Faapaiaina o le Nofoaga Tau Aʻoaʻoga a le Olomatamata—O se Tausamiga ia Ieova

TALU mai lava aso anamua, ua avea ai tausamiga fiafia o se vaega o le tapuaʻiga moni. O nisi o tausamiga na faia i Isaraelu anamua, sa faia mo le tele o aso ma e faitau afe ma afe tagata tapuaʻi o Ieova na auai. O le faaulufalega o le malumalu o Solomona, sa faia mo aso e fitu, ona sosoo ai lea ma le Tausamiga o Faleapitaga sa faia mo le vaiaso atoa. O lenei tausamiga na maua ai e le fanauga a Isaraelu se avanoa e manatunatu ai i auala ofoofogia na feutagaʻi ai Ieova ma i latou. Sa latou foʻi i o latou aiga “ma le olioli ma le loto fiafia, ona o mea lelei uma na faia e Ieova.”—1 Tupu 8:66.

O le mea na faia i le Nofoaga Tau Aʻoaʻoga a le Olomatamata i Patterson, Niu Ioka, i le Iunaite Setete o Amerika ia Me 17-22, 1999, na faamanatu atu ai i ē na asiasi atu e uiga i na tausamiga fiafia i aso anamua. Sa avea lena o se vaiaso o gaoioiga faapitoa sa faaautū i le faapaiaina o ni fale se 28 ua fuafuaina mo le faaauilumaina o aʻoaʻoga faale-Tusi Paia i le lalolagi aoao. Na faia sauniuniga mo sui uma e 5,400 o le aufaigaluega i le ofisa ulu i Brooklyn, Wallkill, ma Patterson e faia ni asiasiga ina ia maimoa maeʻaeʻa ai i fale i Patterson a o faagasolo lena vaiaso e lē mafaagaloina. I malo valaaulia, sa iai ma le sili atu i le 500 o ē na avea muamua ma sui o le aufaigaluega, o ē na faia ni sao i le galuega i le taimi na fausia ai le nofoaga tau aʻoaʻoga, o sui mai lālā e 23 o le Sosaiete o le Olo Matamata, ma isi mai faapotopotoga taulata ane—o se aofaʻi pe ā ma le 8,100 pe a itiiti mai.

O Mea na Faaalia i Maimoaga na Saunia ai se Aʻoaʻoga

Ina ia faamasani le ʻau asiasi i le nofoaga tau aʻoaʻoga, na faatulagaina ai le maimoaina o ni āta faapitoa, faaalia o ni vitiō tau aʻoaʻoga, ma ni maimoaga e alu lava le tagata ia. I le ofisa i luma, na tosina vave atu lava le vaai a le ʻau maimoa i se fausaga laitiiti faataʻitaʻi o le malumalu lea na iai i Ierusalema i le taimi o le faiva i le lalolagi a Iesu. O isi mea na faaalia, na faamatilatila ai le talafaasolopito o le amataga o le Aʻoga Faale-Tusi Paia a le Olomatamata o Kiliata, tauaofiaga iloga, sauniga a le faapotopotoga, le faaauilumaina i aso nei o suʻesuʻega faale-Tusi Paia i aiga—e faitau miliona ia o loo faia i vaiaso taʻitasi—ma le galuega o loo faia e le Matāgaluega Tau Tulafono ina ia tatalaina ai pea le auala mo na gaoioiga ona o le usiusitaʻi i le poloaʻiga a Iesu.—Mataio 28:19, 20.

I le potu tele lea e sosoo ane ai, e mafai ona ofi lelei ai tagata e 1,700, na faafiafiaina ai i latou na asiasi ane i le taimi o tausamiga o le faapaiaga ina ua maimoa i le āta vitiō e 33 minute le umi, na faaigoaina “E Lē o le Malosi—Ae o Loʻu Agaga.” I lenei vitiō na faaalia ai le auala na mafai ona faatinoina ai le Nofoaga Tau Aʻoaʻoga a le Olomatamata. O faatalanoaga, na faaalia manino ai faamaoniga o le iai o le taʻitaʻiga a Ieova i mataupu faapea ma ana faamanuiaga i taumafaiga ina ia faaiʻuina ma le manuia lenei galuega na faia mo le 15 tausaga. E faitauafe tagata na faia se sao i le faatinoina moni o lenei galuega faufale. I se tasi taimi i le 1994, sa iai le toʻa 526 o tagata faigaluega i le nofoaga na faia ai le galuega, e aofia ai ma le toʻa 350 o le aufaigaluega tauofo faataimi atoa, 113 tagata faigaluega faavaitaimi, ma le 63 na ō atu i aso taʻitasi e fesoasoani. E matuā toʻatele isi na lagolagosua i le galuega e ala i meaalofa tauofo. Sa iloa e na tagata uma lava e faapea, e lē mafai ona faia lenei galuega pe ana lē seanoa le agaga o Ieova.—Sakaria 4:6.

