O le ā Saʻu Tala e Fai ina ia Faagaee Atili ai le Naunau?
1 O se vaega tele o la tatou fuafuaga ia talaʻia le tala lelei, o le faia lea o soʻo, ae lē tau ina tuua o lomiga. O lea, a uma ona maua o ē naunau, e manaomia ona tatou galueaiina ma ia tausia fatu ua totōina, i le faia o la tatou vaega o le atiina aʻe o se siosiomaga lelei e mafai ai e Ieova ona fesoasoani i le tagata e tuputupu aʻe faaleagaga. (1 Kori. 3:6) O le ā sau tala e fai ma sosooga i uluai taulimaga ua faatulagaina i luga? O nisi nei o faufautuaga mo tulaga eseese atonu lua te fetaiai.
2 Galueaiina o le Naunau ua Maua: “Ina ua ta talatalanoa puupuu muamua, sa tele lava au mea na fai, peitai, na faaavanoa lava lou taimi e faaleo mai ai lou manatu mamafa e uiga i le lumanai. E pei ona e manatua, sa ta faitau i le Tusi Paia i le Faaaliga 1:3 faapea ‘ua latalata ona aso atofaina.’ O lena mea e iai sona āuga tuusaʻo i le lumanai o i tatou uma lava. Matau le mea ua fai mai ai le tusi lenei e uiga i lena mau. [Faitau mai le palakalafa 11 i le itulau 17 o le tusi Revelation Climax.] Ua talanoaina e lenei lomiga valoaga uma o loo i le tusi o le Tusi Paia o Faaaliga ma ua faaalia ai le auala e mafai ai ona aogā totino ia i tatou. Faamata e te fiafia e fia iloa atili i ai?”
3 Faaaogāina o le Tusi Revelation Climax e Amata ai se Suesuega Faale-Tusi Paia: “O se mea lelei le toe feiloai ma oe. O loo iai se manatu faaopoopo ou te manao ta te fetufaai ai o loo maua i le tusi sa ou tuua ia te oe, ma e matuā faalaeiauina ai lava. O loo tautala le Tusi Paia e uiga i se ‘tusi taai o le ola’ e fesootai ma i latou o ē o le a ola e faavavau. Pe e te fia iloaina ea igoa o loo iai i lena tusi taai?” Sue i le itulau e 298 o le tusi Revelation Climax. Faitau le palakalafa e 11, ona fai lea o fesili o lena palakalafa. A uma ona iloiloina nisi o palakalafa, ona ofo lea i ai e te toe foi atu e faaauau le talanoaga.
4 Faaaogāina o se Isi Lomiga e Amata ai se Suesuega Faale-Tusi Paia: “Ua ou fiafia e maua mai oe i le aiga i lenei aso. I le taimi mulimuli na ta talanoa ai, sa ta faitau ai i le folafolaga a le Tusi Paia i le Faaaliga 1:3. [Toe faitau.] Matau foi o le fiafiaga sa taʻua i inā e lē faafuasei ona oo mai. E lua ni mea e manaomia: E tatau ona tatou faitau i mea ua fai mai ai le Tusi Paia ma le anaana, po o le faatinoina lea o mea ua tusia ai. O le a fesoasoani lenei polosiua ‘Faauta! Ou te Faia ia Fou Mea Uma Lava’ ina ia sili atu ai ona e fiafia i lou faitauina o le lomiga na ou tuua ia te oe, ona o loo faamatalaina ai i se auala faigofie mea o loo manaomia e le Atua. I le itulau e 30 o loo iai se lisi o fesili e 12 o loo tuufesili ai le toatele o tagata. O lē fea o na fesili e te manao e tali?” A uma le tali mai a lē ona le fale, e mafai ona e sue i le vaega o le polosiua o loo taliina ai le fesili ma amata ai se suesuega faale-Tusi Paia.
5 Faaaogā Ata e Faagaee ai le Naunau: E tele ata manino o loo iai i le tusi Revelation Climax. E mafai ona faamatilatila nei ata e faagaee ai le naunau. Mo se faaaʻoaʻoga, pe a faia se toe asiga, e mafai ona tatou sue i le itulau e 7. Faasino atu i le ata o Ioane i le motu o Patamo. Ua faamatilatila mai e le Faaaliga 1:3 faapea o le faaaliga ia Ioane o se feau fiafia. E faapefea ona faapena pe afai o loo faamatalaina i le Faaaliga ni manu feai ma le faaumatiaga? Ia iloilo le palakalafa 1 ma le 2 i le itulau e 6 o le tusi. E mafai ona faaali i ai ata o loo i itulau mulimuli, atoa ma vaaiga o loo faaalia ai le lalolagi Parataiso i itulau e 302, 308, ma le 309.
6 I toe asiga, e ao ona tatou atiina aʻe i le faavae sa faataatia i le uluai asiasiga. I le uai totoʻa atu ma le faaeteete i lenei vala o la tatou faiva o le a aumaia ai ni faamanuiaga faaʻoaina mai ia Ieova e lē gata mo i tatou lava ae mo i latou foi o ē faalogo mai ia i tatou.—1 Timo. 4:16.