Tuliloa ma le Faautauta Ē Naunau i le Vaitaimi o Malōlōga
1 O Tesema o se masina o le a faapena ona tele ai gaoioiga o aso malōlō e fai a le toatele o i latou o ē faaalia le naunau i la tatou feau. O lea la, pe a tuliloa ē na faaalia le naunau, o le a manaomia ai ona tatou faautauta ma atonu ia sauniuni lelei ina ia fana saʻo i le manatu, seʻi vagana ai ua faaalia e lē ona le fale se naunau e faaumiumi le talanoaga.
2 Ia Muai Mafaufau i Mea o le a Tatou Fai atu Ai: E ao pea ona manino i o tatou mafaufau le mea o tatou mananao e fai atu. E manaomia ai i lenei ona toe suʻe atu i a tatou faamaumauga na faia i le uluai asiasiga, ma ia toe faamanatu i o tatou mafaufau, manatu na aofia i le talanoaga ma so o se fesili sa leʻi taliina na tuu atu i lē ona le fale.
3 Afai sa faaaogā le fautuaga i le palakalafa e 5 o le mataupu o loo i luga, pe a toe foi atu, e mafai ona tatou faapea atu:
◼ “I le taimi lenei o le tausaga, e toatele tagata o loo mafaufau i le fanau mai o Keriso. I la tatou talanoaga i le taimi ua mavae, sa ou folafola atu ai lo tatou talanoaina o se mea moni e fiafia ai e uiga i le aai na fanau ai Iesu. Pe sa e iloaina ea na folafola mai e le Tusi Paia pe tusa ma le 700 tausaga muamua atu faapea o le a fanau mai Iesu i Peteleema?” Faatali mo se tali. Pe a uma ona faitau le Mika 5:2, ona e faapea atu lea: “Pe lē o se valoaga ofoofogia ea lena, a ea? Ona o se mea moni faale-Tusi Paia lenei e naunau i ai, pe e te iloa ea ua faapena foi ona faataunuuina valoaga o le Tusi Paia i o tatou aso?” Afai e lava le taimi o le tagata, e mafai ona faaauau le talanoaga i le suʻe i le itulau e 56 o le tusi Ola e Faavavau, ae afai o tele ana feau, e mafai ona tatou fai atu e toe foi atu i se aso ma talanoa atili ma ia.
4 Afai sa tuu ai le sāvali “Po o le a Faasaoina ea Lenei Lalolagi?” e mafai ona tatou faapea atu:
◼ “Seʻi matau le mea o taʻua i inei i le itulau e 3, i lalo o le ulutala ‘Le Faailoga.’ E faatatau lenei i valoaga na fetalai i ai Iesu e faailogaina ai aso e gata ai. [Talanoa ni valoaga se lua po o se tolu ma lē ona le fale.] Pe e mafai ona e fai mai o loo iai ni faamaoniga o le faataunuuina o nei valoaga i o tatou aso?” Afai e faaalia le naunau moni ma pe a lava le taimi, atonu o le a e manao e fautuaina lona suesueina o le tusi Ola e Faavavau. Ia faailoa i ai le matuā auiliiliina e le itulau e 150-153 o le faailoga na tuuina mai e Iesu. Afai sa na o le sāvali na tuu ai, e mafai la ona e tataʻi le talanoaga i se isi sāvali po o se polosiua i le isi asiasiga e pei o le polosiua O Le Malo o le a na Aumaia le Parataiso po o le “Faauta! Ou te Faia ia Fou Mea Uma Lava.”
5 Ofoina o se Suesuega Faale-Tusi Paia i le Aiga: Afai tatou te tuua le tusi Ola e Faavavau i lē ona le fale po ua uma foi ona iai sana tusi, e lelei la ona faataʻitaʻi le faiga o se suesuega faale-Tusi Paia e ala i le faaaogāina o le mataupu 1 po o se isi mataupu o naunau i ai lē ona le fale. E mafai ona faia lenei mea e ala i le suʻe i le faasologa o mataupu ma tuu atu i lē ona le fale e filifili se mataupu e manao i ai. Afai e faagasolo lelei pea le suesuega, ona mafai lea ona toe amata mai le amataga ma mulimuli lelei ai i le faasologa i se taimi mulimuli.
6 Seʻi o tatou sauniuni pea e tuliloa ē uma e faaalia le naunau. E tatau lava ona tatou faautauta ma taumafai pea e faaāva le auala mo se isi asiasiga i le lumanai e ala i le faatutū atu o ni fesili faatupu naunau i le faaiʻuga o talanoaga taitasi. O le a fesoasoani lenei mea ia i tatou ina ia ‘faaauupegaina atoatoa ai i tatou mo galuega lelei uma lava.’—2 Timo. 3:17.