Taliaina la Tatou Avega Tauave ia Faia Mea Lelei i Isi

¹ Sa apoapoai atu le aposetolo o Paulo i Kerisiano o le uluai senituri: “Aua neʻi galo le faia o mea lelei ma le fetufaai o mea ma isi.” (Epe. 13:16, NW) O a latou taumafaiga fesoasoani i o latou uso e oo lava foi i tulaga faigata o le a faamalosia ai lo latou alofa mo le Atua, ma le tasi i le isi. (Ioane 13:35) Ua faapea foi ona faalaeiauina i tatou e faia mea lelei ma fetufaai ma isi.

² I lenei tulaga, ua faia ai e Ieova se sauniuniga mo i tatou ina ia lelei ona fafagaina faaleagaga ma lelei ona faaauupegaina. Maeu le tamaoaiga o faamatalaga ua tatou maua mai i Olomatamata ma Awake! taitasi. Maeu se olioli tatou te maua i le faitauina o lomiga taitasi i le vave e mafai ai pe a taunuu mai! I le mafaufau loloto i faamatalaga faale-Tusi Paia, atonu tatou te faia ai ni faamaumauga o manatu e faaaogā i le faiva i le fanua faapea ma a tatou talanoaga ma isi. E mafai foi ona tatou faatau mai le taimi e sauniuni ai mo sauniga taitasi ae maise lava mo le iloiloga faalevaiaso o Le Olomatamata. O le a fesoasoani ia i tatou se suesuega totino o le Afioga a le Atua e atiina aʻe ai “le finagalo o Keriso” ma mafai ai ona tatou faasoa atu mea e logolelei ia i latou tatou te feiloai.—1 Kori. 2:14-16; Sala. 19:14.

³ E Aogā le Taliaina o Avega Tauave: O i latou uma lava o ē alolofa ia Ieova e tuuina atu o latou ola ia te ia. I le taliaina o avega tauave ua fesootai ma le tuuina atu, tatou te faaalia ai o i tatou e mo Ieova ma ua vavaeesea mai i tatou lava nai le lalolagi a Satani ma ona ala fouvale. I le mulimuli i le faaaʻoaʻoga na tuu e Iesu Keriso, ua tatou faataatia ai se faataʻitaʻiga lelei mo isi. (1 Pete. 2:21) O polokalama mo fonotaga matagaluega e pei o lea ua faaauivi mai mo le tausaga faaleauaunaga o le 1992, faatasi ma lona matua “Tauaveina la Tatou Avega o Tiute Tauave,” ua faalaeiau ai i tatou ina ia ola e tusa ma lo tatou tuuina atu.

⁴ O le auai e lē aunoa i sauniga a le faapotopotoga ua faaavanoa ai i tatou e fetufaai ma isi manatu e atiina aʻe ai. O la tatou suesuega totino ma sauniuniga mo sauniga e saunia ai i tatou i le tele o faamatalaga lelei e mafai ona tatou fetufaai ai. O le faaalia o sea naunau totino i isi e siitia ai se agaga faaleaiga e mafana, ma faaleuo. I le faia o se sao i sauniga, tatou te faaalia ai tatou te ioe faatasi ma upu a Paulo ua faamauina i le Eperu 10:24,25 ma taliaina ai la tatou avega tauave ia faalaeiau i isi.

⁵ Aapa Atu mo ni Avega Tauave Faaopoopo: I le tausaga faaleuaunaga o le 1992, pe mafai ona tatou aapa atu mo ni avega tauave faaopoopo, e pei o le auaunaga faapaeonia lagolago po o le paeonia sauatoa? Na i lo o le soona manatu mamafa faaletatau i itula e manaomia, aiseā e lē taulaʻi ai manatu i avanoa ua faateleina e saosaolaumea ai i le galuega o le aoaoina? (Ioane 4:35, 36) O le galulue e lē aunoa ma isi tagata talaʻi agavaa ma paeonia o le a fesoasoani ai ia i tatou e faaleleia o tatou tomai i le faiva. O le a avea foi se aofaiga faateleina o paeonia lagolago o se faagaeega aogā i le faapotopotoga. Afai e mafai, aiseā e lē talosaga ai e avea ma paeonia sauatoa pe fuafua e fai ma paeonia lagolago i se faavae faifai pea pe i le tele e mafai ai i lenei tausaga?

⁶ Ua uma ona saunia avega tauave e faasalafa atu i tane agavaa ua tuuina atu ma papatisoina o le faapotopotoga. (1 Timo. 3:1-10, 12, 13) E mafai ona faaalia e tagata uma lo latou lotomalie e auauna e ala i tali ua mafaufauina lelei i sauniga, le auai i le Aʻoga o le Faiva Faatiokarate, ma le taliaina o tofiga ina ia faia se faataʻitaʻiga po o le taulimaina foi o isi vaega o le Sauniga o le Auaunaga. E oo foi i fanau e mafai ona fai ma faaaʻoaʻoga lelei i ia auala ma i a latou amio i le Maota o le Malo. E mafai ona aogā i latou i le galulue faatasi ma la latou suesuega tau tusi pe a tofia e faamamāina le Maota o le Malo po o le vaaia o isi manaoga faapena.—km 3/76 itu. 1,8.

⁷ Sa faaalia e Iesu lona lotomalie e talia le avega tauave o le faia o mea lelei i isi i upu ia: “Ou te loto i ai.” (Luka 5:12, 13) I le mulimuli i lana faaaʻoaʻga, e mafai ai foi e i tatou ona faalaeiau ma fesoasoani i o tatou uso o ē naunau, ma tagata loto faamaoni tatou te feiloai i le auaunaga i le fanua ina ia mafuta e lē aunoa ma le faalapotopotoga a Ieova. O le taliaina o la tatou avega tauave o le ‘faia o mea lelei i tagata uma’ e manaomia ai se taumafaiga maumauai ma atonu o se faataulagaina totino i la tatou vaega. (Kala. 6:10) Ae pe a tatou vaaia le lelei o mea ua faataunuuina, e mafai ona tatou ioe faatasi ma Paulo, o lē na faapea mai: “Auā o taulaga faapena e fiafia ai le Atua.”—Epe. 13:16.