E Mafai Faapefea ona Ou Maua Sē e Fia Faalogo Mai?
1 I le aai o Filipi, “ua faalogo mai foi . . . le tasi fafine . . . o Litia le igoa, o le faatau ie pāuli, . . . ua tatalaina e le Alii [Ieova] lona loto ia naunau i upu na tautala aʻi Paulo.” (Galu. 16:14) O le ā ua aʻoaʻoina ai i tatou i lenei tala? O le faalogo mai e tatalaina ai le avanoa e aʻoaʻoina ai e se tasi le upu moni. O lo tatou taulau i le tufaina atu o le feau o le Malo e faalagolago tele i le naunau mai o lē ona le fale e faalogo. O le taimi lava tatou te maua ai sē e fia faalogo, e matuā faigofie loa ona faailoa atu la tatou feau. Ae o le mauaina o se tasi e faalogo mai e mafai ona avea o se luʻi. O le ā e mafai ona tatou faia?
2 A o lei ō atu i le fanua, e ao ona tatou tagai totoʻa i o tatou foliga atu ma meafaigaluega o le a tatou faaaogaina. Aisea? Talu ai e sili ona fia faalogo tagata i se tasi e faaaloalo lelei. Pe o lelei ea ma onomea i le vaai o tatou laei? E ui ina taatele i le lalolagi le faatalalē i le faaaogaina o lavalava, ae tatou te alofia lena faatalalē ona o i tatou o faifeau e faaatagia atu ai le Malo o le Atua. O le mamā ma le lelei o o tatou foliga vaaia e faaopoopo ai se molimau lelei i le feau o le Malo lea tatou te talaʻia.
3 Ia Faaleuō ma Faaaloalo: E ui lava ina suia uiga i aso nei, ae e toatele pea tagata e faaaloalo i le Tusi Paia ma o le a tali fiafia mai i se talanoaga e faaaloalo ma faaleuō e uiga i mea ua tusia i le Tusi Paia. O se ʻataʻata mafana ma moni, e mafai ona faatoʻafilemu ai lē ona le fale ma tatala mai ai le avanoa mo se talanoaga lelei. O o tatou uiga lelei ma le tausaafia e ao foi ona atagia atu i la tatou tautala ma la tatou amio, lea e aofia ai lo tatou faalogologo atu ma le faaaloalo i manatu faaalia o lē ona le fale.
4 O la tatou fuafuaga o le tufaina atu o le faamoemoe faale-Tusi Paia i isi. Afai e ia i tatou lena manatu, e ao la ona tatou faamautinoa e logolelei i le faalogo la tatou talanoa atu, ae lē faafinau ma tauluʻiluʻi. E lē manaomia ona faamaumau le taimi e finau ai i se tagata e mautinoa e tetee. (2 Timo. 2:23-25) E mafai ona tatou filifili mai le tele o taulimaga faalaeiau ma talafeagai ua saunia mo i tatou i La Tatou Faiva o le Malo ma le tamai tusi Le Auala e Amata ma Faaauau ai Talanoaga Faale-Tusi Paia. Ioe, e manaomia ona tatou sauniuni lelei i ia taulimaga ina ia mafai ai ona tatou tautatala atu ma le mafana faatasi ma se uiga mautinoa.—1 Pete. 3:15.
5 Pe a mavae la tatou asiasiga, e toaitiiti aiga e mafai ona manatuaina mea tonu na tatou talanoa atu ai. Peitai, e toetoe lava o i latou uma e mafai ona latou manatuaina le uiga faaalia na talanoaina ai le mataupu. E lē tatau ona tatou faagaloina le mana o loo iai i le agalelei ma le agaalofa. E mautinoa e toatele tagata pei ni mamoe o loo iai i la tatou oganuu, o le a faalogo mai i le upu moni e pei ona sa faia e Litia i le uluai senituri. O le tagai totoʻa i o tatou foliga vaaia ma la tatou tautala e mafai ona faalaeiauina ai ē loto faamaoni e faalogo ma le naunautai i le Afioga a le Atua ma taliaina ma le fiafia.—Mare. 4:20.