Taulimaga e Taliaina Ai
1 O taulimaga e taliaina ai, o taulimaga ia e faaalia manino ai le auala e āfaina ai lē ona le fale, o se mea na te manaomia pe e mafai ona faaaogā. I lau talanoaga atoa, ia fesoasoani i lē ona le fale ina ia iloatino, “O le mea lenei e aafia ai aʻu.” I le sauniunia o se taulimaga, e ao ona tatou fesili ifo ia i tatou lava: ‘O ā mataupu e sili ona faapopoleina ai tagata i laʻu oganuu? O ā o latou manaoga? E mafai faapefea ona ou taulimaina le feau ina ia faaalia ai faapea o loo manatua e Ieova o latou manaoga?’ Ua lisiina mai i lalo nisi o mea o loo matuā naunau i ai tagata i aso nei. Pe mafai ona e faaaogāina se tasi o ia mea po o se mea e tutusa ma lau taulimaga? Ia matau foi pe mafai faapefea ona faafesootai ma manatu mai le tusi Revelation Climax.
2 Manatu Mamafa e Uiga i le Leai o se Fiafiaga: “O loo matou talanoa ma tagata o ē o loo manatu mamafa moni lava i le uiga o le olaga i lo tatou pitonuu. E ui ina atonu o loo maua e tagata mea faaletino e manaomia, ae toatele e lē o fiafia moni lava i a latou mea o loo maua i le olaga. E te manatu ea e mafai ona maua se olaga e fiafia moni? [Faataga mo se tali.] O se tasi o ki i le fiafiaga o loo maua lea i le Tusi Paia i le Faaaliga 1:3. [Faitau.] O le malamalama i mea o fai mai ai le Faaaliga e uiga i le lumanai e mafai ona aumai ai ia te oe le fiafiaga. Ia matau foi na o se tasi o ana valoaga.” Faitau le Faaaliga 21:3,4 ona faasino atu lea i le ata o loo i le itulau e 302 o le tusi Revelation Climax.
3 Manatu Mamafa e Uiga i le Lumanai: “O loo matou taumafai e fetufaai ma o matou tuaoi se manatu mautinoa e uiga i le lumanai. Pe o le auala ea lena o loo e taumafai e manatu ai i le olaga? [Faataga mo se tali.] E tusa ai ma le Tusi Paia, ua ia i tatou se mafuaaga e mautinoa ai, pe afai tatou te faia le mea o fai mai ai le Faaaliga 1:3.”
4 Manatu Mamafa i le Tausia o le Soifua Malōlōina Lelei: “O le toatele o loo i lo tatou vaiaai o loo popole i le tausia o le soifua malōlōina lelei. Peitai, e ui i ni faaeteetega tatou te uia, ae tatou te mafatia lava i maʻi. Pe e te fia ola ea i se lalolagi o le a faapea ona olioli ai tagata uma i le soifua malōlōina e atoatoa ona lelei ma aogā? E ui ina foliga mai e lē matalitonuina, ae o loo tautala le tusi o le Tusi Paia o Faaaliga e uiga i lena taimi ma ua ia taʻu maia ia i tatou faapea o loo iai i le lumanai lata mai.” Faitau le Faaaliga 21:3,4. Ona e faasino loa lea i ai o le ata i itulau 308-309 o le tusi Revelation Climax, e faailoa ai le auala o le a faaaogā ai e tagata sauniuniga mo le ola i le taimi o le Pulega a Keriso o le Afe Tausaga.
5 Manatu Mamafa i le Faaoonaina ma le Siosiomaga: “I talatalanoaga ma o matou tuaoi, ua matou iloa ai e toatele tagata o loo manatu mamafa e uiga i le auala ua faaoonaina ai lo tatou ea, vai, ma meaʻai. Pe e te manatu ea o le a mafai e malo ona taofia lenei tulaga? [Faataga mo se tali.] O se faalaeiauga le matauina o le mea ua fai mai ai le Tusi Paia o le a tupu ia i latou o ē o loo fano ai le lalolagi.” Faitau le Faaaliga 11:18e. Faailoa atu faapea e lē gata ina aveesea i latou o loo fano ai le lalolagi, ae o le fuafuaga a le Atua mo ē agamalu, ia avea le lalolagi ma parataiso, e pei ona faaalia i le Salamo 37:10,11 po o le Isaia 65:21,22.
6 Mo i Latou e Mapo Lotu: “O loo matou fesiligia o matou tuaoi i se fesili: E te manatu ea sa saunia le tusi o Faaaliga ina ia malamalama i ai, pe sa faia ina ia tumau pea ona avea o se mealilo? [Faataga mo se tali.] E toatele latou te ioe i lou manatu. Ia matau le mea ua fai mai ai le Tusi Paia lava ia i le Faaaliga 1:3.”
7 A o e taumafai ma le naunautai e pāʻia loto o ē faalogologo ia te oe, ae o le a tali mai i latou o ē o loo galala mo le upu moni ma le amiotonu.—Mata. 5:3,6.