Manatu ia i Latou na Faaalia le Naunau
1 Pe a tatou tufaina atu a tatou mekasini ma isi lomiga faatiokarate, ua tatou faasalalauina atu ai i le lautele le feau sa faalauiloa e Iesu Keriso. O lea, e ao ai ona tatou faia se taumafaiga faapitoa e toe asia i latou taitoatasi sa faaalia le naunau.
2 Afai sa e faamatilatilaina se mataupu patino i le Awake! sa fiafia i ai le tagata o le aiga, ia toe fafau aʻe nisi manatu faaopoopo mai le mataupu lava lena pe a e toe foi atu e asia le tagata, e ala i le faaautu o le lua talanoaga i se mau autū e tasi pe atonu foi i le tasi pe lua ni palakalafa. Afai e faaauau pea lona fiafia, faasino i ai faapea e aogā le Awake! i le aiga atoa. O kopi taitasi o lenei mekasini o loo aumaia ai mataupu eseese, e pei o le siosiomaga, faaleleiga totino, faafetaiaia o faafitauli i aso nei, ma fesili e patino i le au talavou. Ae afai e faaalia sona fiafia moni, faailoa i le tagata o le aiga faapea na te mauaina le Awake! e ala i le faia o sana tusiga ma atonu o le a ia mauaina ai kopi e 12 i le ono masina.
3 Ae faapefea pe afai e lē fiafia le tagata e ona le fale i so o se mataupu o le kopi o le Awake! lena e iai? Na i lo o le motusia o le talanoaga, atonu o le avanoa lelei lenei e aʻoaʻo atili ai le tagata e ona le fale e uiga i le galuega a Molimau a Ieova, i le faaaogāina o faamatalaga o loo i le itulau e 206 o le tusi Reasoning.
4 Afai sa e tuua se kopi o “Le Olomatamata” i lau asiasiga talu ai, e ala i le faaaogāina o le 2 Timoteo 3:1-5 ma faamatilatilaina ai faamatalaga o loo i le itulau e 2 o le mekasini, pe a e toe foi atu e asi, atonu e te fai atu se faamatalaga faapenei:
◼ “I la ta talanoaga i le vaiaso talu ai, sa ta talanoa ai i le uiga o mea o loo tutupu i lo tatou siomaga i le lalolagi i aso nei. E foliga mai o le toatele o tagata ua lē fiafia i le Atua ma ana faatulagaga mo le olaga e pei ona folasia mai i le Tusi Paia. I lenei tulaga ua aafia ai uiga faaalia o tagata agaʻi i isi, e pei ona faamatalaina i le 2 Timoteo 3:1-5. Pe e te manatu e iai se mafuaaga tāua tatou te faatalitalia ai ni tulaga lelei i le lumanai?” Pe a uma ona tali mai, atonu e te tatai atu loa i le 2 Peteru 3:13. Ona suʻe lea i itulau e 227-233 o le tusi Reasoning ma faamatilatila mea o le a faia e le Malo o le Atua mo tagata.
5 I lau toe asiga atonu e te matauina ai e lē fiafia lē ona le fale e talatalanoa i lana lotu, i le manatu faapea e patino lea mataupu i le tagata lava ia. E mafai ona e fai atu i ai se faamatalaga e tāli tutusa ma lenei:
◼ “I le tele o lotu o iai nei i se lalolagi ua faaitiitia ona o le faateleina o le saoasaoa o femalagaaiga ma fesootaiga, ua faalogoina ai le tele o talitonuga e tusa lava pe tatou te mananao i ai pe leai. O lea, o le femalamalamaai i manatu o isi tagata, o le a taitaiina atu ai i se fesootaiga uigā i le va o tagata mai talitonuga eseese. Atonu o le a solofua se feitagai e mafua mai i talitonuga faalotu. O le ā sou manatu?” Pe a tali mai le tagata o le aiga, ona e faasino loa lea i ai o le faasologa o mataupu o loo i le tusi o le Mankind’s Search for God.
6 Seʻi o tatou faia so o se taumafaiga e toe asia ai i latou na faaalia le naunau i le upu moni ma fesoasoani ia i latou ina ia latou iloa le ala e taitaiina atu ai i le ola e faavavau.—Ioa. 4:23, 24.