Ua Aʻoaʻoina i Tatou e Ieova
1 E ala i le taʻitaʻiga tauatua, o loo iai nei i atunuu e 233 se polokalame faaleaoaoga faava-o-atunuu. E leai se mea ua mafai ona ofoina mai e lenei lalolagi e mafai ona faatusatusa atu i lea polokalame. O loo aʻoaʻoina ai i tatou e lo tatou Faiaoga Sili o Ieova i le auala e mafai e i tatou lava ona maua ai aogā i le taimi nei a o ia aʻoaʻoina foi i tatou mo le ola e faavavau—Isa. 30:20; 48:17.
2 Aʻoga o Aʻoaʻoga Faaleatua: Seʻi manatu i aʻoga o loo faagasolo i le taimi nei mo le lelei o tagata o Ieova. O le Aʻoga o le Faiva Faatiokarate, o loo faia i vaiaso taitasi i faapotopotoga e 87,000, e toleni ai le faitau miliona o tagata talaʻi o le Malo ina ia avea o ni faifeau uigā o le tala lelei. Po ua tusia ai lou igoa i lena aʻoga? Po o oe o se tasi o le faitauafe o tagata o ē na auai i le Aʻoga mo le Auaunaga Paeonia na faia mo le lua vaiaso? Atonu o le faaitiitia o itula manaomia mo paeonia sauatoa o le a mafai ai e nisi tagata ona paeonia ma agavaa ai e auai i lenei aʻoga. O le Aʻoga mo Toleniga i le Faiva e faia mo le lua masina, ua faatinoina nei i gagana autū i le lalolagi aoao, ua faaauupegaina ai toeaina e lei faaipoipo ma auauna o le faiva e lei faaipoipo e tauaveina ni tiute tauave faatiokarate e sili atu. E mai lea taimi i lea taimi, e maua ai e toeaina uma ma auauna o le faiva faatonuga faapitoa i le Aʻoga o le Faiva o le Malo.
3 O fale i le Nofoaga Tutotonu Tau Aʻoaʻoga a le Olomatamata i Patterson, Niu Ioka, ua faaaogaina e faia ai aʻoga faapitoa e tolu, ia ua saunia ai toleniga auiluma faatiokarate. O le polokalame e faia mo le lima masina i le Aʻoga Faale-Tusi Paia a le Olomatamata o Kiliata, ua sauniunia ai faifeau mo le galuega faamisionare i atunuu ese. O sui o Komiti o Lālā mai le lalolagi aoao e auai i se polokalame mo le lua masina, e aʻoaʻoina ai i le faamaopoopoina o lālā. Ia Me 1999 na amataina ai se polokalame fou mo le lua masina mo ovasia femalagaai i se vasega e 48 tagata aʻoga mai le Iunaite Setete ma Kanata. E mautinoa o auauna uma lava a Ieova e maua ai aogā mai le toleniga ua saunia e Ieova e ala i nei aʻoga eseese.
4 Aʻoaʻoina mo le ā le Fuafuaga? Na taʻua e se sui o le Vaega Pule e faapea: “O la tatou polokalame faaleaoaoga lea o loo faia nei, ua fuafuaina ina ia fesoasoani i tagata uma o Ieova i le lalolagi aoao ina ia ausia ai le tulaga lelei o le taʻumatuaina lea o loo faamatalaina i le Faataoto 1:1-4.” Tau ina ia faaauau ona foai mai e Ieova ia i tatou taitoatasi “le laulaufaiva o e ua aʻoaʻoina.”—Isa. 50:4.