Sa mafai ona iloa e i latou na asiasi maimoa atu e faapea, o le sini o le galuega lea o loo faia i le nofoaga tau aʻoaʻoga, o le faaauilumaina lea o le aʻoaʻoga tauatua. O āta na faaalia i le faitotoʻa e ulu atu ai i le Aʻoga o Kiliata i le fogafale muamua o le faleaʻoga, o loo faamatilatila mai ai le tofi tautele tuufaasolo faaleagaga ma le talafaasolopito o le aʻoga. Talu mai le uluaʻi vasega i le 1943 i le fale tuai sa iai muamua i South Lansing, i Niu Ioka, e sili atu i le toʻa 7,000 tagata ua toleniina i le Aʻoga o Kiliata mo le auaunaga faamisionare. O āta na maimoaina i le fogafale lona lua o le faleaʻoga, na saunia ai ni vaaiga o le Aʻoga mo Sui o Komiti o Lālā ma le Aʻoga mo Ovasia Femalagaaʻi, sa faia uma ai vasega o na aʻoga iinā. Talu mai ona amataina ia Novema 1995, ua saunia ai e le aʻoga mo sui o lālā ni faatonuga auiluma mo sui e toʻa 360 o Komiti o Lālā mai atunuu e 106.

A o faagasolo ia maimoaga a le ʻau asiasi, na vave lava ona latou iloa e faapea, i le tele o vaipanoa, sa mafai ona latou vaaia ai ni mea e sili atu na i lo o āta o faaalia mai. Sa mafai ona latou ō atu i totonu o matāgaluega eseese, asiasi atu i ofisa ma isi nofoaga e faia ai galuega, ma vaai totino ai lava i galuega o faia ai. O le mea mataʻina o le maimoaga, o le fale o loo faagaoioia ai Kaseti ma Āta Vitiō. Maʻeu ni fale matuā sili ona mananaia o loo iai iinā ua faaaogāina mo le faaauilumaina o le tulaga o aʻoaʻoga faale-Tusi Paia! E ala i se faasologa o ni āta e faamalamalamaina ai ma ni vitiō pupuu, sa fesoasoani ai i tagata asiasi e malamalama i le auala e puʻeina ai leo ma le auala e saunia ai vitiō. Na latou iloa ai foʻi se mea e uiga i le telē o sailiiliga na faia i le sauniunia o mea e faaaogā i tala, vitiō, ma teuga. Na latou vaaia ai le auala na faamaopoopoina ai le faatulagaina o pulelaa mo tala ma vitiō i se tau faatauvaa ae e matuā uigaese le auala na faia ai. Na latou molimauina le auala e faaaogāina ai musika ina ia lagona ai e tagata e pei lava o loo iai moni i latou i vaaiga ia o loo latou matamata i ai. Talu mai le 1990 na saunia ai e le Sosaiete ni āta vitiō se sefulu i gagana e 41, e faatāuaina ai matua eseese o le Tusi Paia, e faaopoopo i isi vitiō mo i latou e faaaogāina le Gagana e Faaaogā ai Taga a Amerika.

O le toʻatele na asiasi maimoa atu, na ō i totonu o le Fale e Faavailaau ai Āta, le Matāgaluega Tusiāta, le Auaunaga mo Faamatalaga, lea e saunia ai le toleniga faakomepiuta ma le fesoasoani i le tausiga o komepiuta, le Matāgaluega mo le Auaunaga, lea e vaavaaia le galuega a faapotopotoga e 11,242 ma le 572 o ovasia femalagaaʻi, ma le Matāgaluega o Fetusiaʻiga, o iinā o loo gafa ma le avatua o faamatalaga i fesili e tusa ma le 14,000 e faatatau i mataupu eseese i tausaga taʻitasi. Na matuā maofa lava i latou ona o iloiloga na faia i tusi e aauina atu i fafo, faapea ma le manatu mamafa moni ia i latou o ē e faaalia i a latou fesili, o loo latou taumafai e faafesagaʻia ni faafitauli matuiā.

