Le Upu Moni e Uiga ia Iesu Keriso
1 E eseese manatu o le toatele o tagata i aso nei e uiga ia Iesu Keriso. Ae e mafai ona tatou fesoasoani ia i latou e aʻoaʻoina le upu moni e uiga ia te ia a o tatou faatomuaina le polosiua, Pe Ao ona E Talitonu i le Tolutasi?
2 Ina ia faamautinoa le naunau o tagata o loo tatou talanoa atu i ai, e masani lava ona aogā le faatomua muamua i ai o se sāvali. Ae ina ia fesootai lelei ma le polosiua o le Tolutasi, e mafai ona uigā pe a faaaogā le sāvali, O Ā Mea e Talitonu i ai Molimau a Ieova?
3 O se tasi o faafeiloaiga atonu e faapea:
◼ “E toatele tagata e tau mafaufau pe aisea e asiasi atu ai Molimau a Ieova i fale o tagata ina ia talanoa ma i latou i le Tusi Paia, ma pe faamata e iai se eseesega o o latou talitonuga mai isi lotu. Atonu sa ia te oe foi se manatu faapena. Seʻi mātau le ulutala o lenei sāvali, O Ā Mea e Talitonu i ai Molimau a Ieova?” Faasino i ai le ata o loo i le faavaa, ona faitau lea o le palakalafa muamua ma le lua o i le itulau e 2. Afai e faaalia e le tagata o le aiga le naunau, e mafai ona e faaauau le faitau i le palakalafa lona tolu, ma talanoa i mau o loo iai. Ia faia ni fuafuaga e te toe foi atu ma talanoa atili i le sāvali—atonu i le fesili i ai pe faamata o Iesu o se vaega o le tolutasi, ina ia faatupu aʻe ai se naunau.
4 O se isi faafeiloaiga atonu o se faamatalaga e tai tutusa ma lenei:
◼ “O le toatele lava o tagata i lo tatou vaipanoa e ioe faapea o Iesu Keriso o le tagata lea sa silisili ona tāua i talafaasolopito o tagata. Pe e te ioe i lena tulaga? [Faatali mo se tali.] Ae o le ā le tulaga o loo iai nei o ia? Po o ia ea o le Atua e Ona le Malosi Uma Lava? Po o ia o se vaega o le tolutasi? Pe e te manatu e mafai ona fesoasoani le Tusi Paia ia i tatou i le taliina o na fesili? [Faatali mo se tali.] Mātau le manatu ua taʻua i le Ioane 17:3. [Faitau.] Ua aumaia e le Afioga tusia a le Atua le poto e uiga i le Atua ma Iesu Keriso, lea o le a taitaia atu ai i tatou i le ola e faavavau.” Afai e tali fiafia mai le tagata o le aiga, ona faasino loa lea i ai o ni manatu patino se tasi pe lua ua uma ona e filifilia mai le itulau e 3 o le polosiua Pe Ao ona E Talitonu i le Tolutasi? ina ia faaalia ai le tāua o le iloiloina o mea ua fai mai ai le Tusi Paia e uiga ia Iesu Keriso.
5 Atonu o le a e iloa le aogā o le faaaogāina o nisi o faamatalaga o loo aumaia i itulau e 209-220 o le tusi Reasoning e uiga ia Iesu Keriso, e mafai ona aogā e taliina ai fesili a tagata o aiga pe foia ai foi a latou teteega.
6 Ofoina o le Polosiua o le Tolutasi: Afai e tele le naunau e faagaeeina i le uluai asiasiga po o le toe asiga, ona faailoa atu loa lea i ai o le polosiua o le Tolutasi. E mafai ona e faasino i ai ata ma fesili o loo i le itulau e 2, ma faamatalaga o loo i le itulau e 3 e faatatau i le manaomia ona tagai i lenei mataupu. E mafai ona e faamatilatila i ai se manatu e tasi pe lua mai itulau e 405-426 o le tusi Reasoning.
7 Ia mataalia i avanoa e faalaeiau ai tagata e talia ma faitau le polosiua o le Tolutasi. Ia fesoasoani i tagata naunau latou te aʻoaʻoina le upu moni e uiga ia Iesu Keriso ma ia faatuatua ia te ia ma lona Tamā, ina ia mafai ai foi e i latou ona maua le faamoemoe o le ola e faavavau.—Ioa. 17:3.