Talaʻi le Auala a le Atua i le Filemu ma le Saogalemu
1 E tele sauniuniga ua faia e tagata mo le filemu ma le saogalemu, ae e leai lava se tasi o nei sauniuniga o faamalieina ai manaoga moni o tagata i le lalolagi aoao. E ui lava o faiga faalotu, faailoga lanu, ma le feitagaʻi o malo, faatasi ma le matapeʻapeʻa ma le fiasili faapolotiki, e foliga mai ua avea o ni papupuni autū mo se lalolagi saogalemu ma le filemu, peitai ua iloa e Kerisiano moni faapea o toʻatugā moni lava, o Satani le Tiapolo, faapea ma le musu o le tagata lava ia e gauai atu ia Ieova le Atua.—Sala. 127:1; Iere. 8:9; 1 Ioane 5:19.
2 Ia Ianuari, o le a tatou taumafai ai e fesoasoani atu i o tatou tuaoi ia iloa, o le auala a le Atua i le filemu ma le saogalemu ua na o lea le auala, ma ua ia Ieova le vaifofo faaiʻu mo faafitauli uma lava o tagata.
3 Faaaogā Sāvali Fou: E mafai ona tatou tufa atu lenei feau e atiina aʻe ai e ala i le faaaogāina o sāvali fou na sa faailoa mai i la tatou Tauaofiaga Itumalo “O Ē Faasusulu atu le Malamalama.” Ia faaalia i se faataʻitaʻiga faigofie le auala e faaaogā ai le Sāvali Nu. 19, Po o le a Faasaoina ea Lenei Lalolagi?, e amata ai se talanoaga ma taʻitaʻiina atu ai i se suesuega faale-Tusi Paia. O le faataunuuga mataʻina o le valoaga a Iesu e uiga i le faaiʻuga o lenei lalolagi, e ao ona tosina mai ai manatu o le toatele.
4 E faitau miliona tagata i aso nei ua maua i le loto mafatia, ma ua latou faanaunau ai mo se taimi o le a faamalōlōina ai, ma se taimi o le filemu moni, saogalemu, ma le soifua lelei. O le Faamafanafanaga mo Ē Loto Mafatia (Sāvali Nu. 20) atonu o le a avea o se puna moni o faalaeiauga mo le toatele.
5 O le Sāvali Nu. 21, Olioli i le Olaga Faaleaiga, ua saunia ai se fautuaga aogā i le mea e mafai ona faia ina ia faaleleia ai le olaga faaleaiga i le taimi nei a o faatalitali atu mo se lumanai matagofie i le lalolagi fou a le Atua.
6 Ua avatu e le Sāvali Nu. 22 se tali tuusaʻo i le fesili O Ai Moni o loo Pulea le Lalolagi? O loo faamatala ai le pogai ua faaaogā ai e tagata ni auala e sili ona matuā leaga e faataugā ma fefasiotiaʻi ai e le tasi le isi e ui lava ina faanaunau le toatele o tagata mo se olaga filemu ma le saogalemu. O loo iai ʻau a agaga leaga i nofoaga faalelagi, ma o le auala sili ona atamai a Satani e faasese ai, o le faatogafitia lea o le toatele ia talitonu faapea e lē o iai moni o ia ma ana temoni.
7 Amata Suesuega Faale-Tusi Paia: Atonu e mafai ona amataina se suesuega faale-Tusi Paia i se sāvali, se polosiua, se mekasini, po o se tusi. Afai e te iloa ua uma ona iai i lē ona le fale se tasi o a tatou lomiga, ia ofo atu ma le faautauta le faia o se faataʻitaʻiga i le auala e mafai ai ona faaaogā e fai ai se suesuega faale-Tusi Paia. O sāvali fou ma le polosiua fou Po o Silasila Alofa mai ea le Atua ia i Tatou? o ni mea faigaluega sili na ona lelei e iloiloina ai po o le ā le tele o le naunau o lē ona le fale ma i le amataina ai o suesuega faale-Tusi Paia. E faaopoopo i lena o tusi, Olaga Faaleaiga, Upu Moni, Agaga Paia po o le Manuia Moni e mafai ona faatomua i le auaunaga i le fanua, pe a faaalia e tagata le naunau moni i le upu moni. E mafai foi ona tatou ofo se tusi faa-Peretania o nei tusi ia i latou o ē tautatala i le faa-Peretania.
8 E na o Lē na Foafoaina Mea, o Ieova le Atua, e mafai ona maua mai ai le saogalemu moni. Tatou te mananao e fesoasoani i le toatele tatou te mafaia ina ia tatala o latou loto ma mafaufau i le moni o le Afioga a le Atua, ma ia taofimau le faamoemoe ua ia folasia mai mo i tatou. Tau ina ia tatou faaaogā lelei fesoasoani tau aʻoaʻo atu ua ia i tatou ina ia talaʻi atu ai le auala a le Atua i le filemu ma le saogalemu.—Isaia 2:3, 4.