le taavale pe afai o le ‘finagalo lea o le Atua’!

Ioe, o le talitonuga i iuga tuupoina e faigofie lava ona uunaia ai le faatalalē, le paiē, le lē talia o le tiute tauave mo ana lava gaoioiga, ma le tele lava o isi amioga lē lelei.

Se Pa Pupuni ea i la Tatou Faiā ma le Atua?

O le mea e sili ona leaga, o le talitonuga i iuga tuupoina e mafai ona lafoaia ai uiga o se tasi agaʻi i lana tiute tauave, po o le matafaioi agaʻi i le Atua. (Failauga 12:13) Ua uunaia e le faisalamo tagata uma ia “tofotofo ia outou, ma ia outou iloa e lelei Ieova.” (Salamo 34:8) Ua faataatia e le Atua manaoga patino mo i latou o ē o le a olioli i lona lelei.—Salamo 15:1-5.

O se tasi o na manaoga o le salamō. (Galuega 3:19; 17:30) O le salamō e aofia ai le taliaina o o tatou sese ma faia suiga manaomia. I le avea o i tatou o ni tagata lē lelei atoatoa, o i tatou uma e faia le tele o measese lea e manaomia ai lo tatou salamō. Ae afai e manatu se tasi o ia o sē ua lē mafesoasoania i aafiaga o iuga tuupoina, e faigata la ona ia lagona le manaomia o le salamō po o le taliaina o tiute tauave mo ona sese.

Sa faapea mai le faisalamo faatatau i le Atua: “Auā o lou alofa e sili ona lelei lea i le ola.” (Salamo 63:3) Ae o le talitonuga i iuga tuupoina ua faatalitonuina ai le faitau miliona e faapea o le Atua ua māfua ai lo latou puapuagatia. Ua masani ona avea lea ma mea ua faaosofia ai le lagona tigā o le toatele faasaga ia te ia, ua tapunia ai le faitotoa o le iai moni o sa latou faiā vavalalata ma Lē na Foafoaina Mea. Auā o le mea moni, e mafai faapefea ona e lagona le alofa mo sē o loo e vaai i ai o loo māfua ai faafitauli ma puapuaga? O le talitonuga i iuga ua uma ona tuupoina ua faatupu aʻe ai se pa pupuni i le va o le Atua ma tagata.

Saʻoloto Mai le Pulea e Iuga Tuupoina

O le tama talavou o Ousmane, e pei ona taʻua i le amataga, sa faapologaina i le talitonuga o iuga tuupoina. Peitai ane, ina ua fesoasoani atu i ai Molimau a Ieova e toe fetuunai ona mafaufauga i le malamalamaga o le Tusi Paia, o lea sa uunaia ai loa Ousmane e lafoaia lona talitonuga i iuga tuupoina. O le iuga ua maua ai se faalogona loloto o le mapusaga, ma se vaaiga fou mautinoa mo le olaga. Ae sili atu ona tāua, ua oo ina ia iloa lelei Ieova o se Atua e “alofa mutimutivale ma le alofa fua, e telegese lona toasa, a e tele le alofa ma le faamaoni.”—Esoto 34:6.

Ua oo foi ina iloa e Ousmane faapea o le Atua, e ui na te lē faatulagaina mea uma o o tatou olaga, ae iai lana fuafuaga mo le lumanai.a Ua faapea mai le 2 Peteru 3:13: “A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” Ua fesoasoani Molimau a Ieova i le faitau miliona o tagata ina ia atiaʻe le faamoemoe mo le ola e faavavau i le avea o se vaega o lenei “lalolagi fou” ua folafolaina mai. E latou te mananao foi e fesoasoani ia te oe.

A o tupu aʻe lou poto saʻo i le Tusi Paia, o le a e talisapaia la faapea o lou lumanai e lē faalagolago atu i nisi o mea ua uma ona tuupoina lea e leai sau mea e mafai i ai. O upu a Mose i tagata Isaraelu anamua ua matuā saʻo ona faatatauina e faapea: “Ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau; ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia.” (Teuteronome 30:19, 20) Ioe, e mafai ona e faia filifiliga e faatatau i lou lumanai. Ua lē o pulea e iuga tuupoina.

[Faaopoopoga i lalo]

[Ata i le itulau 6, 7]

O nei mala ua lē o ni ‘galuega a le Atua’

[Ē Ana le Ata]

U.S. Coast Guard photo

WHO

UN PHOTO 186208 /M. Grafman