Taulimaina o le Tala Lelei—I Sāvali ma Pepa Lomia
1 Na tusi mai se tamaloa i le Sosaiete, “Sa ou savali ane i tafatafa o se fafine o lē na tuuina mai ia te aʻu se sāvali faale-Tusi Paia. E faitauina, ‘Olaga i se Lalolagi Fou Filemu.’ Sa ou mafatia a o oʻu leʻi faitauina, ae mulimuli ane sa matuā faagaeeina aʻu ma toafilemu.” Na manao le tamaloa mo ni faamatalaga atili ma na tusi mai ai, e faapea: “O loo oʻu faatalitalia ma le naunau le tusi, ‘E Mafai ona E Ola e Faavavau i Parataiso i Le Lalolagi’ mai ia te outou.”
2 O le mea moni, o le toatele o loo faamanū atu nei ia Ieova sa faaosofia lo latou mataʻai faaleagaga i sāvali ma le feau faale-Tusi Paia ua lomia i tua o a tatou pepa lomia. O ē faaaogāina ea sāvali ma pepa lomia i lau faiva? E toatele o loo faia faapea. I le Iunaite Setete lava latou, e silia i le 122 miliona sāvali Olaga i se Lalolagi Fou Filemu ua lomia ai, atoa ma le tusa o le 250 miliona kopi o isi sāvali e tolu, Le Pogai e Mafai ai ona E Faatuatua i le Tusi Paia, O Ā Mea e Talitonu i ai Molimau a Ieova? ma O le ā le Faamoemoe mo Ē Pele ua Maliliu? E silia i le 12 miliona pepa lomia ua auina atu foi i faapotopotoga i inā i tausaga taitasi.
3 E lē tatau ona tatou manatu faatauvaa i le malosi o le Afioga a le Atua e pei ona faamatalaina i ia feau pupuu. (Epe. 4:12; faatusatusa Sakaria 4:10; Iakopo 3:4, 5.) Na tusi mai se Molimau i le Iunaite Setete: “Sa ou faitauina le tele o sāvali mai le Sosaiete o le Olo Matamata, ma oo ai ina ou aʻoaʻoina le upu moni.” Na ia faamatalaina: “I lenei lalolagi faatopelau, e masani a ona lē mananao tagata e faaalu se taimi tele e faitau ai, ae ua lava ma totoe le uumi o sāvali e maua ai se feau tāua ae lē umī nauā e ono toe fulitua ai tagata e aunoa ma lo latou tagaʻi ai.”
4 Mo mafuaaga eseese, e masani ai ona faatalatū tagata e ave lomiga mai ia i tatou. Ae toatele e nofogofie i le taliaina e tau o se sāvali. Ua faamatalaina e se tasi o ovasia matagaluega faapea e iai sana tamaʻi pepa lila e taofia ai mea ma faaali atu ai sāvali, e tuu ai i lē ona le fale e filifili po o lē fea e fiafia i ai. “O le sāvali lava na muamua filifilia,” e tusa ai ma lana tusi, “O Ā Mea e Talitonu i ai Molimau a Ieova?”
I LE ULUAI FEILOAIGA
5 Ua iloa e nisi tagata talaʻi faapea o le tuuina atu o se sāvali po o se pepa lomia o se auala uigā lea e amata ai ni talanoaga. I le ofoina o se tasi, atonu o le a uunaia ai se tagata o le aiga o lē e musu e tatala le faitotoa e tatala mai. O le faaalia i ai o le faasologa o sauniga lena ua faaauivi mai i le pepa lomia e mafai ai ona tatala le avanoa i se talanoaga o la tatou galuega ma lona fuafuaga.
6 Afai e manino mai o loo pisi lē ona le fale pe o loo mafatia, atonu na pau le mea e manaomia o se sāvali. O se tasi o fafine sa matuā faamafanafanaina i le sāvali e uiga i le faamoemoe mo ē ua maliliu, o lea na ia tusi mai ai i le Sosaiete mo ni faamatalaga atili. A lē maua atu se tasi i le aiga, e mafai ona tuu se sāvali mo lē ona le fale i se mea e lē mafai ona iloa atu e tagata feoai.
I TOE ASIGA
7 E mafai ona faapea atu se tasi, pe a toe asia sē na faaalia muamua le naunau: “Talofa, [taʻu lou igoa]. Ua ou matuā fiafia lava e maua mai oe i le aiga. Ina ua ta feiloai muamua, sa ou maofa ona o lou faaaluina o le taimi e talatalanoa ai e uiga i le Tusi Paia. O loo ia te aʻu nisi o faamatalaga faaopoopo ou te manatu atonu e te naunau i ai. O loo maua i lenei sāvali, Olaga i se Lalolagi Fou Filemu. Afai e te manatua, sa ta talanoa i le taimi ua mavae e uiga i le folafolaga a le Tusi Paia i le filemu moni e faavavau mo le fanau a tagata. Peitai, ona e na o le lagi lava e manatu i ai tagata pe a latou faitauina nei folafolaga, matau o loo faaalia i le Salamo 37:29 faapea o le a oo mai ia faamanuiaga i luga o le lalolagi. [Faitau le mau, ma faaali i lē ona le fale le mea o loo iai i le sāvali.] E lē manaia ea lena i le faalogo? [Talatalanoa i nisi o palakalafa.] O loo iai nisi mau faalaeiau i lenei sāvali, ma o le a e iloa e tutusa uma lo latou aogā. O le isi taimi ou te sau ai, atonu e mafai ona ta faitauina faatasi nisi o na mau e pei ona ta faia i le asō.”
8 E moni, o a tatou sāvali ma pepa lomia o ni meaalofa mai ia Ieova. Talosia ia tatou faaaogāina ma le tomai nei fesoasoani tautele a o tatou tauaveina se faiva uigā e iʻu i lona viiga ma lo tatou manuia e faavavau.—Faata. 22:29.