Pusa Fesili

◼ E faapefea ona tatou iloa le tagata e tatau ona tuu i ai se lomiga?

O le mea e sili ona tāua ia iloilo, o le fiafia o le tagata. Pe afai e faaalia e le tagata le fiafia moni, e tatou te ono tuuina atu iā te ia ni mekasini se lua, se polosiua, se tusi, po o se isi lomiga o loo tatou ofoina. E mafai ona faia faapea e tusa pe e tatou te iloa, e itiiti pe e leai sana tupe e foaʻi mo le galuega talaʻi i le lalolagi aoao. (Iopu 34:19; Faaa. 22:17) I le isi itu, e tatou te lē tuuina atu a tatou lomiga e matuā tāua, i ē e latou te lē talisapaiaina.—Mata. 7:6.

E faaalia faapefea e fiafia le tagata o le aiga? O le lotomalie e tatou te talanoa, o se faailoga lelei lenā. O le uaʻi totoʻa mai a o tatou talanoa atu, tali mai i fesili ma faailoa mai sona manatu, e faaalia ai o loo aofia o ia i le talanoaga. Pe afai e mulimuli mai a o tatou faitauina le Tusi Paia, e taʻu mai ai e tāua iā te ia le Afioga a le Atua. O le tulaga masani, e lelei ona tatou fesili atu i le tagata pe faamata o le a ia faitauina le lomiga o le a tuu atu. E tatau i le ʻautalaʻi ona faaaogā le faautaga poto ina ia iloa ai pe e fiafia le tagata o le aiga. O se faaaʻoaʻoga, pe a molimau atu i alatetele, e lē tatau ona tufa faasoloatoa atu mekasini, polosiua po o tusi i tagata uma lava e pāsia i tatou. Pe afai e tatou te lē o iloa pe fiafia le tagata, e lelei la pe a tuu atu i ai se tusi valaaulia po o se sāvali.

E tatau foʻi ona fua le aofaʻi o lomiga e ave e se tagata talaʻi mai le potu tusi, i le tele o loo ia manaʻomia e ave i le talaʻiga, ae e lē fua i le aofaʻi o lana meaalofa tauofo o loo foaʻi. E lē o foaʻiina meaalofa tauofo ina ia totogi ai lomiga, ae ina ia lagolagoina ai vala uma o le galuega talaʻi i le lalolagi aoao. E tusa lava po o le ā lo tatou tulaga tautupe, ae o le talisapaia o le a uunaʻia ai i tatou e foaʻi mea ua tatou maua, ina ia lagolagoina ai mea e fesootaʻi atu i le Malo, nai lo o le faatali seʻiloga ua maua se tupe faasili. (Mare. 12:41-44; 2 Kori. 9:7) O le a uunaʻia ai foʻi i tatou e ave na o lomiga e tatou te manaʻomia, ma ʻalofia ai le faamaʻimau o tupe o loo foaʻi e lolomi ai lomiga.

[Faamatalaga faaopoopo i le itulau 2]

E tatau i le ʻautalaʻi ona faaaogā le faautaga poto ina ia iloa ai pe e fiafia le tagata o le aiga