Pusa Fesili

● Pe tatau ona tatou faaalia i lē ona le fale lo tatou naunau e talia sina meaalofa mo le galuega a le Sosaiete i le lalolagi aoao i taimi taitasi tatou te asiasi atu ai ia te ia?

Leai. Na taʻua i le mataupu o La Tatou Faiva o le Malo ia Me 1990 “Faaaogā a Tatou Lomiga ma le Atamai”: “I nisi tulaga, atonu e faamaasiasi le talanoaina o le mataupu o tauofo mo la tatou galuega i le lalolagi aoao.” E manaomia ai ona faaaogā se faaiʻuga lelei i lenei itu. Tatou te mananao ia manino i mafaufau o tagata, o la tatou galuega o se galuega moni tau aʻoaʻoga faale-Tusi Paia ae lē o se galuega faapisinisi. Tatou te lē aoina ni meaalofa.

E masani a ona lelei le faamatala manino o le auala ua lagolagoina ai la tatou galuega i foai faameaalofa i le uluai taimi tatou te tuua ai lomiga i ē fiafia. Afai e teu i o tatou manatu faapea na o i latou lava e faaalia le fiafia po o ē e faaalia se faanaunauga e faitau a tatou lomiga tatou te tuua ai lomiga, ona tausia ai lea o lenei itu i le auala ua masani ai.

Ua taulamua le toatele o na tagata fiafia e ofo mai ni foai faameaalofa i asiasiga e sosoo ane ai. O isi atonu e fesili mai pe fia le tau o le lomiga. E mafai ona tatou taʻua puupuu i ai o la tatou galuega e lē o se galuega faapisinisi, ma faamatala i ai o loo tatou ofoina a tatou lomiga i ē fiafia e aunoa ma se totogi. E mafai foi ona faailoa ia i latou faapea so o se tasi e faanaunau e lagolagoina lenei galuega i le lalolagi aoao e mafai ona faia sana foai faameaalofa. Pe a talafeagai, mai lea taimi i lea taimi, e mafai ona tatou lagā le lagolagoina o le galuega a le Sosaiete i le lalolagi aoao pe afai e lē faia faapea e le tagata o loo tatou asiasi atu i ai.

E ao ona teu i o tatou manatu faapea e ui lava ina tatou ofoina a tatou lomiga i ē fiafia e aunoa ma se totogi, ae e tele tupe ua aofia ai i le lomia ma le tufatufaina o a tatou lomiga. Tatou te mautinoa o le a uunaia e le agaga o le Atua ana auauna ma ē fiafia e maua i le fanua e faia ni foai faameaalofa e totogi ai le tau o vaega eseese o le galuega i le lalolagi aoao.