Taulimaina o le Tala Lelei—Ma le Tusi Revelation Climax
1 Na tusia e atalii o Koru e uiga ia Ieova: “Auā o lenei Atua, o lo tatou Atua lava ia e faavavau faavavau lava; o ia lava na te taʻitaʻiina i tatou e oo lava i le oti.” (Sala. 48:14) O na tagata faamaoni sa tuu atu ma le mautinoa lo latou faatuatua ia Ieova, i le ola aʻe o o latou olaga atoa e tusa ma faatonuga tauatua. Maeu ni faaaʻoaʻoga lelei ua latou faataatia mo i tatou! O i latou o loo taʻitaʻia e Ieova i aso nei ua oo i ai le faafouina ma le faapupulaina. (Isaia 58:11) Ua latou alofia le taunuuga o i latou e mulimuli atu i ‘taʻitaʻi tauaso’ o lenei faiga amioleaga o mea, o ē latou te taʻitaʻia o latou tagata i se “lua” o mafatiaga ma le fenuminumiai.—Mata. 15:14.
2 Ua faapitoa lava ona tāua le taʻitaʻiga tauatua i aso nei a o faateleina le fenuminumiai ma le mataʻutia o le lalolagi o loo siomia ai i tatou. E toatele tagata ua femēmēai ma moomoo mo ni tali faamalie loto. Ua talafeagai ai la, ona tatou faalaeiauina i latou e faitau le tusi Revelation Climax! Ua ofoina mai e lenei lomiga se taʻiala tauatua i le faamatalaina o mea tutupu e gatete ai le lalolagi o o tatou aso i le malamalama i valoaga o le Faaaliga. Ona faamatalaga ua aumai ai se mapusaga ma se taʻitaʻiga aogā i le auala e mafai ai e tagata i aso nei ona ola i se olaga e faafiafiaina ai le Atua. E mafai ona tatou ofoina lenei tusi i tagata uma lava i la tatou oganuu o ē malamalama i le faa-Peretania. Afai e lē malamalama lē ona le fale i le faa-Peretania, ofo i ai so o se tusi e 192-itulau i le faa-Samoa.
FAATOMUA LE TUSI REVELATION CLIMAX
3 O se vala mataʻina o le tusi Revelation Climax o ona ata, lea ua avea ma fesoasoani tele i le aʻoaʻo atu. Faaaogā ia ata ma le uigā pe a taulimaina le tusi i le auaunaga i le fanua. Mo se faaaʻoaʻoga, i le itulau e 302 o loo iai se ata manino o faamanuiaga o le Malo. O se vaaiga faalemafaufau lenei a le tusiata i le mea o loo tautalagia i le 2 Peteru 3:13 ma le Faaaliga 21:4, o mau e lua i la tatou Mataupu mo Talanoaga.
4 A uma ona faailoa atu i tatou, e mafai ona tatou amataina se talanoaga i le auala lenei: “Ua matou asiasi mai e talatalanoa i le uiga o mea o loo tutupu ua siomia ai i tatou i le lalolagi i aso nei. E manatu nisi taʻitaʻi o le lalolagi faapea ua tatou tu lata atu i se talutalu fou o le filemu. Pe e te manatu o le a faapea? [Faataga lē ona le fale e tali mai.] A o aliali mai e mafai e malo ona foia nisi o feeseeseaʻiga faapolotiki, ae o uiga o tagata agaʻi i le isi ma le tutupu soo o faiga sauā e foliga mai o loo galue faasaga tau i taumafaiga a le tagata e aumaia le filemu. Peitai, i le 2 Peteru 3:13 ua faamautinoa mai ai e le Tusi Paia ia i tatou se sosaiete o le lalolagi fou o le a faagaoioia i lalo o le pulega faalelagi. [Faitau le mau ma sue le tusi i le itulau 302.] O se ata faafaatusa lena a le tusiata i le mea o loo tautala i ai lenei mau. O le ā o tosina ia te oe i lenei ata? [Faataga mo se tali.] E faatatau i tulaga o le a i ai le lalolagi, ua faapea mai foi le Tusi Paia i le Faaaliga 21:4 [faitau le mau mai le itulau 303, palakalafa 6]. E oo foi i le oti e lē mafai ona ia faaleagaina le filemu o le a faatuina e le Atua.” E mafai ona e maua le matalasi o faatomuaga talafeagai mo lau oganuu i itulau e 9-15 o le tusi Reasoning.
5 E ui ina tatou mananao e faatomua faamanuiaga o le Malo i le taulimaina o le tala lelei, e manaomia foi ona tatou fesoasoani i tagata naunau e talisapaia le feau faanatinati ua folafola mai e Iesu Keriso i le tusi o Faaaliga. O le mea lea, tatou te mananao ai e faaiʻu la tatou talanoaga i se faiga faanatinati ma se ofo e fesoasoani ai i ē loto faamaoni e talisapaia faapea ua toeitiiti ona oo mai lea o le faamasinoga faasaga i lenei faiga o mea ma i latou o ē lagolagoina.
6 O valoaga o le Faaaliga o se puna sili lea e faafouina ai ma olioli. Ua faasalafa atu e Ieova le valaaulia i ē uma e loto faamaoni ia mulimuli atu i lana taʻitaʻiga ma maua ai e i latou lava aogā. Seʻi o tatou ofo atu ia ma le maelega le tusi Revelation Climax ina ia mafai ai ona taʻitaʻia tagata uma lava i le taʻitaʻiga atamai a Ieova.