Taulimaina o le Tala Lelei—I Le Faaaogāina o Lomiga ma le Atamai

¹ Sa faatomua i le polokalama o le aso fono faapitoa mo le tausaga faaleauaunaga 1991 se talanoaga i “La Tatou Faiva—E Lē Faasamasamanoa, ae Paia.” Na faamamafa ai faapea o la tatou galuega e paia ma e lē tatau ona tafili saunoa ai. Ona o le faaaogāina o lomiga ua lomia o se vaega e sili ona tāua o la tatou faiva, e ao ai foi i lenei ona tausia ma le faaaloalo. E mafai e i tatou taitoatasi ona faaalia le manatu mamafa ua tatou lagonaina, e ala i le faaaogāina o a tatou lomiga ma le atamai.

² I le tausaga faaleauaunaga 1990, na saunia ai e le Sosaiete mekasini e 678 miliona ma le silia i le 51 miliona Tusi Paia ma tusi faavaa malō mo le faaaogāina i le fanua i le lalolagi aoao. Ua faaalu ai i lea le anoanoai o mea faitino ua tuuina atu, e aofia ai le taimi, malosi, ma tupe. O taumafaiga tuufaatasi a le toatele o ē e tauofo mai ua iʻu ai i le saunia o ni lomiga e sili ona lelei e lē gata mo le faaaogāina totino ae mo le tufatufaina atu i le auaunaga i le fanua. O ā nisi o auala e mafai ai ona tatou faaalia le talisapaia mai le loto mo a tatou lomiga a o tatou faalauiloa atu le feau o le Malo i ē loto faamaoni?

³ Suesuega Totino ma Faaleaiga: Ua faapea mai le aposetolo o Paulo i le Roma 2:21: O “lenei foi, o oe lē aʻoaʻo atu i le tasi tagata, e te le aʻoaʻo ea oe ia te oe?” A tatou faaaluina le taimi e faitau ai, suesue, ma mafaufau loloto i le tatalo i a tatou lomiga ua faavae i le Tusi Paia, tatou te faaalia totino ai i lena le tautele ia i tatou o sauniuiga e talafeagai ma le taimi a Ieova o meaʻai faaleagaga e ala mai i lana vasega o le auauna tausimea. (Luka 12:42) Pe i le suesuega totino po o le suesuega a le aiga, o le piiama pea i upu moni ua faaalia, e mafai ai ona tatou atiina aʻe le manatu mamafa mo mea uma lava ua faatuatuaina mai e Ieova i la tatou tausiga. E ao foi ona toleni faalelei le fanau, e talisapaia ma tausia a latou lomiga, ae aua le soona osiosia pe faaleagaina. E faaopoopo i ai, e ao ona teu faalelei a tatou lomiga ina ia mamā ma matagofie ai pea mo le faaaogāina i le fanua.

⁴ Alofia le Faamāumauina: Ina ia aogā moni, e tatau ona faaoo atu a tatou lomiga i lima o ē o loo saili i le upu moni, o lona uiga, o ē ua naunau moni i la tatou feau ma le galuega. (Mata.10:11) O le mea lea e ao ai ona tatou alofia le soona avatuina o lomiga ia i latou o ē lē faaalia le talisapaia moni mo le feau a le Tusi Paia. E mafai foi ona māumau pe afai tatou te faafaulalāi ai mekasini, tusi, po o isi lomiga i le fale.

⁵ Ona ua faatapulaaina aso o mekasini, e lē umi ai la se vaitaimi tatou te ofoina ai o ni lomiga fou. O lea e manaomia ai se taumafaiga aʻiaʻi i la tatou vaega ina ia ō atu i le faiva ma avatu ia mekasini i ē naunau. Afai tatou te iloa ua faasolo ina faulalaʻi pea a tatou mekasini, atonu e lelei ona fetuutuunai la tatou faasologa ina ia faaalu se taimi e sili atu i le galuega mekasini. Pe afai e lē mafai ona faia lenei mea i se tulaga talafeagai, e ao ona toe fesuiai la tatou ota. I le mulimuli i ia faufautuaga, tatou te faaalia ai o i tatou o ni auauna tausimea faamaoni o le alofa tunoa o le Atua.—1 Kori. 4:2; 1 Pete. 4:10,11; faatusatusa Luka 16:1,10.

⁶ Ua ‘faatuatuaina mai’ e Ieova i ona tagata tuuina atu se avega tauave e sili ona mamafa ma se galuega e aofia ai ‘mea totino’ ia ua pule ai lana ‘auauna tausimea’ faamaoni. (2 Timo. 1:12; Luka 12:42-44,48e; 1 Timo. 6:20) Faatasi ma le talisapaia loloto mo o tatou faaeaga i le auaunaga a le Atua, tau ina ia faaauau pea ona tatou faaaogā ma le atamai a tatou lomiga i le taulimaina o le tala lelei i isi.