O le toʻatele o i latou e gasolo atu pea e maimoa, na latou asiasi atu foʻi i le Matāgaluega o Faaliliuga. Sa matuā maofa lava i latou ina ua iloa e faapea, talu mai le lima tausaga ua mavae, e 102 isi gagana na faaopoopo atu i le aofaʻi o gagana ia na lomia ai e le Sosaiete lomiga faale-Tusi Paia. I le lalolagi aoao, pe ā ma le 80 pasene o Molimau a Ieova e faitau i lomiga a le Sosaiete i isi gagana e ese ai mai le faa-Peretania. Ina ia faafetaiaʻia o latou manaʻoga, o loo iai le sili atu i le 1,700 le aufaigaluega tauofo o loo galulue i le galuega faaliliu i atunuu e 100. Na faaalia ai foʻi i āta na maimoaina Le Olomatamata i gagana a tagata o atunuu o Amerika, Europa, Asia, ma Aferika. Sa mafai foʻi ona vaaia ai e le ʻau asiasi le faaliliuga o le New World Translation o le Tusi Paia i gagana e 31 ia ua lomia ai. Na latou iloa ai foʻi e faapea, ua maua nei lomiga a le Olo Matamata i gagana e 332 ma ua lomia foʻi le polosiua O le ā e Manaomia e le Atua Mai ia i Tatou? i gagana e 219 o nei gagana.

O i latou na asiasi atu i le Matāgaluega Tau Tulafono, na faailoa atu i ai vala eseese o le galuega i le lalolagi aoao o loo manaʻomia ona uaʻi atu i ai faaletulafono. I se vitiō, na latou matamata totino ai i se faamasinoga moni na aafia ai se tuigā toto na finauina e se loia Molimau. Na latou iloa ai foʻi le mea ua faia ina ia tatala ai pea le ala mo le talaʻia o le tala lelei i le lautele. (Filipi 1:7) Na uaʻi atu ai foʻi manatu i le faaiʻuga na faia ia Mati o le tausaga lenei, i se fale faamasino itumalo, na faatonuina ai le aai o Oradell, i New Jersey, i le Iunaite Setete o Amerika ina ia suia ana tulafono e aveesea ai le manaʻoga mo le tuuina atu o ni pemita ma ni pine fatafata e faatagaina ai Molimau a Ieova o ē e mananaʻo e auai i la latou faiva mo le lautele mai lea fale i lea fale i lena nuu.

E lē ona pau na o mea na matamata i ai le ʻau asiasi. Sa latou iloiloina foʻi āta o fale na fausia o loo faaalia i le Precast Shop ma asiasia foʻi le fale e Faamamāina ai Vai Palapalā, le Fale Eletise, le Fale e Faamamā ai le Vai, ma le anoanoaʻi o fale e toe faafou ai ma tausia ai le tulaga lelei o mea, faapea ma isi fale. Sa avea lea o se avanoa tutasi i le olaga.

Ua Faatāuaina e le Polokalame o le Faapaiaga le Aʻoaʻoga Tauatua

O le polokalame lava ia o le faapaiaga na faia i le Aso Lulu, Me 19, na amataina i le itula e 4:00 i le afiafi. O se aofia olioli e 6,929 na aofia ai ma sui o le aufaigaluega i le ofisa ulu, o malo a le Sosaiete, ma le 372 o ē na faapotopoto i le lālā i Kanata lea na faafesootaʻi atu e ala i telefoni.

Sa matuā faafiafiaina le aofia e faafofoga atu i upu faafeiloaʻi faamāfanafana loto a Milton G. Henschel, le peresitene o le Sosaiete o le Olo Matamata. Ona sosoo ai lea ma le faafeiloaʻi atu e Theodore Jaracz, o se sui o le Vaega Pule ma o le taʻitaʻifono o le sauniga, ia William Malenfant. I le fofogaina mai o “Mea Tāua o le Polokalame o le Fauga Fale,” sa ia faatalanoaina ai ni uso se toʻatolu o ē na faia ni sao tāua i le atiina aʻe, tusia o le āta, faapea ma le fausiaina o le Nofoaga Tau Aʻoaʻoga a le Sosaiete. I le faagasologa o faatalanoaga, na taʻua ai e faapea talu mai tausaga o le fausiaina o le fale lava ia, e sili atu i le 8,700 le aufaigaluega lē tumau na ō mai i a latou lava tupe e galulue i le fausiaina o le fale. Maʻeu se molimau lelei i le autasi ma le limafoaʻi na mafaia ona o aʻoaʻoga tauatua!

