Fesoasoani i Isi ina ia Maua e i Latou Lava Aogā
1 Ua folafola mai e Ieova na te aʻoaʻoina i tatou i mea e manaomia ona tatou iloa. Ua ia faamautinoaina i tatou i le Salamo 32:8: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.” Ua aogā tele lenei fautuaga ia i tatou. Ma le lē manatu faapito, ua tatou mananao ai e faailoa atu i isi le auala e latou te maua ai aogā mo i latou lava e ala i le utagia o le fautuaga atamai mai le Tusi Paia. (Isa. 48:17) Ia Setema, e mafai ona tatou faia o lenei mea e ala i le ofoina o le tusi o le Ola e Faavavau. I le faia o a tatou taulimaga, e iai auala eseese e mafai ona tatou faailoa atu ai le aogā tāua o le Tusi Paia.
2 Ona o le taatele o faafitauli tau i faaipoipoga i aso nei, atonu o le a e filifili ai e faatomua lenei manatu mai le tusi, “Ola e Faavavau”:
◼ “O le toatele o tagata ua ou talanoa i ai, e matuā popole ona o le faateteleina o le lē fiafia ma talaga faaipoipoga. O le ā sou lagona e uiga i lenei faafitauli? [Faatali mo se tali.] E toatele ua lē taulau ona latou iloa mafuaaga autū. Afai latou te faia se taumafaiga faamaoni, o le a lē gata ina mafai e ulugalii ona faasaoina a latou faaipoipoga, ae e mafai foi ona latou maua le fiafia moni. O le autū e taulau manuia ai, o le faatatauina lea o fautuaga o loo maua i le Tusi Paia.” Faitau le Efeso 5:28, 29, 33. Suʻe i le itulau e 243, talanoa i le palakalafa e 16 ma le 17, ma ofo loa le tusi.
3 E manaomia e tamaiti se taimi uigā ma le toleniga mai o latou mātua. I le faatomuaina o le tusi “Ola e Faavavau,” e mafai ona e faapea atu:
◼ “E popole i tatou uma lava mo le lelei o a tatou fanau talavou i le lumanai. E te manatu, o le ā se auala e sili ona lelei e mafai ai e mātua ona fesoasoani i a latou fanau ina ia maua se lumanai malupuipuia? [Faatali mo se tali.] Seʻi faalogo foi i le fautuaga lenei mai se faataoto i le Tusi Paia, na tusia pe tusa ma le 3,000 tausaga ua mavae. [Faitau le Faataoto 22:6.] A o maua e a tatou fanau le tele o aogā mai faatonuga latou te maua i le aʻoga, a o le toleniga sili ona tāua, e latou te maua mai lea i le aiga mai o latou mātua. E manaomia ai le taimi, le uaʻi totoʻa atu i ai, ma le alofa, ae o le mea e sili ona aogā, o taumafaiga.” Suʻe i le itulau e 245, ma talanoa le palakalafa 20 ma le 21, ona faamatala lea i ai le auala e mafai ona faaaogā ai le tusi e faavae ai se suesuega faale-Tusi Paia i le aiga.
4 Atonu e te manao e ofo le tusi “Ola e Faavavau” e ala i le faaalia o le auala o le a avea ai le lalolagi ma parataiso:
◼ “Ou te talitonu o loo e popole po o le a faapeī lou olaga i le lumanai. I le Tatalo a le Alii, na aʻoaʻo ai i tatou e Iesu ina ia tatalo mo le faia o le finagalo o le Atua i le lalolagi e pei ona faia i le lagi. O le a faapeī le lalolagi pe a tupu lena mea? [Faatali mo se tali.] O se vaaiga faatusiata lenei o se lalolagi parataiso. [Faasino i le ata i le itulau e 12 ma le 13. Ona faitau lea o le Isaia 11:6-9, lena e aofia ai i le palakalafa e 12.] Pe e lē o se mea matagofie ea le ola ai i se lalolagi faapena? O le a faailoa atu e lenei tusi ia te oe le auala e mafai ai ona e ola ma lou aiga i se parataiso faapena.”
5 O le muai sauniuni o lau taulimaga, o se vala autū lea e iloa ai lou taulau manuia i le fale. Ae e te lei tuʻituʻi i le faitotoa, ia faamautinoa ua iai se manatu patino faale-Tusi Paia e fai atu. Ia manatua foi se faamatalaga puupuu e fai atu e uiga i se mataupu faaoso naunau i le mekasini po o se sāvali ua e fuafuaina e ofo pe afai e lē talia le tusi. Ia faaaogā avanoa uma ua e maua e lūlū ai fatu o le Malo ia Setema. (Fai. 11:6) O le a avea oe o se fesoasoani i isi ina ia selesele mai aogā o le a tumau e faavavau.