Faia ni Toe Asiga Uigā
1 O le faia o toe asiga o se vaega tāua lea o la tatou auaunaga o ni ‘ē faigaluega faatasi ma le Atua.’ (1 Kori. 3:6-9) E leai se mea e popole ai fua i le tali mai a lē ona le fale, talu ai ona o loo tatou asiasi atu i se tasi ua uma ona faaalia mai le naunau i le upu moni. O lo tatou sauniuni lelei la, o le a faailoa atu ai se naunau totino faamaoni i lē o loo asiasi atu i ai, a o tatou talatalanoa i se mataupu faagaee loto o le Tusi Paia.
2 Ia patino; fai ni fesili faautauta.
Mai au faamaumauga i le uluai asiasiga, e mafai ona e fesili atu:
◼ “Pe sa e manatunatu atili i folafolaga a le Atua ina ia pulea le lalolagi i le amiotonu?”
E mafai ona faapea se isi fesili:
◼ “Pe e te manatu ea ua sili atu le uigā o lau tatalo ia oo mai le Malo o le Atua, ona o la ta talanoaga faale-Tusi Paia i le vaiaso ua mavae?”
E aogā foi le laufofoga fiafia ma se leo faaleuō i le faaalia o lo tatou naunau faamaoni pe a faia na fesili.
3 Aua le Vavevave: ae Faalogo i Mea o Fai mai ai Lē ona le Fale: Afai tatou te faalogologo i mea o fai mai ai lē ona le fale, ma manatunatu loloto i ai a o leʻi tali atu, o le a iloa ai la lo tatou naunau moni ia te ia o se tagata. E faavae i mea ua ia fai mai ai, e mafai loa ona e ofoina i ai se manatu faale-Tusi Paia e fesootai ma lau asiasiga muamua. Ia sauniuni e aʻoaʻo lē ona le fale i se manatu i taimi taitasi e te asiasi atu ai. Afai e lagā se mataupu e leʻi faatalitalia, ia faaaogā le avanoa lena e avane ai lau tusi Reasoning, e suʻe ai faamatalaga o loo manaomia.
4 Afai e taliaina le “Olomatamata” o Me 15, 1992, e mafai ona e faapea atu:
◼ “I le taimi ua mavae, sa ta talanoa ai e uiga i le lolo i ona po o Noa atoa ma le mea moni ua latalata mai se faaumatiaga faapena. Ae o le a faapefea ona faataunuuina lenei mea? Ia matau le auala na aʻoaʻoina ai e Iesu ona soʻo ina ia tatalo mo se pulega e mafaia moni lava ona foia faafitauli tetele o loo tatou faafesagaʻi i aso nei. [Faitau le Mataio 6:9, 10.] O le ā sou manatu i le mea o le a faataunuuina e le Malo o le Atua? [Faataga mo se tali.] E matuā manaia lava le faamatalaga a le Tusi Paia.” Ona suʻe lea i le Tanielu 2:44. Atonu e te manao e faaaogā ata o loo i le itulau e 12 ma le 13 o le tusi Ola e Faavavau e faailoa atu ai le ituaiga o tulaga e faatalitalia i lalo o le Malo o le Atua.
5 Afai sa e tuuina i ai le “Awake!” o Me 8, 1992, e mafai ona e faapea atu:
◼ “Ina ua ou asiasi mai ia te oe i le taimi ua mavae, sa ta talanoa ai e uiga i tagata o ē ua tuua o latou atunuu moni, ina ia alofia ai le lē faamasinotonu ma mafatiaga. Pe e te manatu ea o liuliualo moni mai le Atua i mea o loo onosaia e tagata mai isi o latou uso a tagata?” E mafai ona e faailoa atu i le tagata le Failauga 4:1 po o le Salamo 72:12-14, e faalagolago i lana tali mai. Ona e suʻe loa lea i le itulau e 15 o le polosiua “Faauta!” ma faitau i ai pe otooto atu foi palakalafa e tolu o loo iai i lena itulau, ma ia faia fesili mo palakalafa taitasi.
6 Seʻi faaauau pea ona tatou faaalia atu le naunau totino ma ia teu i o tatou manatu ni mataupu faagaee loto o le Tusi Paia e talanoa i ai, ina ia taulau ai a tatou toe asiga.