Ona sosoo ai lea ma le lauga faasolo na faamatuaina, “Aʻoaʻoga Tauatua i le Lalolagi Aoao.” Na fofogaina atu lenei lauga e sui e toʻafā o le Vaega Pule. Na faamamafa e John E. Barr e faapea, o aʻoaʻoga tauatua o loo iai lona faavae i le Afioga a le Atua, le Tusi Paia, lea e faalaeiʻauina ai Kerisiano ina ia “fua mai galuega lelei uma lava, ma ia tupu pea lo outou iloa lelei o le Atua.” (Kolose 1:10) Na talanoaina e Daniel Sydlik le auala o loo faamaopoopoina ai faatiokarate aʻoaʻoga tauatua mai le ulu o le faapotopotoga Kerisiano, o Iesu Keriso, ma oo atu ai lava i sui taʻitoʻatasi o le auuso i le lalolagi aoao. (1 Korinito 12:12-27) O vaega faaiʻu e lua o le lauga faasolo, na fofogaina atu e Gerrit Lösch ma Carey Barber, na faailoa mai ai le auala na faaagavaaina ai e aʻoaʻoga tauatua ia faifeʻau ina ia oo atu i tagata i so o se vaipanoa ma faatonuina i latou ina ia savavali foʻi i latou i le ala a le Atua.—Isaia 2:1-4; 2 Korinito 3:5.

Ina ia faamasani le aofia i aʻoga eseese ia o loo faagaoioia i lenei nofoaga tau aʻoaʻoga, na faia ai ni faatalanoaga ma ni talanoaga ma faiaʻoga faapea foʻi ma isi na aofia i le faagaoioia o na aʻoga. Na faaalia mai ai foʻi le vaega a aʻoga taʻitasi i le faatinoina o le polokalame o le aʻoaʻoga tauatua i le lalolagi aoao. Na faasino mai ai e faapea, o le Aʻoga o Kiliata o loo taulaʻi atu i le suʻesuʻeina o tusi taʻitasi o le Tusi Paia, i le talafaasolopito faaonaponei o tagata o Ieova, faapea ma le sauniuni atu mo le auaunaga faamisionare. O le aʻoga mo sui o lālā, o se suʻesuʻega matagofie e faamalamalamaina ai vala eseese o le galuega lea e aafia ai sui o Komiti o Lālā. O le Aʻoga mo Ovasia Femalagaaʻi ua fuafuaina e lē na o le faamalieina o manaʻoga o uso femalagaaʻi, ae ia faaauupegaina ai foʻi i latou ina ia avatu le ituaiga o fesoasoani faaleagaga lea o le a aogā faapitoa i faapotopotoga.

I le faaiʻuina o le polokalame matagofie, na saunoa ai loa Lloyd Barry o le Vaega Pule i le lauga o le faapaiaga i le mataupu “Ati Aʻe Faatasi ma Lē Sili na Foafoaina i Tatou.” Na ia taʻua mai e faapea, e fiafia Lē na Foafoaina Mea, o Ieova i ana foafoaga uma ma ua ia valaaulia i tatou ina ia ʻoliʻoli faatasi ma ia. (Isaia 65:18) Talu ai o ‘lē na faia mea uma lava o le Atua lea,’ o Ieova le Atua la e sili ona avatu i ai le viiga mo le fausiaina o nei fale uma. (Eperu 3:4) I le faaleoina mai o na manatu, na fofogaina ai e le failauga se tatalo mai le loto, e tuuina atu ai le Nofoaga Tau Aʻoaʻoga a le Olomatamata ia Ieova Lē Sili na Faia i tatou.a

E leai se masalosalo e faapea, o le vaiaso atoa o tausamiga, o le a manatua pea mo se taimi umi e i latou na auai. Aiseā e lē fuafua ai e asiasi atu i le Nofoaga Tau Aʻoaʻoga a le Olomatamata? Matou te mautinoa, o le asiasi atu ma le maimoaina o lenei fale, o le a avea o se faalaeiʻauga mo au taumafaiga ina ia iloa atili ai e uiga i Lē na Foafoaina i tatou e alofa, ma ia ola e tusa ai ma ana tapulaa amiotonu.

[Faaopoopoga i lalo]

[Ata i le itulau 10]

O se fale na matuā patutuʻi ma se aofia matuā toʻatele i le potu o taumafataga

[Ata i le itulau 10]

O asiasiga ma maimoaga sa avea o se vala faapitoa e ʻoliʻoli ai