Taulimaina o le Tala Lelei—Amataina Suesuega i se Faafeiloaiga Tuusaʻo
1 Sa poloaia i tatou e Iesu e ‘faia soʻo.’ (Mata. 28:19) Ina ia faataunuuina lenei, e masani a ona manaomia ai le amataina o suesuega faale-Tusi Paia ma ē e naunau. I le faaaogāina o se faafeiloaiga tuusaʻo e amata ai suesuega faale-Tusi Paia i le faiva i lea fale ma lea fale, e mafai ona fesoasoani ai ia i tatou e faataunuuina faanatinati lenei galuega. Ua fesoasoani foi lea e mataulia manino ai se fuafuaga tele i le asiasi atu.
2 O le ā tatou te ono taʻua pe a faaaogāina se faafeiloaiga tuusaʻo e amata ai suesuega faale-Tusi Paia? E sili atu se faafeiloaiga e matuā faigofie: Tatou te ono faapea atu: “O loo ou naunau e fesoasoani i tagata ina ia malamalama i le Tusi Paia ma ou te fiafia e suesueina ma oe ma lou aiga i lo outou maota e leai se totogi po o se mea e popole ai. E mafai ona ta faaaogāina lau Tusi Paia. Afai e lē o iai sau Tusi Paia, e mafai ona ou sau ma aumai sau tusi.”
3 Atonu e faapea se isi faafeiloaiga: “O le fuafuaga o loʻu asiasi mai i le asō ina ia ofoina se suesuega o le Tusi Paia i le aiga, lea o le a fesoasoani ia te oe e malamalama ai po o fea o loo agaʻi atu i ai lenei lalolagi ma o le ā ua teuina e le Atua mo i tatou. O le a ou fiafia e faailoa atu ia te oe le auala e mafai ai ona e maua mea e sili ona tele mai lau Tusi Paia. E leai se mea e popole ai po o se totogi.” Afai e malie i ai lē ona le fale, e mafai ona e faaaogāina le tusi E Mafai ona E Ola e Faavavau i Parataiso i Le Lalolagi, atonu e amata i le uluai mataupu.
4 Faaaogā Sāvali Faale-Tusi Paia: Ua iloa e le toatele le aogā o sāvali pe a faaaogāina se faafeiloaiga tuusaʻo. A amata lau taulimaga pe a maeʻa au uluai faafeiloaiga, ia avatu i lē ona le fale le sāvali Olaga i se Lalolagi Fou Filemu o loo tatala ina ia mafai ai ona ia vaai i le ata atoa. Ia uu se isi sāvali i lou lima, ma faitau pe faaupu atu ni fesili i uluai palakalafa e lua. Talanoa i tali, ma faitau se mau e tasi pe lua e lagolago ai. Ona taʻu lea i ai faapea ua e fiafia i le talanoaga, ma fuafua e toe foi atu. Afai e talafeagai, faamatala puupuu i ai la tatou polokalama o suesuega o le Tusi Paia i aiga e fai fua, pe tau ina fuafua e toe asiasi atu ma iloilo atili se manatu i le sāvali.
5 Pe a fuafuaina e toe asia, e lelei ona taʻua o se mea e te lagona o le a naunau i ai lē ona le fale. E mafai ona faia i se faafesili. O le a tuua ai lē ona le fale e tepa taulaʻi atu i le isi au asiasiga e sosoo ai lea o le a taliina ai le fesili.
6 E tulagaese le tusi Ola e Faavavau i le tele o auala. Ua ia tauaaoina aʻoaʻoga faavae o le Tusi Paia i se auala faigofie ma le tuusaʻo ae teena talitonuga sese a Kerisinetoma. O loo tumu i ata e sili ona matagofie e faapea ona aʻoaʻoina ai ma le uigā. Ua faatulagaina i se auala ina ia uunaia ai ē saʻo o latou loto e faia se agaʻigaʻi i luma ma fai ai mo i latou le tapuaiga moni. O lea seʻi o tatou faaaogā tatau uma avanoa e amata ai ni suesuega ma auai i le tofiga ina ia ‘faia soʻo.’—Mata. 24:14; 28:19, 20; Mare. 13:10.