Suesuega Totino—Se Mataupu e Ao ona Manatu Mamafa i Ai

¹ O ā ni mataupu e ao ona tatou manatu mamafa i ai? E ao ona tatou matuā manatu mamafa i le atiina aʻe ma le tausia o se faiā vavalalata ma Ieova. Ua faia e suesuega totino se vaega sili i le atiina aʻe o lena faiā vavalalata. I aso nei, e toaitiiti nisi o i tatou e maua ni tulaga e mafai ai ona faaalu ni taimi uumi e mafaufau loloto ai ma faia suesuega totino. Peitai afai tatou te lē faitauina soo le Afioga a le Atua, e mafai ona faavaivaia ai i tatou, ma oo ai ina leai se malosi e tetee atu ai i le agaga o le lalolagi ma ona tuinanauga faaletino.

² Ia Faatupu se Naunau mo le Upu: Ina ua tatou faatoʻā aʻoaʻoina fuafuaga a le Atua, sa mautinoa lo tatou naunau ia maua atili le poto. Peitai ina ua mavae atu se vaitaimi, e mautinoa ua tauāu ina faaitiitia lo tatou naunau ia aʻai i meaai faaleagaga. Ona o loo iai se manaoga e toe “faatupu se naunau” mo meaai faaleagaga. (1 Pete. 2:2) E mafai la faapefea ona tatou faatupuina sea naunau?

³ O le sasala o le manogi o meaai e fai ma ō tatou maʻoi, o le a tupu ai lo tatou mataʻai ona o ni mea lelei ua toe manatua. O ni vaitaimi pupuu o suesuega totino, e mafai ona tatou aafia faaleagaga ai faapena. O le faafiafiaina i ni nai tofo o meaai susua faaleagaga, e mafai ona tatou mataʻai ai e suesue i upu moni loloto. O le lotomalie e maua mai le aʻoaʻoina, o le a faalaeiauina ai i tatou e suesue loloto i le Afioga a Ieova.

⁴ Atiina aʻe se Faasologa Masani e Sili ona Aogā mo Oe: E faataatia ese e nisi se afiafi atoa e faia ai suesuega totino, a o nisi, latou te filifilia se taimi puupuu ae faifai pea e suesue ai. Afai e te iloa e sili ona lelei le taeao po, e mafai ai ona e uai totoʻa i au suesuega, e mafai ona e faia ni suesuega a o leʻi faia le taumafataga o le taeao. Afai e sili ona e mataala i le po, e mafai ona e faia lau suesuega i le po ae e te leʻi moe. Po o le ā lava le tulaga, o le mea tāua, o le faia e lē aunoa ma ia pipii i taimi e sili ona fetaui ma ou manao.

⁵ Pe a faalaeiauina i tatou e fai atili ni suesuega totino, atonu e vave lava ona tatou faapea atu, ua tumu ā tatou faasologa. Ae peitai, e manaomia e i tatou uma lava ona faamaoni i le fuafuaina po o faapefea ona faaaluina o tatou taimi. Po o faaalu ea le tele o itula i aso taitasi e matamata ai i polokalama o le televise? Po o tatou naunau e faataulaga ni faanaunauga totino? O le iloiloina faamaoni o le auala o faaaogaina ai ō tatou taimi, o le a faapena ona faaalia ai avanoa i aso taitasi ia e mafai ona faaaogaina i se auala e sili ona aogā i suesuega totino.—Efe. 5:15, 16.

⁶ E ao ona tatou uai totoʻa atu i le suesueina o le Afioga a le Atua. O le taumafai e faia se isi mea i le taimi lena, o le a itiiti ai aogā e maua. Afai tatou te fia suesue a o aʻai, faalogologo i le leitiō, pe matamata i le televise, e faapena foi ona tatou lē maua ai le aano o mea o taumafai e aʻoaʻoina. (1 Timo. 4:15) O lea, e manaomia ona aveesea mea uma e faalavelave ane.—Tagaʻi i le School Guidebook, itulau 33-34.

⁷ E tāua le faia o suesuega i aso uma ma faatino fautuaga a le Tusi Paia, auā o le auala lea tatou te maua ai le taitaiga mai i a Ieova. Ia faia o sou sini le maua o le upu moni mai le Tusi Paia ma ia faagoto i lou loto. Ia faaaogā avanoa uma e faitau, autalu, pe mafaufau loloto ai i mea faaleagaga e tusa pe puupuu.—Teu. 6:6-8; Kolo. 1:9, 10.