Taulimaga e Faagaee ai le Naunau
1 E ao ona tatou faaalia e lē aunoa le naunau totino mafana, i tagata tatou te feiloai i le faiva i le fanua. O le tapā o so latou taofi e uiga i mataupu, e faaalia ai lo tatou faaaloalo mo o latou manatu. Atonu e mafai e le mataupu tatou te faailoaina atu ma fesili tatou te lagā ona faagaeeina ai o latou mafaufau, ma uunaia ai i latou e mananao ina ia aʻoaʻo atili e uiga i le Atua ma lana fuafuaga mo le fanau a tagata.
2 Ia Setema, o le a uaʻi atu ai o tatou manatu i le upu moni e uiga i le ola e faavavau i inei i le lalolagi, a o tatou ofoina le tusi o Laʻu Tusi o Tala o le Tusi Paia. Faaalu le taimi e autalu totino ai lenei lomiga, ma filifili ni manatu patino e faamatilatila. A talanoaina faamatalaga i le tusi o Tala o le Tusi Paia, ia tatala ma tuu atu i lē ona le fale. Faasino i ni mataupu ma ni ata patino. Ia maelega e faaali atu aogā o lenei lomiga e sili ona faagee loto.
3 A uma ona faailoa atu oe lava ma le mafana, e mafai ona e faapea atu:
◼ “I lenei lalolagi o mea faasaienisi faaonaponei, pe talafeagai ea ona talitonu faapea e mafai e tagata ona ola e faavavau i parataiso i lenei lalolagi? O le ā sou manatu? [Faataga mo se tali.] Matau le taofi o le Tusi Paia i lenei mataupu. [Faitau le Faaaliga 21:3-5.] O le mea moni, o loo faatatau na upu i le lalolagi lenei, ona o le nofoaga lenei o loo maua ai i tatou i tigā, puapuaga ma le oti. [Avane le tusi o Tala o le Tusi Paia ma suʻe i ata o loo i tala e 71 ma le 115.] Maeu se faamoemoe matagofie! Faamata e te fia ola i se lalolagi faapena?” Faitau le tala e 71 ona faitau lea ma le Isaia 11:6-9. E mafai ona maua nisi mau faaopoopo e aogā, i le faaiʻuga o le tala e 115.
4 Pe atonu e te faapea atu:
◼ “O le ā sou manatu i le mea e manaomia e le fanau a tagata ina ia maua ai le filemu moni ma le fiafiaga i lenei lalolagi? [Faataga mo se tali.] Ua faapea mai le Tusi Paia, e tatau ona tatou matataʻu i le Atua ma aloaia o ia o Lē na Foafoaina le lagi ma le lalolagi.” Faitau le Faaaliga 14:7, ona tatala lea o le tusi o Tala o le Tusi Paia i le tala lona 3, ma atonu e te faitauina le palakalafa mulimuli, lena o loo faamatala mai ai e faapea, na foafoaina le lalolagi ina ia aināina e tagata. Afai e faamaonia i le naunau o lē ona le fale se isi talanoaga atili, ona suʻe lea i le tala e 115 ma faamatala atu le auala ua toeitiiti ona aumaia moni ai lea o se parataiso i le lalolagi.
5 Afai e faaalia e lē ona le fale ni masalosaloga e uiga i le faamoemoe o le ola e faavavau i inei i le lalolagi, atonu e te faapea atu:
◼ “E toatele tagata e auai i ou manatu, ae maise lava ona o le tele o puapuaga i le lalolagi. Afai o soifua se Atua, aiseā ua ia faatagaina ai puapuaga? O iai ea se faamatalaga talafeagai e mafai ona e manatu i ai?” E faalagolago i le tali mai, atonu e mafai ona e faaauau e ala i le faaaogāina o le tala e 4 ma le 5 i le tusi o Tala o le Tusi Paia mo se talanoaga atili. E mafai ona maua nisi tali faaopoopo e aogā i lenei fesili, i le tusi Reasoning, itulau e 399-400. I nisi taimi, atonu e talafeagai ai ona tuu le sāvali Olaga i se Lalolagi Fou Filemu.
6 O lo tatou sini, e lē gata ina ia faagaee le naunau i le feau o le Malo, ae ia amata foi ni suesuega faale-Tusi Paia. Maeu se fiafiaga ona ua tatou maua lenei tusi ua matagofie ona mamanuina, o loo faamatalaina ai le upu moni e uiga i le ola e faavavau ma faamamaluina ai Lē Sili na Foafoaina i tatou! Talosia ia tatou faaaogāina tatau e faagaeeina ai le naunau o tagata loto faamaoni tatou te feiloai ia Setema.