Ia Atiina aʻe le Naunau i le Tusi o le Ola e Faavavau
1 Pe a tatou asiasi atu i o latou aiga, e masani lava ona tatou fetaiai ai ma tagata o loo faaalu uma le taimi i le “loto popole i mea a lenei lalolagi.” (Mare. 4:19) Ua tatou fesagai ma le lui o le taumafai lea e pue le naunau e ala i se taulimaga e faatupu manatu. I le taimi muamua lava, e tau leai se naunau mai o le toatele o tagata i la tatou feau. Pe afai tatou te taʻuina atu se mea o le a aogā i o latou olaga, atonu o le a tatou faagaee aʻe lo latou naunau i le feau o le Malo. O le ki i le amataina o talanoaga o le filifilia lea o ni manatu e faaosofia ai ni talanoaga mai le tusi o le Ola e Faavavau. O le ā e mafai ona e fai atu ai?
2 Atonu e te faaaogaina le faafeiloaiga lenei:
◼ “Pe ana fai e i a te oe le mana, o le ā le faafitauli tugā i o tatou aso o le a e faasaʻoina? [Faataga mo se tali mai, ma afai e talafeagai, ia ioe atu e toatele tagata o loo manatu faapena.] E oo mai i le taimi lenei, e foliga mai o loo itiiti lava se taulau manuia o taʻitaʻi o le lalolagi i le mauaina o vaifofo i le tele o faafitauli lavelave o aso taitasi. Ae e iai Lē e mafai ma o le a ia aumaia se iuga i faafitauli uma o loo aafia ai tagata. Seʻi e mātau mai foi le manatu o loo taʻua i le Salamo 145:16. [Faitau le mau, ma ia faasino atu i ala i itulau e 11-13.] Ua lāgā mai e le palakalafa e 14 i le itulau e 14 le fesili lea na faatoʻā tatou talanoaina ma faapea mai: ‘Ae o afea o le a tupu ai lenei mea.’” Ia faamalamalama atu e faapea o le a taliina e le tusi lena fesili, ma afai e naunau mai, ona ofo loa lea i ai o le tusi.
3 Po o lou fai atu foi faapenei:
◼ “Pe atonu ua e silafia le lagona lē mautonu e iai pe a maliu sē e pele i a i tatou. E foliga mai sa oo ai i a te oe le faanoanoa ma le matuā lē mafesoasoania. Atonu ua e manatunatu i nei fesili: [Faitau fesili i le palakalafa 1 i le itulau e 76.] Pe ua lē o se faamafanafanaga ea le iai o ni tali i nei fesili? Atonu e faalaeiauina ai oe e iloa o loo iai i le Tusi Paia se faamoemoe mautioa mo i latou ua maliliu. [Faitau le Ioane 5:28,29] Ua fesoasoani lenei tusi i a i tatou ina ia malamalama i le tulaga o ē ua maliliu ma le faamoemoe ua iai mo le lumanai.” Ia faasino faapuupuu atu i mataupu e 8 ma le 20. Pe a foliga mai e naunau, ona tuu lea i lē ona le fale se avanoa e iloiloina ai le tusi.
4 E telē se talitonuga o le a e maua ni avanoa e molimau lē fuafuaina atu ai. Pe afai o lena le tulaga, atonu la i au lava upu o le a e fai atu ai faapenei:
◼ “Ua faatumulia le lalolagi i aso nei i faafitauli, ma e lē taumatea ua e tofo foi i ai. E faanoanoa e faapea atu, e foliga mai o loo sili ona mafatia ai ē e lē sala. Pe e te manatu ea o le a faaiuina e le Atua mafatiaga uma? [Faataga mo se tali mai.] Seʻi oʻu faasino atu foi folafolaga a le Atua e faia mo i latou o ē auauna i a te ia. [Faitau le Salamo 37:40 ona suʻe lea o le tusi Ola e Faavavau i le itulau e 99.] O loo faamatalaina i lenei tusi le mafuaaga ua faatagaina ai e le Atua le amio leaga ma le auala o le a ia faaiuina ai.”
5 Pe afai o oe o se tagata talaʻi talavou, e mafai ona e faaaogā le taulimaga lea ua faavae aʻe i ata o loo i itulau e 156-158. Atonu e te amata i le fesili atu:
◼ “Pe e te fia soifua i se lalolagi faapenei? Faataga mo se tali mai.] O nei ata matagofie taitasi uma ua faavae aʻe i se folafolaga ua taʻua i le Afioga a le Atua, o le Tusi Paia lea. [Faasino atu i mau o le Tusi Paia.] E mafai ona fesoasoani lenei tusi i a te oe ina ia e aʻoaʻoina atili ai e uiga i folafolaga a le Atua mo le faaparataisoina o le lalolagi atoa. O loo iai se faamatalaga faasaoola ma e matuā aogā se taimi o le a faaaluina e faitau ai.”— Ioa 17:3.
6 Pe a ofo le tusi, ia e nofouta i le manaoga o le taʻu atu i lau au faalogologo so latou avanoa e foai ai i le galuega i le lalolagi aoao.