Pe E te Maufaatuatuaina Lotu e Faatatau i Faigātaua?

Na faapea mai Alapati, o sē na galue i le vaegaʻau mo le sefulu tausaga: “Na faamanuia i matou e le faifeʻau ma faapea mai, ʻO loo faatasi le Atua ma outou.’ Ae na ou manatu, ʻO lea ou te alu e fasioti tagata, peitaʻi ua faapea mai le Tusi Paia, “aua e te fasioti tagata.”’”

Na galue Ray i le fuāvaa i le Taua Lona Lua a le Lalolagi. Sa iai se taimi na ia fesili ai i le faifeʻau: “O lea e te sau e tatalo mo i matou, ma tatalo foʻi mo le manumalo. Pe e lē o le mea foʻi lenā o loo faia e o tatou fili?” Ae na tali mai le faifeʻau, e lē mailoa auala e galue ai le Alii.

Afai e lē o faamalieina oe i lenā tali, e lē na o oe ua oo iai na faalogona.

AʻOAʻOGA A LE TUSI PAIA

Na taʻua e Iesu se tasi o poloaʻiga e sili ona tāua a le Atua e faapea: “Ia e alofa atu i lou tuaoi e pei o oe lava iā te oe.” (Mareko 12:31) Pe na uiga atu Iesu e faatapulaa le alofa e faaalia i le tuaoi pe afai e ese le ituaiga po o le atunuu e sau ai? E leai. Na ia faapea atu i ona soo: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:34, 35) E tatau ona iai se faamaoniga e iloa ai le matilatila o lo latou alofa. O Kerisiano moni, e latou te lē faia le fasioti tagata, ae e latou te lotomalilie e maliliu mo isi.

Na ola uluaʻi Kerisiano e tusa ma upu a Iesu. Ua taʻua i le The Encyclopedia of Religion e faapea: “O faatamā o le lotu, e aofia ai Tetuliano ma Origen, na la ioe e faapea, sa teena e Kerisiano le fasiotia o le ola o se tagata, o se mataupu silisili na puipuia ai i latou mai le auai i vaegaʻau a Roma.”

AE FAAPEFEA MOLIMAU A IEOVA?

E toetoe o atunuu uma o loo iai Molimau a Ieova, ma o nisi o loo nonofo i atunuu o loo fetauaʻi. Peitaʻi, e latou te faia taumafaiga uma ina ia faatumauina le faamaoniga o le alofa moni.

O se faataʻitaʻiga, i le 1994 ina ua fetauaʻi le ituaiga o Hutu ma Tutsi i Rwanda, na matuā solitū Molimau a Ieova i na faiga. Na faalalafi e Molimau a Ieova o le isi ituaiga o latou uso o le isi ituaiga, o se gaoioiga e lamatia ai o latou ola. Ina ua maua uso Molimau e toʻalua mai i le ituaiga o Hutu ona o le faalalafiina o o latou uso o le ituaiga o Tutsi, na faapea mai ai se tasi o le ʻautau o Hutu, “E tatau ona lua oti ona o le lua fesoasoani i tagata Tutsi e sosola ese.” E faanoanoa, ona na fasiotia nei uso Molimau e toʻalua.​—Ioane 15:13.

O le ā sou manatu: Po o ōgatusa gaoioiga a Molimau a Ieova ma fetalaiga a Iesu e faatatau i le alofa faataulagaina?