Fafau aʻe se Faatomuaga e Uunaia Ai
1 Ua aogā uma Le Olomatamata ma le Awake! i le totōina o fatu o le upu moni i mafaufau ma loto o le au faitau. O le mea lea tatou te mananao ai e fafau aʻe ni auala uigā, e faaoo atu ai nei mekasini i aiga o tagata o ē e mafai ona aogā i ai manatu faaleagaga e sili ona tāua o loo iai.
2 E mafai faapefea ona uunaia tagata o aiga ina ia talia ma faitau i a tatou mekasini? O le tele lava e faalagolago i le auala tatou te faatomuaina ai. O loo maua ni faufautuaga e sili ona lelei mo le sauniunia o ni faatomuaga uigā i le tusi Reasoning, itulau e 9-15.
3 Pe a ofoina atu Le Olomatamata o Oketopa 1, atonu o le a e taumafai e faaaogā le fesili lona lua o loo i le itulau e 160 o le tusi Reasoning.
A uma ona taʻu atu lou igoa, e mafai ona e faapea atu:
◼ “E tusa lava po o le ā le lotu o tatou auai, ae e iai taimi tatou te mamaʻi uma ai lava. Pe e te manatu ea e iai se faamoemoe mo se mapusaga moni mai nei faamaʻi uma?” Faalogo i le tali a lē ona le fale, ma ioe atu i ai i lona popolega. Ona mafai lea ona e faaauau, i lou fai atu faapea: “Seʻi manatu foi i le mea ua ofo mai e le Tusi Paia e fai ma vaifofo mo na faafitauli. [Faitau le Isaia 25:8.] O lea, e na o Ieova le Atua lava e mafai ona aumaia le vaifofo moni mo faamaʻi uma o le fanau a tagata.” Ona suʻe lea i le itulau e 8 ma faasino atu i palakalafa mulimuli e lua o le mataupu ua faaulutalaina “E Fesoasoani Faapefea le Faatuatua i Ē Mamaʻi.”
4 E lua isi faatomuaga e mafai ona e faaaogāina faatasi ma Le Olomatamata o Oketopa 1, o loo i le itulau e 11 o le tusi Reasoning, i lalo o le ulutala “Galuega/Fale.” E mafai ona e faamatalaina atu na manatu ma fesili i au lava upu, pe tau foi ina toe faaleoina atu mea o loo fai mai ai le tusi Reasoning. A uma ona e ioe atu i le tali mai a le tagata, ona faaauau lea e ala i le faailoaina atu o faamatalaga tāua o loo aumaia i le uluai palakalafa i le itulau e 4, i lalo o le ulutala “Leai se Vaifofo?” Ma e ala i le faitauina o le Isaia 65:21-23, ia faasino atu i faamanuiaga o le a aumaia e le pulega a le Mesia.
5 Afai e te faaaogāina le Awake! o Oketopa 8 e uiga i le “E Mafai ona E Manumalo i Faalogona Sese,” atonu o le a e taumafai ai e faataʻitaʻi le faatomuaga lona tolu i lalo o le ulutala “Ola/Fiafiaga” i le itulau e 13 o le tusi Reasoning. A uma ona faafesootai atu i le Salamo 1:1,2, e mafai loa ona faasino atu i se manatu talafeagai i le mekasini o le Awake!
6 Atonu o le a e fesagaʻi ma ni tagata o aiga o ē faapea mai ua iai a latou lava lomiga faalelotu. E mafai ona e faamatala i ai e faapea, o loo iai foi a tatou lomiga e faaaogāina mo i tatou lava (e pei o La Tatou Faiva o le Malo); peitai, ua faitauina a tatou mekasini e le faitau miliona o tagata o ē e lē o ni Molimau a Ieova. Ia faamautinoa le naunau moni a o leʻi ofoina atu i ai se tusiga. Atonu ua lava se sāvali e tuu ai pe afai e itiiti le naunau.
7 Na faapea mai Paulo i le 1 Korinito 3:6: “Na ou totōina, na faasūsūina e Apolo; a e peitai o le Atua ua faatupuina.” Afai tatou te mananao ia Ieova na te faatupuina aʻe fatu o le upu moni i loto o ē naunau, e ao la ona tatou uaʻi atu i le totōina o nei fatu i se auala uigā e ala i le faaaogāina o faatomuaga e uunaia ai.