Taulimaina o le Tala Lelei ma se Uiga Faanatinati
1 Tatou te faaalia lo tatou talisapaia loloto o folafolaga o le Malo o le Atua e ala i le auai ma le loto atoa i le faiva faa-Kerisiano. E manaomia ona faia ai sa tatou vaega i lenei galuega ma se lagona o le faanatinati. Aisea? Talu ai ona e toaitiiti le au faigaluega, ua tulata mai le faaiuga o lenei faiga o mea, ma ua lamatia foi soifua o i latou o loo iai i la tatou oganuu. (Eseki. 3:19; Mata. 9:37, 38) O se tiute tauave mamafa faapea e manaomia ai a tatou taumafaiga silisili ona lelei i le faiva. E mafai faapefea ona tatou faaalia se uiga o le faanatinati e tusa ma la tatou galuega i le fanua? E ala i le muai saunia lelei o taulimaga, e ala i le sailia ma le naunautai o tagata e tusa lava po o fea e maua atu i ai i latou, e ala i le tausisia o se faamaumauga saʻo o i latou uma ua faaalia le naunau, e ala i le toe foi vave atu e tuliloa lea naunau, ma e ala i le manatuaina faapea talu ai o loo aafia ai ola, e tatau ai ia i tatou ona matuā manatu mamafa i la tatou faiva. O fautuaga nei atonu e aogā a o tatou faia ni sauniuniga i le taulimaina o le tala lelei ma se lagona o le faanatinati a o faagasolo Fepuari. O le ofo o so o se tusi tuai o i ai. Ofo le tusi “Ia Oo mai Lou Malo” po o Lou Talavou—Mauaina mai ai Aogā Silisili e sui ai pe afai o loo maua.
2 Pe a ofo le tusi “Ia Oo mai Lou Malo,” atonu e mafai ona e amataina se talanoaga e ala i le faamatalaina puupuu o ni faafitauli o loo tutupu i le vaifanua, ona mafai lea ona e faapea atu:
◼ “Talu ai e faitau miliona tagata o loo tatalo mo le Malo o le Atua ia oo mai, o se fesili la e talafeagai ona fesiligia e faapea: “O le ā le Malo?” Fesili atu i lē ona le fale pe o le ā sona manatu e faatatau i le Malo. Ona taʻu atu lea ia te ia e faapea o lenei tusi o loo aumai ai le tali. Suʻe i le itulau e 8 o le tusi ma faitau le tamaʻi ulutala. Ia talanoaina ni manatu e fesoasoani e faamalamalama ai i lē ona le fale o le Malo o le Atua o se pulega moni lava. Faitau le palakalafa e 8 ma faamautinoa atu i ai o le a e fiafia e toe foi atu i se isi taimi ina ia talanoaina atili nei mataupu faatasi ma ia.
3 Pe a toe foi atu e asia i latou o ē na tuuina ai le tusi “Ia Oo mai Lou Malo,” atonu e mafai ona fai atu faapenei:
◼ “E toatele tagata o loo talitonu o loo iai se Atua, ae ua latou tau manatu faapea: ‘O le ā le ituaiga lumanai o loo finagalo ai o ia mo i tatou? O le ā o le a faataunuuina e le Malo o le Atua pe a faia le finagalo o le Atua i lenei lalolagi e pei ona faia i le lagi?’”[Ia tuu atu se avanoa e tali mai ai.] Faamālō atu ia te ia mo ana tali. Ona mafai lea ona e faaaogaina ata o loo i le itulau e 4 ma le 5 o le tusi o le Poto ma faailoa atu ia te ia nisi o faamanuiaga ua lē o toe mamao ona oo mai lea e ala mai i le Malo o le Atua. Ia ofo atu e toe foi mai ma talanoa atili i auala e mafai ai ona ia olioli i nei faamanuiaga e ala lea i le faia o se suesuega faale-Tusi Paia ma e faaaogaina ai le tusi o le Poto.
4 Pe afai ua e folafola e toe foi atu e faamatala le auala o le a foia ai e le Malo o le Atua faafitauli i aso nei, atonu e mafai ona e faataitaia lenei taulimaga:
◼ “Ua ou faia se taumafaiga faapitoa e toe foi mai ina ia mafai ona faaauau la ta talanoaga i le vaifofo moni mo faafitauli o loo feagai ma tagata. I laʻu asiasiga ua teʻa, sa ta talanoa ai faapea o le Malo o le Atua o se puleaga moni lava. Na ta iloa mai ai foi faapea o le a le pine ona faaoo mai lea e le Atua se iuga i nei mea leaga uma lava o loo feagai ai ma tagata. O le ā sou manatu? O ai o loo faapogaia nei mea leaga uma lava?” [Tuu atu se avanoa e tali mai ai.] Ona mafai lea ona e faaauauina le talanoaga i le taʻu atu i ai o “Satani le Tiapolo o ia lea o loo faaseseina le lalolagi uma lava. Ona o ia o se foafoaga agaga e sili atu le malosi i lo le tagata, pe e te manatu ea e iai se auala e aveesea ai ana taaiga? [Tuu atu le avanoa e tali mai ai.] Faamolemole, seʻi matau le mea ua fai mai ai le Tusi Paia.” Faitau le Faaaliga 20:1-3 ma faamatala atu. Faaaogā ata o loo i le itulau e 4 ma le 5 o le tusi o le Poto, faaali atu tulaga o le a iai pe a aveesea taaiga mai ia Satani. Ofo atu se suesuega faale-Tusi Paia ma taumafai e amata ai lava i lea taimi.
