Tuliloa Ē Uma na Faaalia le Naunau ina ia Maua ai e Isi Aogā
1 O le ā le vala autū ua fesoasoani ia i tatou e filifili ai pe tatau pe lē tatau ona tuu a tatou lomiga i se tasi? O le naunau fiafia! E faapena foi pe a faia toe asiga. I so o se taimi lava e faaalia ai e se tasi sina naunau fiafia i le feau o le Malo, tatou te faia so o se mea lava tatou te mafaia ina ia maua ai e lena tagata se aogā. O lea tatou te faia ai toe asiga ma le sini ina ia atiina aʻe le naunau fiafia o le tagata ma ia amataina se suesuega faale-Tusi Paia i le aiga. O lo tatou sini lea e tusa lava pe tatou te lē tuua se lomiga. E mafai faapefea ona faia o lenei mea?
2 Afai o la oulua talanoaga talu ai sa faatatau i le taatele o faafitauli tau i faaipoipoga i aso nei, ma na e tuua ai le tusi “Ola e Faavavau,” e mafai la ona e amataina le talanoaga i lou faapea atu:
◼ “I laʻu asiasiga talu ai, sa ta talanoa ai e uiga i le faaipoipoga ma fautuaga aogā a le Tusi Paia e mafai ona fesoasoani ia i tatou ia maua le fiafiaga sili. Pe e lē moni ea e tusa lava po o aiga e sili ona lelei, e mapuna aʻe ai lava faafitauli mai lea taimi i lea taimi? [Faatali mo se tali.] Ua tuuina mai e le Tusi Paia ia i tatou fautuaga e silisili ona lelei e mafai ona fesoasoani ia i tatou e foia ai faafitauli i faiā faaleaiga. E mafai ona faamanuiaina se aiga e ala i le suesueina faatasi o le Tusi Paia.” Suʻe i le itulau e 246, ma talanoa i le palakalafa e 23. Faitau le Ioane 17:3, ma ofo lau fesoasoani e ala i le amataina ona suesue le Tusi Paia i le aiga.
3 Afai sa e talanoa e uiga i tamaiti ma le manaoga ina ia toleniina i latou, e mafai ona e faaauau le talanoaga i le auala lenei:
◼ “I le taimi muamua, na tatou talanoa ai e uiga i le toleniga faaleagaga e manaomia e le fanau le auala e mafai ai e mātua ona fesoasoani ia i latou. O le toatele o mātua sa ou talanoa atu i ai, ua popole e uiga i amioga leaga a le toatele o tagata talavou i aso nei. O le ā sou manatu e uiga i . . . ? [Taʻua se faaaoaoga o ni amioga leaga a talavou i lou nuu. Faatali mo se tali.] Seʻi oʻu faailoa atu ia te oe nisi o lapataiga aogā o loo aumaia i le Tusi Paia.” Suʻe i le palakalafa e 22 o le itulau e 246 o le tusi Ola e Faavavau, talanoa i le manatu autū ma faitau le Efeso 6:4. Faailoa i ai e faapea, o le toatele o tamaiti e manaomia moni lava se aoaiga ma se taʻitaʻiga. Pe a maumauai mātua i le saunia o aoaiga ma taʻiala, o le a sili atu ona fiafia ma sili atu ona amio faaaloalo tamaiti. Faamatala le auala o tatou suesue ai le Tusi Paia ma a tatou fanau.
4 Afai sa lua talanoa i le mataupu e uiga i le lalolagi Parataiso, ina ia toe fafagu la le naunau, e mafai ona e faapea atu:
◼ “Sa ta vaavaai i nisi o ata i lenei tusi e faaalia ai ia i tatou foliga o le a iai le lalolagi pe a faaliliuina e le Atua e avea ma parataiso. O le a leai se aogā mo i tatou pe afai e lē mafai ona tatou olioli ai faatasi ma ē pele ia i tatou. E te ioe i ai?” Faatali mo se tali. Ona suʻe lea i le itulau e 162 o le tusi Ola e Faavavau. Faitau le Faaaliga 21:3, 4, ma faamatala le auala o le a mafai ai ona tatou faatasi pea ma ē pele ia i tatou. Afai e tali lelei mai, faitau le Ioane 5:28, 29 e faaalia ai e faapea, o le a toe foi mai ē ua maliliu i le ola. Faasino i le faavaa o le tusi ma faapea atu: “O le mea moni lava—e mafai ona tatou ola e faavavau i le Parataiso i le lalolagi!” Fuafua mo se isi toe asiga e talanoa ai le pogai ua tatou iloa ai ua lata tele mai lea taimi.
5 O le fuafuaga autū o se toe asiga, o le fesoasoani ai i tagata naunau fiafia ina ia maua aogā mai le feau o le Malo. O le toatele lava o tagata, e manaomia se uunaiga e faaoso ai lo latou mataʻai mo mea faaleagaga. Tataʻi o latou mafaufau i manatu patino e matuā tāua i le lomiga, i le faamamafaina o le auala e mafai ona fesoasoani ia i latou e malamalama lelei ai i le Tusi Paia. O toe asiga e mafai ona faataunuuina nei sini, o le a fesoasoani i isi ina ia maua ai e i latou lava aogā i se auala e sili ona lelei latou te mafaia.