5 Pe a ofo atu le tusi o “Lou Talavou,” atonu e mafai ona e fai atu se faamatalaga faapenei:
◼ “Pe ua e silafia ea o le afa o le faitau aofai o tagata o le lalolagi o i latou ia e i lalo ifo o le luasefulu tausaga le matutua? O i tatou uma lava e tatau ona naunau atu i o tatou talavou i aso nei. E mautinoa o loo naunau mai i ai Lē na Foafoaina Mea ma e finagalo ia olioli i latou i le ola. [Faitau le vaega muamua o le Failauga 11:9.] Ae pe o tatou vaai atu ea o fiafia moni tagata talavou uma i aso nei? O loo feagai i latou ma le tele o omiga i le olaga; e tele mailei ma mea e tausuai ai ua aveesea ai le fiafia. O le tele o o latou faafitauli e mafai ona alofia pe afai latou te iloa le mea o fetalai mai ai Lē na Foafoaina Mea. [Tagai i le tusi Talavou, itulau e 144.] Ua fai le poto ma puipuiga. O le poto e uiga i le Atua ua sili atu ona aogā i lenei taimi. E mafai ona puipuia ai le talavou mai faanoanoaga ma mala. [Faitau le Failauga 11:10 ma faatomua atu le tusi.]” Fai se fuafuaga e toe foi atu e asi. Pe a toe foi atu, ia fuafua e amataina se suesuega faale-Tusi Paia i le tusi o le Poto.
6 Pe a talanoa atu i talavou po o tagata matutua, atonu e mafai ona fai atu le fesili lenei:
◼ “E te talitonu o le ā le faafitauli aupito sili ona tūga o feagai ai ma tagata talavou i aso nei?” Atonu e tele ni tali eseese i ai, e faalagolago i le mea na oo totino i le tagata o lē o e talanoa atu i ai. Pe afai o le lamatia i vailaau faasaina, ia o loo iai mo i tatou le Mataupu 15. Pe afai e manatu se tasi faapea e leai ma se lumanai manuia mo le talavou i aso nei, ua fetaui i ai le Mataupu 24. O le mea moni, e tusa lava po o le ā le tali e ono tuuina mai, e tatau ona iai i o tatou manatu se mataupu talafeagai lelei mai le tusi. Ia faamautinoa ua faia se taumafaiga faapitoa e asia ai i latou o ē na tatou tuua ai le tusi o le Talavou.
7 O se tasi lenei o fautuaga e amata ai se talanoaga:
◼ “I le avea ma matua e mautinoa lava o le a e ioe o le tausia o fanau i aso nei ua aumaia ai le tele o luitau. Ua ou iloa o le tulaga moni lava lena. O le toatele o mātua ua latou tau manatu pe mafai faapefea ona latou mulimuli atu i le fautuaga a le Tusi Paia ia ‘aʻoaʻo le tama e tusa ai ma lona ala,’ o loo maua lea i le Faataoto 22:6. O se fesoasoani lelei tele mo mātua le lomiga lenei, Lou Talavou—Mauaina mai ai Aogā Silisili. Seʻi matau mai nisi nei o matua o ulutala o i le faasologa o mataupu. [Taʻu atu ni nai mataupu e talafeagai ma le oganuu.] Ou te mautinoa o le a e iloa e aogā tele lenei fesoasoani faale-Tusi Paia ia te oe, i le avea o se matua, auā le aʻoaʻoina o lau fanau talavou, e faapena foi ona fiafia tele i ai i latou.” Pe a uma ona ofo atu le tusi o le Talavou, faamatala atu ia i latou la tatou fuafuaga mo le faia fua o suesuega faale-Tusi Paia. Ia fai se fuafuaga e toe foi e asia ma amata se suesuega faale-Tusi Paia pe afai e fiafia i ai, e faaaogā ai le tusi o le Poto.
8 Maeu se faaeaga o le faaaogaina lea o i tatou o se au selesele i ona po nei ma faia le galuega talaʻi faasaoola! Seia tatou faaauau ona faatele ni galuega e fai i le taulimaina o le tala lelei ma le faanatinati lava, ‘i le iloa e faapea e lē faaleaogaina lo tatou tautiga.’—1 Kori. 15:58.